Vise-Prezidente partidu FRETILIN, Francisco Miranda Branco. Imajen Tatoli/Francisco Sony

DILI, 04 setembru 2021 (TATOLI)—Vise-Prezidente Partidu Frente Revolusionária Timor-Leste Indpendente (FRETILIN, sigla portugés), Francisco Miranda Branco, deklara Partidu Fretilin seidauk bele realiza kongresu nasionál hodi hili estrutura foun ho razaun tanba pandemia COVID-19.

Tuir nia, partidu hanoin hela atu halo reuniaun dahuluk ho Komisaun Polítika Nasional (sigla portugés CPN), nune’e deside ajenda ba reuniaun Komite Sentrál Fretilin (CCF, sigla postugés), hafoin CCF mak sei deside hodi define ajenda ba kongresu.

Notísia Relevante: CCF seidauk iha desizaun halo Kongresu Nasionál

“Tuir loloos tinan ida-ne’e. Se laiha konfimentu obrigatoriu ne’e, bele iha ona konvokasaun enkontru komisaun polítiku nasional, nune’e komisaun polítika nasionál mak halo ajenda enkontru Komite Sental Fretilin nian hodi ba kongresu nian,” Francisco Miranda Branco, hateten liu-hosi konferénsia impresa iha ámbitu reflesaun loron 4 setembru 1999, ne’ebé hala’o iha salaun sede Komite Sentál Fretilin (sigla portugés CCF) Comoro, sábadu ne’e.

Francisco Miranda Branco hateten, se laiha pandemia COVID-19 mak tinan ne’e iha ona kongresu nasionál no atu hili estrutura foum ba partidu Fretilin.

“Laiha pandemia, oras ne’e daudauk ami halo hotu ona restruturasaun iha baze, hosi suku, postuu administrative no to’o iha munisípiu sira. Ida-ne’e la akontese tanba situasaun ida-ne’e la permite.” Xefe Bankada Fretilin ne’e hateten.

Hatan kona ba estatutu partidu Fretilin fó Prezidente no Sekretariu Jerál kontinua asumi kargu, nia hatán, bele mai tenke ho razaun forte tanba estatutu Fretilin mos dehan bele estende mandatu maibé tenke iha razaun forte.

Tuir loloos, Partidu Fretilin lideradu hosi Prezidente Partidu, Francisco Guterres ‘Lú–Olo’, no Sekretáriu Jerál Mari Bin Amude Alkatiri ne’e, ninia mandatu remata ona iha loron 03  fulan-setembru tinan 2021 ne’e.

 Jornalista : Natalino Costa

Editór         : Cancio Ximenes

HAKEREK NO HATÁN

Please enter your comment!
Please enter your name here