INTERFET konversa ho labarik Oé-Cusse sira iha Oe-Cusse. Imajen/Kontribuidór REUTERS: Alamy Stock Photo.

DILI, 06 setembru 2021 (TATOLI)–Maske iha situasaun defisil ne’e, Atoni-oan kuaze 5000-resin indika Padre Daschbach sai komandante seguransa hodi fó seguransa ba refujiadu sira iha Kutete maibé bainhira ho milísia sira primeire-ves ba asalta Kutete no konsege oho joven ida halo ami halai fahe malu arbiru.

Notísia Relevante: INTERFET seidauk tun iha Oé-Cusse, Atoni-oan foti Padre Daschbach sai komandante (I)

Ho asaun asalta hosi milísia ne’e, populasaun balun halai sa’e ba foho no balun halai ba fali Indonézia tanba labele tahan ona ho milísia sira-nia hahalok kruel ne’e.

Sasun0matan no sasin-moris, Fabião de Oliveira no Carlito do Carmo, haktuir iha loron 24 setembru 1999 ne’e membru milísia sira halo asalta daruak ba padre nia rezidénsia iha Kutete, tanba milísia Sakunar mak hatudu dalan ba membru mílisa seluk tanba grupu milísia SAKUNAR mak hatene situasaun jerál iha Oé-Cusse laran ne’e.

Iha asalta daruak ne’e, ha’u hamutuk ona ho ha’u-nia kolega ida naran Carlito do Carmo. Nia uluk nu’udar estudante hosi UNTIM (atuál UNTL). Ami na’in-rua mak sempre la’o hamutuk. Nia iha konifansa ba ha’u. Ha’u mós la’o ho ha’u-nia labarik na’in-tolu, hanesan seguransa. Entaun, iha asalta ne’e, ami halai sa’e ba foho idas aas-liu iha Oé-Cusse iha Oenaek área Kutete nian.

Iha-ne’ebá, ami ho populasaun lubuk ida, Padre Dasbuch mós iha-ne’ebá, entaun ami husu ba padre, hanoin halo nusá kuandu milísia kontinua ataka? Entaun, ami dehan ‘Ita lakon ona esperansa’. Ha’u sei sai ba Indonézia, iha Manamas besik entre Sakato ho Nipane no Manamas.

Ha’u ho Carlito do Carmo (matebian), ami na’in-rua bisi-bisi ba malu; “Amo Daschbach de’it lakon ona esperansa, satán ita!” Nune’e, ami na’in-rua toba tiha kalan-rua iha fatin ne’e ho padre Daschbach, padre mós komesa sees-aan ho ninia labarik orfonatu sira balun.

Entaun, ami na’in-rua deside tún fali mai vila laran. Ita labele hela iha foho-leten, nune’e milísia sira mai buka ita iha foho-leten maibé ita iha vila laran hela.

Nune’e, nia (Carlito do Carmo) husu ba ha’u; “Maun, ita kuandu tún ba vila laran atu halo saida. Ita buka to’ok estratéjia foun,” Entaun, ami na’in-rua fahe-malu ho padre, ami la’o mós la fó hatene ba padre ona tanba ami lakon ona konfiansa ba nia.

Iha istória balun dehan, “Padre Daschbach mak haruka LAFU ne’e sala no la loos, tanba ha’u sei moris.” Ha’u sei halo semináriu ida atu konta ba ema hotu, nune’e bele hatene. Entaun, ha’u ho Carlito ho tiu ida naran António Pereira, ami halai tún hosi Kutete. Ami atu tún ba fatin ida naran Meok-Ana, entaun ami tún liuhosi Sala. Fatin Sala ne’e fatin ida ke perigu la halimar tanba namdoras. Ita tenke la’o ho kuidadu tanba ita hakat sala no sama kois buat ruma, ita bele monu mate-aan k abele monu ba rai kuak laran.

Entaun ami na’in-tolu la’o tún ba kraik no bainhira to’o iha kraik, tiu António Pereira ne’e hanoin fali nia rian Sekretáriu CNRT entaun nia sa’e fila-fali ba leten, entaun ha’u ho saudozu Carlito do Carmo esak mak tún iha fatin ne’e.

