Ilustrasaun COVID-19. Imajen/Espesiál.

DILI, 04 setembru   2021 (TATOLI)—Sala Situasaun, Sentru Integradu Jestaun Krize (SIJK) sábadu ne’e rejista kazu óbitu haat, pozitivu 89, rekoperadu 253 no kazu ativu 4.261.

Notísia Relevante: COVID-19, pozitivu 169 no ativu 4.429

“Totál óbitu, ohin (04 setembru) ne’e na’in-haat (4) kompostu hosi bebé feto ida ho idade loron 12 (timor-oan), inan hela iha Remexio, seidauk vasina, iha 23 Agostu de 2021, moris hosi inan diagnóstikadu ho COVID-19. Matebian sofre mós sífilis congenital. Hafoin moris hetan pneumonia tanba COVID-19. Hala’o tratamentu iha semana ida ikus, maibé iis-kotu ohin 12h20. Familia kordena ona ho ekipa saúde atu hala’o funerál tuir protokolu ne’ebé adopta iha Timor-Leste,” Kordenadór Forsa-Tarefa ba Prevensaun no Mitigasaun, Rui Maria de Araújo hateten liu hosi komunikadu imprensa.

Mane ida idade tinan 76 (timor-oan), hela iha Dili, seidauk vasina, iha 23 agostu 2021 diagnóstikadu iha HNGV ho sindroma insufisiénsia respiratória aguda (SIRA) tanba COVID-19. Iha loron ne’e kedas matebian hala’o tratamentu iha Vera Cruz. Matebian iis-kotu ohin 14h55, iha Vera Cruz.

Mane, idade tinan 42 (timor-oan), hela iha Lospalos, seidauk vasina, iha 03 setembru 2021 diagnóstikadu iha Lospalos ho sindroma insufisiénsia respiratória aguda (SIRA) tanba COVID-19. Matebian iis-kotu ohin dadeer 05h35, iha Lospalos. Familia kordena ona ho ekipa saúde atu hala’o funerál tuir protokolu ne’ebé adopta iha Timor-Leste.

Mane, idade tinan 16 (timor-oan), hela iha Lospalos, seidauk vasina, iha 03 setembru 2021 diagnóstikadu iha Lospalos ho sindroma insufisiénsia respiratória aguda (SIRA) tanba COVID-19. Matebian sofre mós moras fuan ho anemia. Matebian iis-kotu horisehik 18h00, iha Lospalos. Familia kordena ona ho ekipa saúde atu hala’o funerál tuir protokolu ne’ebé adopta iha Timor-Leste.

Kazu foun rejista hamutuk 89 ne’e hosi Dili na’in-39, Covalima na’in-22, Lautém na’in-11, Baucau na’in-ualu (8) no munisípiu seluk hamutuk na’in-sia (9), ne’ebé kompostu hosi mane 39 no feto 50.

Hosi totál kazu detetadu foun ohin, ho idade 20-24 (27%), ho idade entre tinan 12-59 na’in-62 (69,6%), idade 60 mai kraik na’in tolu (3). Hosi kazu detetadu foun ohin 48 kazu ka 54% sintomatiku (hatudu sintomas). Hosi kazu detetadu foun ohin, na’in-20 (22%) iha ona vasina kompletu no na’in-hitu (8%) hetan ona vasina doze dahuluk.

Kumulativu kazu konfirmadu sura hosi 21 marsu 2020 to’o 04 setembru 2021 hamutuk 17.468. Hosi horisehik mai ohin, teste ne’ebé Laboratóriu Nasionál Saúde halo hamutuk 245 PCR, ho detallu hanesan tuir-mai; vijilánsia sentinela na’in-53, rastreiu ba kontaktu ka Contact Tracing  na’in-35,  Rastreiu Aleatóriu  ka Random Screening na’in-35, viájen sai-hosi serka sanitária hosi Dili na’in-neen (6),  viájen internasionál na’in-33, follow up iha kuarentena na’n-83.

Teste PCR

Totál teste PCR ne’ebé halo horisehik (03 setembru) iha munisípiu-sira seluk, RAEOA no HNGV hamutuk na’in-334 ho detalla hanesan tuir-mai; Maubisse na’in-24, Bobonaro na’in-14, Viqueque na’in-10, Covalima na’in-67, Baucau na’in-72, Ermera na’in-ida (1), RAEOA na’in-12, HNGV na’in-112, no Lautém na’in-22.

Totál doze vasina ne’ebé fó ona ba populasaun elijível tinan 18 ba leten, to’o ohin dadeer 10h00,  loron 04 setembru tuir sistema informasaun Saúde iha Ministériu Saúde  totál  kumulativu doze dahuluk iha Dili (74,6%), no  totál  kumulativu doze daruak iha Dili (58,9%). Ema-ne’ebé simu ona vasina doze dahuluk iha Timor-Leste (52,5%) no simu ona doze daruak (27,7%).

