COVALIMA, 18 agostu 2021 (TATOLI) –Programa Nasional Dezenvolvimentu Suku (PNDS) Postu Administrativu Suai Villa, Munisípiu Covalima, sei loke kotasaun ba kompañia sira kona-ba projetu konstrusaun Uma Kbiit Laek (UKL).
“Atu konstrui UKL ami halo ona enkontru no sei halo verifikasaun ba kompañia manan na’in ne’ebé sei fornese materiál konstrusaun hosi konstrui UKL,” Administradór Postu Administrativu Suai Vila, Laurentino da Silva, informa ba Tatoli iha nia kna’ar fatin, kuarta ne’e.
Programa PNDS atu konstrui UKL iha suku sira tuir sistema random iha aldeia ida sei hodi konstrui uma tolu (3).
Iha sorin seluk, Xefe Suku Matai, João Amaral, informa iha Suku Matai, Postu Administrativu Maucatar, Covalima, seidauk konstrui UKL tanba sei halo planu hodi loke kotasaun ba kompañia.
Molok ne’e, diretora delegasaun PNDS Munisípiu Covalima, Zélia Freitas da Conceição, informa PNDS harii uma ba kbiit laek ne’e sei implementa iha suku 30 no kada aldeia sei harii uma kbiit laek tolu.
“Ba iha faze sosializasaun, re-verifikasaun no BoQ mós ita finaliza ona, ita hein preparasaun prosesu aprovizionamentu atu tama iha prosesu implementasaun,” Zélia Freitas da Concieção hateten hodi relata mós katak orsamentu konstrui UKL ba suku 30 iha Covalima hamutuk $1.493,000
Jornalista : Celestina Teles
Editór : Francisco Simões