Ami na’in-rua tún lori de’it nú maran fuan ida. Iha kalan ne’e, ami na’in-rua toba iha fatu-kuak ida. Entaun iha fatu-kuak ne’e, ami na’in-rua nia ain lolo ba iha bee laran. Iha kalan ne’e, Carlito do Carmo dehan ba ha’u; “Maun, ita sei buka estratéjia ida halo nusá mak ita bele salva Povu Oé-Cusse. Tanba, INTERFET tún tiha ona iha Dili, agora INTERFET seidauk mai iha Oé-Cusse ne’e.”

Nune’e, iha kalan ne’e, ami na’in-rua (2) haan nú-maran ne’e hodi hemu bee ne’ebé sulin hosi Sala mai ne’e. Ha’u ho jaket metan ida ho ha’u-nia tudik ida. Carlito mós lori jaket ida. To’o dadeersan, ami na’in-rua kontinua la’o, la’o kala lato’o kilómteru 100, ami hetan ona populasaun sira no família balun iha-ne’ebá. Ami ba hasoru loos ita-nia populasaun independentista sira iha fatin ida naran Meok-Ana.

Distánsia hosi Meok-Ana ne’e ba Pante Makasar kuaze kilómetru ida de’it. Enaun, loro-loron ami halibur malu iha fatin refere.

“Ha’u bele hateten ne’e inisiativa ne’e ema na’in-rua nian, ha’u ho matebian Carlito do Carmo nian. Maibé, desizaun atu haruka LAFU ba Dili ne’e desizaun koletiva. Katak, família no gupu joven sira-ne’ebé ami iha Meok-Ana ne’e mak foti desizaun. Momentu ne’e ami hamutuk ema 100 mak iha Meok-Ana ne’e. Ita konta ho labarik, joven, ferik no katuas. Depois lakleur populasaun balun mai tán,” Fabião de Oliveira informa ba Agência TATOLI, iha nia rezidénsia Kampung Baru, Dili, foin lalais ne’e.

Entaun, ami na’in-rua tún mai, sira hotu-hotu kontente inkuli Prezidente Autoridade RAEOA nia pai, Ambrosio Bano, Timotio do Carmo (saudozu Carlito do Carmo nia aman), Filomeno Lelan, António Teimenas, Kehi, Agostinho Lelan, Januário Nesi, Luis Armando Pina, Ana Paula Sequeira, Helena Bano, barak loos, sei iha tán.

Nune’e inisiativa ne’e ha’u ho matebian Carlito do Carmo informa ba populasaun sira hotu ne’ebé subar iha Meok-Ana liuhosi reuniaun ida katak; “Ita presiza haruka ema ka labarik ida sai tanba Oé-Cusse agora ema mate barak. Oé-Cusse agora hamlaha ona, hahaan mós laiha no agora milísia barak. Se ita husik tempu naruk tán, populasaun sira bele mate mogu. Entaun, ita tenke buka meiu oinsá ema ida bele sai hosi Oé-Cusse ba Dili.

Iha momentu ne’ebá ami lembra katak, LAFU ne’e ho idade tinan 16 entaun nia badiu ba-mai Kupang-Indonézia tanba Oé-Cusse-oan barak eskola iha-ne’ebá, hanesan Luis Armando Pina ‘Koli’, Edmundo Efi, asvezes LAFU bele ba badiu no pasear to’o Jawa-Indonesia.

Iha momentu ne’e, LAFU ne’e ami haruka nia ba sosa sigarru iha Wini tanba nia inan-aman sei iha Wini, no nia fila-fali lori ho sigarru. Entaun, ami tuur hanoin mak hanoin kona labarik LAFU ne’e. Ami tuur hodi hanoin tekir-tekir Armando Pina mós hanoin hodi dehan, “Se posível, ita haruka mak labarik LAFU sai ita-nia mensajeiru. Milísia mós la deskonfia nia no ema sei la kaptura nia.”

