Xefe família, Mateus Borges sente kontente ho apoiu nesesidade bázika hosi Sekretária Estadu Protesaun Sivíl (SEPS). Imajen Tatoli/Nelia Fernandes.

DILI26 agostu 2021 (TATOLI)—Sekretária Estadu Protesaun Sivíl (SEPS), fó apoiu nesesidade bázika ba vitima dezastre naturál ne’ebé akontese iha loron 4 abril tinan ne’e, iha Suku Becora, Aldeia Mota Ulun, Postu Administrativu Cristo Rei, Munisípiu Díli.

Koordenadór DirAsaun Nasionál Gestaun Risku Dezastre (DNGRD), Helio de Sousa S. PaIcheco, hateten daudaun ne’e protesaun sivil hamutuk ho Word Vision fó apoiu emerjénsia ba vitima inundasaun iha loron 4 abril tinan ne’e.

“Dadus ne’e ami hetan hosi autoridade lokál Suku Becora nian, ne’ebé hatama ba iha Protesaun Sivil. Dadus ne’e hetan aprovasaun hosi Diretór Jerál Protesaun Sivil, Diretór Nasionál Gestaun Risku Dezastre no Xefe Departamentu Emergência DNGRD nian, entaun ami mai fó apoiu ba itania maluk afetadu dezastre naturál iha aldeia Mota Ulun hamutuk ema 320 ne’e,” Helio de Sousa S. Paicheco hateten ba Agência Tatoli, iha Sede Suku Becora, Dili, kinta ne’e.

Apoiu emerjénsia ne’e fahe ba parte rua mak food (hahan) mak hanesan foos, mina, manu tolun, masin, no ida non food  (la’os hahan) ne’e mak hanesan sabaun, pepsodente, balde no seluk tán.

“Sasan nesesidade bázika, ida ne’e mak ita oferese ba itania maluk afetadu sira,” nia dehan.

SEPS hala’o distribuisaun ne’e durante loron tolu iha Aldeia Mota Ulun no hosi loron ne’e SEPS distribui ona ba xefe família hamutuk 260, no falta xefe família 60 mak simu sira-nia direitu.

“Ita hein nafatin, karik tempu sira mai, ita bele fó nafatin sirania direitu ida-ne’e,” nia dehan.

Xefe Suku Becora, Antonio da Silva Soares, hateten daudaun ne’e Sekretária Estadu Protesaun Sivíl mai fahe nesesidade bázika ba komunidade tanba Aldeia Mota Ulun afetadu tebe-tebes ba iha inundasaun ne’ebé akontese iha loron o4 fulan-abríl ne’e.

“Apoiu ne’e fahe loron rua ona no ohin ba loron tolu hodi fahe sasán nesesidade bázika ba populasaun sira. Komunidade ne’ebé atu simu hamutuk 320, ne’ebé lista ne’e mai hosi protesaun sivil nian, ne’ebé Xefe Aldeia Mota Ulun mak submete ba SEPS,” nia informa.

Nia hateten, apoiu nesesidade bázika ba inundasaun nian ne’e, hosi Aldeia Mota Ulun mak simu ikus tanbá aldeia seluk iha Suku Becora ne’e simu hotu ona.

“Suku Becora ne’e iha aldeia-10 no daudaun ne’e aldeia sia mak simu ona, no hela aldeia Mota Ulun mak simu ikus ba loron ohin ne’e,” nia dehan.

Aldeia sira iha Suku Becora, Postu Administrativu Cristo Rei, Munisípiu Dili hamutuk 10 mak hanesan Aldeia Auhun, Becuse Kra’ik, Becusse Sentru, Berbidu, Kakeu Laran, KlakFuik, Maukoko Mate, Darlau, no Mota Ulun.

Parte seluk, Xefe familia, Mateus Borges sente kontente ho apoiu ne’ebé Sekretária Estadu Protesaun Sivíl (SEPS) fó ba vitima dezastre naturais ne’e.

“Ami sente kontente no agradese ba Governu tanba Governu hanoin no fó mai ami sasán nesesidade bázika nian. Ne’ebé, ho apoiu ne’e ami simu ho liman rua, hodi uza ba han loro-loron nian,” nia hateten.

Jornalista : Nelia Fernandes

Editór       : Cancio Ximenes

HAKEREK NO HATÁN

Please enter your comment!
Please enter your name here