Membru PNTL hala’o hela pasa revista iha área Audian, hodi halo mós sosialisaun kona-bá regra konfinamentu obrigatoriu domisiliáriu ba komunidade, kinta (02/09/21). Imajen Tatoli/António Gonçalves.

DILI, 03 setembru 2021 (TATOLI)—Polísia Nasionál Timor-Leste (PNTL), liu hosi komandu munisípiu Dili, hala’o identifikasaun no investigasaun ba sidadaun na’in 50, tanba viola regra konfinamentru domisiliáriu jerál iha Dili.

Sidadaun hirak-ne’e iha na’in-haat mak ema estranjeiru nu’udár traballadór iha kompañia Brother Building no kompañia internasionál  Block Hesheng, iha área Fomentu II ho Manleuana, postu administrativu Dom Aleixo.

Notísia relevante:Konfinamentu domisiliáriu prejudika AHDMTL nia atividade

Sira kontra rezolusaun Governu, tanba iha 02 setembru lorokraik bainhira ekipa konjunta kompostu hosi komandu munisípiu, polísia eskuadra Dom Aleixo, unidade Tránzitu, forsa rezerva no parte investigasaun hala’o hela  patrullamentu, observa katak, sira hala’o  hela serbisu konstrusaun ka halo batako.

Komandante PNTL, munisípiu Dili, Superintendente Xefe, Henrique da Costa, hateten Polísia bolu sidadaun hirak-ne’e ba iha komandu, hodi halo identifikasaun.

“Sira kontra rezolusaun Governu, tanba hala’o fali atividade ne’ebé la’ós ba nesesidade urjente,” Henrique da Costa, hateten ba jornalista-sira iha kna’ar fatin, Caicoli, sesta ne’e.

Hafoin halo identifikasaun, polísia haruka fila  ba ida-idak nia fatin no fó-hanoin atu labele kontinua atividade durante konfinamentu domisiliáriu jerál.

Polísia mós sei kontinua hala’o prosesu kriminál ba Ministériu Públiku (MP), hodi aprezenta ba Tribunál ho krime dezobidiénsia.

Komandu munisípiu Dili koordena ona ho parte serbisu saúde atu halo mós teste swab ba sidadaun hirak-ne’e.

Konsellu Ministru prodús ona projetu rezolusaun Governu hodi impoin konfinamentu domisiliáriu jerál ba populasaun iha Dili, ne’ebé sita katak, iha área hotu-hotu munisípiu Dili-nian bandu transporte públiku, liuliu táxi, mikrolete no anguna atu halo sirkulasaun.

Alende ne’e, suspende selebrasaun relijioza koletiva no bandu mós atu halo serimónia fúnebre, ne’ebé envolve partisipasaun ema na’in-sanulu liu no sira ne’ebé partisipa serimónia ne’e rasik tenke uza máskara oin, hodi taka inus no ibun inklui mantein distánsia pelumenus metru ida ho ema seluk ne’ebé prezente iha serimónia ne’e.

Estabelesimentu komersiál, industriál, artezanál ka prestasaun servisu taka ba públiku, ho exesaun ba estabelesimentu-sira ne’ebé autoriza iha Rezolusaun Governu, liuliu estabelesimentu ne’ebé fa’an ai-han no sasán nesesidade bázika, eletrisidade, telekomunikasaun, prestasaun kuidadu médiku, farmásia, postu kombustível-nian, no instituisaun finanseira-sira.

Restaurante-sira bele fornese hahán, aplika rejime take away ka entrega iha uma de’it no estabelesimentu seluk  taka ba públiku bele dezenvolve ninia atividade liuhosi serbisu entrega ba uma de’it.

Vendedór ambulante ba sasán alimentár no sasán ba nesesidade bázika bele mantein sira-nia atividade, no merkadu Manleuana ho Taibessi bele mantein funsionamentu, hahú hosi tuku 06:00 to’o tuku 18:00 otl.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here