Notísia Relevante: Mensajeiru “LAFU” salva Oé-Cusse ho karta-lulik iha “sinelus laran” (I)

Hanoin ida-ne’e, ami hotu-hotu foti desizaun, “Ita atu haruka ema-nia oan LAFU maibé nia inan-aman la marka prezensa. Se ita haruka LAFU ba mak iha problema ruma mak milísia sira oho tiha nia, responsabilidade ami-nian, ami sira-ne’ebé foti desizaun hodi haruka LAFU ne’e mak responsabiliza.”

Tanba desizaun ne’e koletiva, ami na’in hira reuniaun, deside tiha no depois informa ba katuas sira. Entaun katuas sira dehan, ne’e di’akliu no tenke ser haruka ema ida sai hosi Oé-Cusse no ema ne’e mak labarik LAFU duni. Antes ita atu haruka LAFU sai hosi Oé-Cusse ba Dili, ita tenke ser halo rituál adat (kultura) para bele fó matak malirin ba nia no matebian sira bele salva nia.

Ami halo tiha kultura tura adat Oé-Cusse nian hodi husu ba matebian sira hotu ne’ebé mate ba rai ida-ne’e, nune’e LAFU sai no ba rai-boot DILI karik to’o ho susesu no fila ho seguru. Iha kalan ida, ami halakan petromas ida, entaun ami hakerek karta ne’e tolu (3). Ida ami hakerek ho lian inglés no bahasa Indonesia (maláiu) ne’e dirije ba Komandante INTERFET Peter Cosgrove no karta ida-ne’ebé hakerek ho dalen portugés ne’e dirije ba maun Taur Matan Ruak. Karta ne’e parese iha maun Jenderál Taur Matan Ruak no Pedro Klamar Fuik.

Iha karta ne’e, “Ami husu ba iha FALINTIL ho Komandante INTERFET atu lalais haruka forsa multinasionál INTERFET atu mai Oé-Cusse tanba Oé-Cusse mós parte ida hosi Repúblika Demokrátika Timor-Leste (RDTL) no Oé-Cusse manán 90% ba referendu, nusá mak fulan-ida INTERFET tún ona iha Dili, INTERFET seidauk mai iha Oé-Cusse ne’e, problema ne’e saida”.

Iha loron 04 outubru 1999, Mensajeiru labarik Fredolino José Landos da Crus Beun Sila “LAFU” (tuur iha oin) iha pos INTERFET Batugade, bainhira nia entrega tiha karta hosi Oé-Cusse ba INTERFET. Imajen/Kontribuidór REUTERS: Alamy Stock Photo.

Iha ema-ida naran Januário Nesi ninia subriñu ida-nia sinelus, nia naran José Anin. Sinelus ne’e foun hela depois mahar. Hanoin osan-mean ida mai hosi Agus da Costa Lelan dehan nune’e, “Entaun karta ho osan sira-ne’ebé ita halibur ne’e tau-subar iha sinelus okos ne’e, nune’e ema labele deskonfia no la’o karik tau de’it nune’e no LAFU haklili de’it iha nia liman-rua ne’e bainhira hakat liu bee-nalihun ka hakat tama tasi-been ruma”.

Nune’e Agus da Costa Lelan ne’e lori katana ida kua-fera sinelus ne’e nia okos iha klaran loloos, no ami hahú halibur no soe hamutuk osan atu fó ba LAFU hodi bele la’o. Maibé osan ne’e ami tau tán iha plástiku ida tán ho surat ne’e, ami haruka Agus da Costa Lelan ne’e falun didi’ak, tau-subar tiha iha sinelus be kua ona ne’e nia laran, hafoin lori goma (lem) Castol ne’e hodi gola metin tiha fali sinelus ne’e hanesan foun fali.

