Reprezentante Embaixadór Uniaun Europeia iha Timor-Leste, Andrew Jacobs, troka nota entedimentu ho Sekertáriu Estadu Protesaun Sivíl, Joaquim José Gumão dos Reis Martins, hodi apoia ekipamentu konjuntu dapur nian ba vitima dezastre naturál, iha armazén provizóriu SEPS Bebora, sesta (03/09/21). Imajen Tatoli/Francisco Sony.

DILI, 03 setembru 2021 (TATOLI)—Uniaun Europeia (UE) ho Repúblika Austria, oferese sasán umanitáriu no ijiéne hanesan pakote konjunta dapur-nian hamutuk 500, pakote ijiéne 500 no jerry-can 2.000 ba Sekretária Estadu Protesaun Sivíl (SEPS).

Embaixadór UE iha Timor-Leste, Andrew Jacobs mak entrega simbólika apoiu hirak-ne’e ba Sekretáriu Estadu SEPS, Joaquim José Gusmão dos Reis Martins, iha armazén protesaun sivíl, Bebora, sesta ne’e.

Notísia relevante:SEPS fó apoiu nesesidade bázika ba vitima dezastre naturál

Tuir nota komunikadu ne’ebé Agência Tatoli asesu katak, ida-ne’e hanesan doasaun umanitária ida ne’ebé halo liuhosi Kruz Mean Austria nian no hosi mekanizmu Protesaun Sivíl Uniaun Europeia (UE), ne’ebé sei ajuda família vulnerável-sira afetadu maka’as, tanba udan boot, ne’ebé akontese iha territóriu laran tomak, husi loron 29 fulan marsu to’o loron 4 abríl, ne’ebé rezulta hosi inundasaun no rai-monu iha munisípiu 13 no RAEOA.

Kapitál Dili no área sira ne’ebé besik ho tasi, mak afetadu maka’as liu, família barak mak sei iha hela akomodasaun temporáriu no sei presiza nafatin apoiu.

Joaquim José Gusmão dos Reis Martins, lori Governu nia naran agradese ba apoiu refere.

“Agradese ba doasaun no rekoñese tulun ne’ebé Austria ho Uniaun Europeia fó ba povu timoroan, liuliu ba inundasaun boot ne’ebé akontese iha loron 4 abril, ne’ebé afeta família 30.748, no halo ema na’in 42 maka mate,”nia agradese.

Nune’e mós Embaixadór UE, Andrew Jacobs, hato’o solidariedade ba família vítima-sira ne’ebé afetadu hosi inundasaun.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here