Insidénsia

Atu bele hatene surtu ida ninia evolusaun nomós surtu ne’e aumenta ka diminui, indikadór seluk ne’ebé matenek-nain epidemiolojia nian uza mak insidénsia.

Konvensionalmente, insidénsia sukat totál kazu foun kada loron pur mil abitante, no hatudu risku ne’ebé populasaun iha atu hetan da’et moras ida.

Hosi insidénsia COVID-19 iha Timor-Leste, durante loron hitu ikus mak 13,4/100 mil abitante,  enkuantu ba de’it munisípiu Dili, 30,8/100 mil abitante.

Ohin, munisípiu Baucau iha insidénsia 14,2/100 mil abitante, tuir kedas ho munisípiu Lautém  ho insidénsia 9,6/100 mil abitante, hafoin munisípiu Covalima ho insidénsia 8,4/100 mil abitante, no munisípiu Viqueque ho insidensia 8,4/100 mil.

Dadus iha leten hatudu katak insidénsia munisípiu Dili ho munisípiu Baucau tutuir malu aas-liu, iha Timor-Leste laran tomak munisípiu rua seluk Viqueque, Lautém, Covalima mós hatudu risku aas-liu atu populasaun hetan da’et no hada’et tutan virus SARS-CoV-2 iha komunidade nia le’et.

Iha loron 04 setembru 2021, izolamentu Vera Cruz, Lahane, HNGV no fatin seluk iha territóriu laran tomak halo tratamentu hospitalizadu ba kazu detetadu pozitivu na’in-95, ho detalla hanesan tuir mai; grave hamutuk na’in- 15 ne’e na’in-tolu (3) uza ventiladór, na’in-lima (5) uza CPAP-Continuous Positive Airway Pressure, na’in-hitu (7) uza oksijéniu, moderadu hamutuk ema na’in-59 no kmaan ema na’in-21.

Konfinamentu domisiliáriu

Hakarak nafatin informa públiku katak Governu impoin prolongamentu medida saúde públika ho naran konfinamentu domisiliár obrigatóriu katak obrigatóriamente ema presiza hela iha uma atu prevene virus SARS-CoV-2 (inklui variante Delta) hada’et barak liután iha komunidade nia leet.

Nune’e mós, Governu impoin medida saúde públika serka sanitária katak ema labele sirkula livremente, sai ka tama hosi àrea serka, hodi bele prevene virus SARS-CoV-2 (inklui variante Delta) labele hada’et-tutan maka’as liután ba fatin/rejiaun seluk.

Aproveita hato’o mós ba públiku katak fatin atu halo teste PCR maka hanesan tuir mai bainhira sente moras isin-manas, mear, kakorok moras ka sintoma seluk tan bele ba konsulta iha Sentru Saúde ne’ebé besik, atu bele halo swab bainhira atu husu autorizasaun esepsionál sai hosi no tama serka sanitária iha Dili bele ba halo teste swab iha Centro Convenções Dili (CCD). Bainhira sente katak sai kontaktu-besik ba ema ruma ne’ebé detetadu pozitivu ona, no seidauk hetan kontaktu hosi ekipa konjunta saúde bele liga ba númeru 119 atu organiza oinsá foti swab.

Husu kompriensaun no pasiénsia populasaun iha Timor-Leste laran tomak, atu kolabora no kontribui hodi vírus SARS-CoV-2, inkui variante Delta, labele hada’et ba ema barak liután. Favór hela iha uma, bainhira la presiza atu sai.

Apelu

Apela ba populasaun iha Dili laran no mós iha munisípiu sira seluk, atu aprezenta-aan iha fasilidade públiku saúde Sentru Saúde ka Ospitál ne’ebé besik, bainhira sente isin-manas, kakorok moras, inus-ben, mear, hodi bele hetan atendimentu hosi profisionál saúde sira.

Bainhira sedu liu hatene se virus ne’e kona ema-ida ka la’e, di’akliu, hodi nune’e bele hetan atendimentu sedu liu, no prevene tama ba iha situasaun ne’ebé hanaran sindroma insufisiénsia respiratória aguda (SIRA) ka susar/difisil atu dada-iis.

Ba populasaun iha Timor-Leste laran tomak, maske karik simu ona vasina, favór respeita nafatin regra prevensaun no ijiéne individuál, ne’ebé Governu hatu’ur ona, atu prevene moras COVID-19 da’et ba mai.

Regra sira-ne’e mak uza máskara, fase liman beibeik ho sabaun ka dezinfetante ruma, evita kose liman ba matan, inus ho ibun bainhira kumprimenta malu, la presiza ka’er liman no bensa-liman, rei-malu ka haku’ak malu, evita halibur malu barak, hamri’ik ka tuur do’ok hosi ema seluk mínimu metru ida ho balun.

Jornalista : Natalino Costa

Editór      : Cancio Ximenes

HAKEREK NO HATÁN

Please enter your comment!
Please enter your name here