Diretór Jerál Administrasaun Finansa, MESSK, Hernânio Viterbo da Costa. Imagen Tatoli/Sérgio da Cruz.

BOBONARO, 03 setembru 2021 (TATOLI)—Ministériu Ensinu Superiór Siénsia no Kultura (MSESK), apoia fundus ba grupu kulturál hamutuk 11, iha munisípiu Bobonaro.

Objetivu hosi programa ne’e, atu hamoris ekonomia família, atividade kultura no hakbi’it grupu sira hadi’a uma lisan, hodi prezerva patrimóniu kulturál, oinsa valoriza no tane a’as nafatin obra sira ne’ebé beila-sira husik hela.

Notísia relevante:Uma-ka’in 6.196 iha Bobonaro seidauk asesu eletrisidade

Grupu ne’ebé hetan apoia ne’e ho kategoria mak hanesan, grupu uma lisan, tradisionál no grupu kontemporáneu.

“Ita fó ba grupu depende ba sira-nia atividade ekonómika no kulturál. Ita fó entre $1.500 to’o $3.500. Ba grupu uma lisan-sira ita fó $3.500 atu hakbit sira bele hadi’a sira-nia uma lisan,” Diretór Jerál Administrasaun Finansa, MESSK, Hernânio Viterbo da Costa, hateten  ba Jornalista-sira, iha salaun postu administrativu Maliana, sesta ne’e.

Kona-bá kritéria atu asesu ba subsídiu, grupu kulturál sira tenke submete proposta ba MESSK, maibé sasán kulturál-sira ne’ebé tau iha proposta tenke konstrui ho materiál tradisionál ne’ebé beila-sira utiliza. Kona-bá kategoria grupu kontemporénea bele uza sasan modernu balun ne’ebe nesesáriu.

“Ami mós sei halo fiskalizasaun, bainhira sira la konstrui tuir buat ne’ebé sira hatama iha proposta, ami sei devolve nota no ami sei haruka fo fila osan, tanba sira sosa sasan la tuir akordu ne’ebe ami halo ho objetivu finál atu prezerva patrimóniu kulturál ne’ebé beiala-sira uza iha tempu antigun,” nia afirma.

Reprezentante Grupu Kulturál, Domingos da Conceiçao Martins, agradese ba apoiu ne’e, tanba bele tulun hodi konstrui no prezerva fali sasán kulturál ne’ebé beiala-sira husik hela durante tempu naruk.

Grupu 11 ne’ebé asina akordu hodi asesu fundus, iha Grupu liman hetan ona apoia iha fulan kotuk, iha Dili, no ohin grupu neen ne’ebé foin asesu mak hanesan, Meligo ba oin no Loelaco Naroman hosi postu administrativu Cailaco.

Hosi postu administrativu Maliana mak hanesan, Tuba Malibaca, Conserva Cultural, Tambor Maliana no Feto kreativu soru tais.

Tuir dadus, iha tinan ne’e Governu liuhosi MESSK, apoia ona grupu kultura iha teritórriu laran hamutuk 104 mak hetan ona subsídiu.

Orsamentu ne’ebé prevee ba atividade hirak-ne’e hamutuk rihun $450, maibé posibilidade sei apoia tan ba brupu balun ne’ebé submete ona proposta, tanba orsamentu sei sufisiente.

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here