Adjuntu Sekretáriu Jerál FRETILIN, Flávio Maria Guterres da Silva. Imajen/Espesiál.

DILI, 15 jullu 2021 (TATOLI)—Komité Sentrál Frente Revolusionária Timor-Leste (CCF, sigla portugés) lideradu Sekretáriu Jerál Mari Alkatiri, seidauk iha desizaun atu halo Kongresu Nasionál tanba impaktu hosi propagasaun surtu COVID-19.

Adjuntu Sekretáriu Jerál FRETILIN, Flávio Maria Guterres da Silva, hateten tuir estatutu kada tinan lima tenke halo kongresu ka konferénsia nasionál, maibé reuniaun CCF nian hateten iha tempu oin mak atu organiza hodi halo preparasaun.

“Situasaun pandemia ne’e mak impede fali atividade sira-ne’e hotu. Tanba ne’e mak ami sei iha reuniaun komité sentrál FRETILIN atu hola desizaun ba kongresu ne’e. Ha’u ko’alia ona ho Sekretáriu Jerál hodi deside loron ba kongresu ne’e, maibé seidauk iha desizaun ruma,” nia informa ba Agência TATOLI, liuhosi telefónika, kinta ne’e.

Kongresu ne’e tenke realiza hodi hasoru eleisaun prezidensiál ne’ebé sei akontese iha 2022 no eleisaun parlamentár iha 2023.

FRETILIN nu’udar partidu polítiku ne’ebé defende independénsia no garante soberania nasionál hodi estabelese rejime demokrátiku direitu, sentradu iha justisa sosiál, iha toleránsia polítika no melloria vida Povu Maubere, ne’ebé konstitui ho frente ampla ba Timor-oan sira iha konstrusaun nasaun nian.

Molok realiza Kongresu Nasionál sei hala’o uluk konferénsia postu administrativu no sub-rejionál, munisipál, konferénsia munisipál no rejionál hafoin avansa ba kongresu nasionál.

Bazea estatutu FRETILIN artigu 62 (reuniaun), númeru 1 hateten kongresu nasionál reúne ordinariamente tinan-lima, liuhosi konvokasaun Komité Sentrál.

Númeru 2 hosi artigu ne’e hateten, kongresu bele konvoka extraordinariamente pur inisiativa Komité Sentrál ka desizaun metade hosi konferénsia munisipál rejionál ka dois terços (1/3) hosi konferénsia Postu Administrativu no sub-rejiaun atu delibera kona-ba kestaun urjente no importánsia fundamentál ba partidu.

Purtantu númeru 4 hosi artigu ne’e hateten, Komité Sentrál konvoka kongresu nasionál ho antesedénsia mínima loron 60 no aprova regulamentu no regimentu respetivu sira.

Nune’e mós Estatutu FRETILIN artigu 55 (Eleisaun ba Prezidente no Sekretáriu-Jerál FRETILIN), númeru 1 hateten, Prezidente no Sekretáriu-Jerál FRETILIN eleitu diretamente hosi militante partidu, ho lista únika fechada (taka) molok fulan-ida kongresu partidu nian.

Númeru 2 hosi artigu ne’e dehan, lista únika ne’e mai hosi proposta ho númeru mínimu militante 5.000 hosi sub-distritu 60, no mínimu militante 30 hosi sub-distritu.

Númeru 3 hosi artigu ne’e hatutan, Prezidente no Sekretáriu-Jerál eleitu liuhosi kongresu Partidu nian liuhosi únika ho proposta númeru mínimu 20% hosi delegadu sira ba iha kongresu ne’e.

Númeru 4 hateten, númeru tolu (3) iha artigu ne’e só aplika pur desizaun dois terços (2/3) hosi membru Komité Sentral.

Númeru 5 esplika, Prezidente no Sekretáriu-Jerál eleitu, hosi membru Komité Sentrál FRETILIN ho direitu própriu.

Númeru 6 hosi artigu ne’e, hateten Prezidente ne’e koadjuva, bainhira hala’o ezersísiu ba funsaun, hosi vise-prezidente, ne’ebé proposta entre membru CCF no eleitu hosi Komité Sentrál.

Númeru 7 hosi artigu ne’e fó-sai katak, Sekretáriu-Jerál koadjuva hosi adjuntu na’in-tolu, ne’ebé propoin hosi Sekretáriu-Jerál no eleitu iha reuniaun dahuluk Komité sentrál nian, ne’ebé atu akontese, kada semana depois kongresu.

Jornalista : Evaristo Soares Martins

Editór      : Cancio Ximenes  

HAKEREK NO HATÁN

Please enter your comment!
Please enter your name here