Depois ami haruka LAFU hatais-koko sinelus ne’e. LAFU koko no sukat sinelus ne’e ba nia ain, eh Maromak boot, LAFU nia ian mós han-malu ho sinelus ne’e. Iha momentu ne’e mak ami fó hatene no hameno tuir hela ba LAFU katak, “Bainhira ó tama bee, ó labele tau sinelus ne’e hodi tama ba bee laran. Di’akliu ó la’o ain-tanan no sinelus ne’e ó haklili ka kaer de’it iha liman”.

Hafoin ne’e, iha kalan ne’e kedas, ami oho tiha fahi ida no ami bolu katuas sira mai hamulak ba matebian sira, rai-lulik Oé-Cusse, foho-lulik, fatuk lulik, bee lulik no tasi lulik atu fó beran no akompaña labarik mensajeiru LAFU nia viajen hosi Oé-Cusse la’o to’o Dili ho isin-di’ak. Tanba moris nia na’in ne’e iha lalehan, sira mós lahaluha hasa’e orasaun ba Aman Maromak Moris Nia Na’in, ne’ebé dirije hosi saudozu Carlito do Carmo nia mama—husu tulun ba Maromak atu tulun mensajeiru LAFU bele hala’o nia misaun lulik ne’e ho susesu.

Maibé antes LAFU atu sai hosi fatin ne’e, iha tiha ona grupu ida haruka ema na’in-haat sai uluk ba Dili, inklui ha’u-nia rian ida maibé sira ba la konsege tanba milísia kaptura no ohon tiha ida, no seluk ne’e fila-fali mai Oé-Cusse no hakat liu ba tasi sorin Timor Osidental-Indonézia no ha’u mós la hatene ona sira-nia paradeiru.

Karta resposta hosi Vise Komandante das FALINTIL, Taur Matan Ruak, ba karta hosi Oé-Cusse ne’ebé LAFU entrega ba Taur Matan Ruak. Imajen Tatoli/Abilio Elo Nini.

Ho esperiénsia ida-ne’e, ami estuda ona sira na’in-haat ne’ebé la konsege ne’e, entaun ami uza labarik kiik LAFU. Bainhira, iha kalan ne’e, labarik LAFU hakat sai hosi fatin ami konsentra ne’e, ami hotu nonook, triste no balun reza, tanba ne’e konsekuénsia todan entre mate no moris. Se LAFU moris, ami hotu basa-liman no kontente katak INTERFET salva Oé-Cusse maibé se LAFU mate, ami na’in hira ne’ebé foti desizaun ne’e mak responsabiliza hodi responde ba LAFU nia inan-aman, perante no família sira.

Iha karta ne’e, asina hosi reprezentante juventude, reprezentante CNRT, reprezentante seguransa no reprezentante feto sira.

Karta ida ho versaun portugés ha’u mak hakerek no karta versaun Tetun no Inglés ne’e saudozu Carlito do Carmo mak hakerek. Karta ne’ebé ha’u hakerek ho dalen portugés ne’e ninia konteúdu hakerek liafuan sira nune’e;

“Pedimos os forças armadas das FALINTIL e força multinacional INTERFET para salvar o nosso povo do Oé-Cusse, estamos dentro de uma imbuscada dos milícias e dos militantes do pro autonomia. Então urgentemnte o senhor Taur Matan Ruak orineta o força INTERFET para embarcaram em Oé-Cusse para salvar o nosso populações.”

Ne’e konsekuénsia, maibé ami hanoin katak saida de’it mak akontese tanba ita hakarak ukun aan entaun ita hakarak liberta povu no pátria ida-ne’e no Oé-Cusse mós tenke haloparte iha RDTL.

Lafu hakat sai husik hela ami, hanesan labarik baibain, nia la’o ho haksolok hodi halao misaun lulik ne’e. Nia la’o duni no la’o tebes duni. Hodi karta ne’e ba rai-boot Dili, hanesan istória ne’ebé LAFU haktuir ba Agência TATOLI tanba, nune’e nia la’o dook no nia kanuruk lakon iha nakukun laran ne’e, ami la akompaña ona nia.

Notísia Relevante: Mensajeiru labarik “LAFU” entrega karta ba INTERFET (II)

Kontinua…. Parte III

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here