Edifísiu Serbisu Edukasaun Munisípiu Bobonaro. Imajen Tatoli/Sérgio da Cruz.

BOBONARO, 03 setembru 2021 (TATOLI)—Ministériu Edukasaun Juventude no Desportu, liuhosi karta despaixu númeru 46/GMEJD/XI/2021, kontinua suspende ensinu aprendizazen prezensiál hahú hosi loron 02 to’o 16 setembru, ba eskola privada no publiku iha postu administrativu Maliana no Cailaco, hodi prevene kontájiu COVID-19.

Despaixu ne’e la abranje to’o postu administrativu Atabae, Balibo, Bobonaro no Loloto’e, maibé aplika de’it iha postu administrativu rua ne’ebé konsideradu kazu COVID-19 aumenta kada loron.

Notísia relevante: Autoridade Bobonaro suspende ezame períodu dahuluk ba eskola haat

Diretór Edukasaun Munisípiu Bobonaro, Crispim Moniz, hateten desizaun ne’e bazeia ba pedidu ne’ebé sira aprezenta ba MEJD, tanba serbisu saúde Bobonaro identifika  iha fatin rua ma kazu COVID-19 aumenta makás.

“Despaixu ne’e ministu MEJD, Armindo Maia mak asina iha 01 setembru. Tanba ne’e maki ta suspende ensinu aprendizazen prezensiál durante semana rua,” Nia informa ba Jornalista-sira, iha salaun eis Kodim, suku Ritabou, sesta ne’e.

Evolusaun surtu COVID-19 iha munisípiu Bobonaro iha 02 setembru, kazu detetadu foun durante oras 24 ikus hamutuk 16, kazu rekoperadu 11, kazu ativu 110, komulativu rekoperadu 322, komulativu kazu konfirmadu 438 no óbitu neen.

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here