Ekipa Diseminasaun hosi MEJD, hala’o diseminasaun hodi introdús mata-dalan ba planu no Programa Konstrusaun Reabilitasaun Infraestrutura Edukasaun (PKRIE), ba diretór no koordenadór eskola-sira iha munisípiu Viqueque, iha salaun serbisu edukasaun munisípiu Viqueque, Beloi, sesta (03/09/21). Imajen Tatoli/ Vitorino Lopes da Costa.

VIQUEQUE, 03 setembru 2021 (TATOLI)—Ekipa Diseminasaun hosi Ministériu Edukasaun Joventude no Desportu (MEJD), hala’o diseminasaun hodi introdús kona-bá mata-dalan ba planu no Programa Konstrusaun Reabilitasaun Infraestrutura Edukasaun  (PKRIE)  ba diretór no koordenadór eskola-sira iha munisípiu Viqueque.

Objetivu hosi diseminasaun ne’e atu responsável eskola sira iha munisípiu ne’e, bele hatene kona-bá prosesu no lala’ok implemetasaun reabilitasaun ba eskola sanulu-resin-ualu (18), ne’ebé sai prioridade iha tinan fiskál 2021.

Notísia relevante:Sentru joventude Viqueque simu ona proposta hosi Grupu 40

“Ami halo tiha diseminasaun ba responsável eskola-sira hotu, nune’e sira ida-idak ba forma estrutura envolve mós  inan-aman no aprezenta fila-fali proposta mai serbisu edukasaun munisípiu no ba edukasaun nasionál, hodi aselera prosesu implementasaun iha tempu badak,” Diretór Nasionál Pré-Eskolar (DNPE), Domingos Belo Soares, hateten ba jornalista Agência Tatoli, iha salaun serbisu edukasaun munisípiu Viqueque, Beloi, sesta ne’e.

Diseminasaun ne’e, bazeia ba diploma ministeriál númeru 35/2021 hosi MEJD, ne’ebé sai hanesan mata-dalan hodi la’o tuir, nune’e labele hasoru dezafiu ruma iha implementasaun, tanba projetu ida-ne’e, komunidade mak sei ka’er rasik no la’ós kompañia.

Nune’e mós reprezentante administradór munisípiu Viqueque, Domingos de Carvalho, hateten orsamentu ne’ebé aloka mai munisípiu Viqueque ho montante  $1.163.795, sei labele kobre hotu projetu sira iha munisípiu Viqueque.

“Ho fundu ne’ebé ki’ik, ita labele kobre projetu-sira hosi edukasaun. Ha’u komprende kondisaun setór edukasaun nian presija ita atu hadi’a, maibé difísil tanba fundu ne’ebé la sufisiente hodi implementa,” nia esplika.

Diretór serbisu edukasaun munisípiu Viqueque, Emídio Amaral, agradese ba ekipa diseminasaun hosi MEJD ne’ebé fahe ona mata-dalan ne’e ba responsável eskola sanulu resin ualu ne’ebé atu hetan reabilitasaun.

Jornalista: Vitorino Lopes da Costa

Editór: Cipriano Colo

HAKEREK NO HATÁN

Please enter your comment!
Please enter your name here