INTERFET tama Oé-Cusse. Imajen/Kontribuidór REUTERS: Alamy Stock Photo.

DILI, 06 setembru 2021 (TATOLI)–Iha fulan-setembru tinan 1999 liuliu hafoin Sekretáriu Jerál Nasaun Unida, Kofin Annan, anunsia rezultadu Konsulta Populár (referendu) iha 04 setembru katak maiória povu Timor-Leste hili haketak aan hosi Indonézia, situasaun nakfilak halo fulan-setembru ne’e sai nakukun tanba akontese violasaun direitu umanu iha fatin-fatin.

Notísia Relevante: Mensajeiru “LAFU” salva Oé-Cusse ho karta-lulik iha “sinelus laran” (I)

Iha rai enclave Oé-Cusse, rai ida-ne’ebé hatuur-aan mesa-mesak iha rai Kupang nia leet, populasaun sira halerik tanba hafoin kampaña ikus Conselho Nacional Rezisténsia Timorense (CNRT) ne’ebé realiza iha iha Pante Makasar, Oébau, suku Costa ne’e, povu Oé-Cusse hetan torturasaun, violasaun direitu umanu no oho CNERT nia ema, ne’ebé oho hosi membru milísia Sakunar.

Povu Oé-Cusse tau esparansa makaas ba FALINTIL no forsa INTERFET atu tama lalais Oé-Cusse maibé tanba tasi haketak no foho teri-netik, hein be hein, hodi hamaluk ho intimidasaun no presaun hosi membru milísia sira ho laran susar.

Iha biban ne’ebá, tanba hein INTERFET seidauk tún iha Oé-Cusse vila, Antoni-oan sira kuaze 5.000 foti padre Richard Dusbach sai nu’udar komandante ba sira atu salva povu hosi membru milísia sira-nia kruelidade.

Autór no eskritór hakerek karta versaun Portugés hodi fó ba mensajeiru “LAFUU” hodi entrega ba INTERFET, Fabião de Oliveira, haktuir hafoin kampaña ikus Conselho Nacional Rezisténsia Timorense (CNRT) iha Pante Makasar, povu balun halai sa’e ba Kutete, Padre Ricard Daschbach nia fatin, tanba ne’e seguru liu atu salva moris.

Tanba, nia dehan, nune’e iha 4 setembru 1999 bainhira ONU fó-sai katak pro-independénsia CNRT manán, entaun iha ona eksodus boot hosi Oé-Cusse ba Atambua, hosi Oé-Cusse ba Kupang no hosi Oé-Cusse ba Kefamenanu.

Tanba milísia sira identifika Fabião de Oliveira (agora deputadu) nu’udar autór ida ba klandestinidade, entaun milísia sira asalta nia banin nia rezidénsia, nune’e nia konsege halai sai ba fatin ida naran Paineno. Iha Paineno, Fabião hasoru joven independentista lubuk ida, depois liu ba Kutete, fatin ida-ne’ebé padre Ricard ho labarik orfornatu sira hela ba.

Entaun iha-ne’ebá, Fabião ho joven sira hahú halibur ona tanba Oé-Cusse-oan hotu-hotu kompostu hosi joven, katuas no ferik sira kuaze 5000 konsentra ona iha Kuitete. Entaun iha-ne’ebá bele tuur hakmatek, nune’e tenke ser forma grupu seguransa ida.

“Iha momentu ne’e ami foti Richard Daschbach sai hanesan Komandante hodi organiza halo estratéjia, nune’e ami bele halo presaun hasoru milísia sira. Maske kilat laiha maibé ami halo estratéjia oioin atubele evita milísia sira labele duni tuir ami,” Fabião de Oliveira informa ba Agência TATOLI, iha nia rezidénsia Kampung Merdeka, Dili.

Iha momentu ne’ebá, grupu milísia sira mak hanesan Sakunar, Besi Merah Putih, Aitarak, Laksaur, Naga Saki no Saka, hotu-hotu konsentra iha-ne’ebá ona. Tanba Oé-Ccusse nu’udar fatin ida-ne’ebé milísia sira sente seguru tanba iha Oé-Cusse bele sai nu’udar baze apoiu sira-nian tanba nu’udar enklave ne’ebé iha Indonézia nia leet.

Iha momentu ne’e, Fabião de Oliveira hamutuk ho estrutura CNRT nian hanesan Martinho da Cunha nu’udar Sekretáriu Rejiaun Oé-Ccusse nian.

Ho ninia estrutura CNRT ne’ebé lidera hosi Martinho da Cunha, entaun Fabião mós inklui ona iha estrutura hanesan ema ida ke halo serbisu klandestinidade, hanesan ema ida-ne’ebé durante tinan barak fó apoiu klandestina iha Oé-Cusse ne’e.

“Iha momentu ne’ebá foti Padre Dusbach nu’udar Komandante seguransa nian, entaun tenke ser vise-komandante ida ba seguransa nian. Entaun sira foti ha’u nu’udar vise-seguransa iha Kutete,” nia dehan.

Iha-ne’e duni, hahú organiza malu hodi haree kona-ba situasaun refujiadu sira-nian hanesan labarik, ferik, katuas no joven sira, tanba Kutete ne’e mak hahan iha.

“Ami kuaze 5000-resin ne’e loro-loron padre mak fó han ami. Aleinde nia fó-han orfonatu sira, nia fó-han mós ami. Ami iha Kuatete durante fulan-ida (iha fulan-setembru tomak). Iha-ne’ebá mak milísia sira primeira vez asalta ami, milísia sira konsege hadau karreta UNAMET nian, milísia sira sa’e hosi suku Bobokase mai iha aldeia Bunei. Milísia sira konsege oho joven ida mate no ami hakoi iha padre nia rezidénsia,” nia haktuir.

Hosi asalta hosi milísia ne’e, populasaun balun halai sa’e foho no balun halai ba fali Indonézia tanba labele ona ho milísia sira-nia asalta dahuluk ne’e.

 “Ami lakon buat hotu, tanba kada loron ami rona mak rádiu Nederland, rádiu Austrália, bainhira mak INTERFET tama iha Oé-Cusse, maske INTERFET tama tiha ona iha Dili no munisípiu sira seluk,” nia dehan.

Notísia Relevante: Mensajeiru labarik “LAFU” entrega karta ba INTERFET (II)

Deputadu Bankada FRETILIN ne’e relembra, Oé-Cusse ne’e problemátiku uitoan entaun forsa INTERFET sira la haree Oé-Cusse ne’e iha-ne’ebá, tanba izoladu iha Indonézia nia leet.

“Ha’u rona de’it mak rádiu Nederland, laiha informasaun sai hosi Oé-Cusse ba munisípiu sira seluk entaun susar tebes ba ami,” nia hateten.

Kontinua…parte II

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here