Sentru Juventude Viqueque. Imajen Tatoli/Vitorino Lopes da Costa.

VIQUEQUE, 25 agostu 2021 (TATOLI)—Grupu joventude mai hosi suku 36 iha postu administrativu lima submete ona proposta ba Sentru Joventude Viqueque, hodi partisipa iha emprendorizmu sosiál ne’ebé sei motiva joven-sira hasa’e kreatividade.

“Daudaun-ne’e sei prosesu  hela, ami mós sei tun ba haree direta joven-sira nia atividade. Ha’u fiar katak, fundu ida-ne’e sei motiva joven-sira hodi hasa’e kreatividade no produsaun,” Diretór Sentru Joventude Viqueque, Luis Sarmento, hateten ba jornalista Agência Tatoli, kuarta ne’e.

Notísia relevante:SEII kapasita feto potensiál partidu polítiku Viqueque

Fundu emprendorizmu ne’e mai hosi Sekretária Estadu Joventude no Desportu (SEJD), ho totál rihun $59, atu lori fila joven-sira ba kampu serbisu, maski apoiu ne’ebé  fó ba grupu joven-sira ki’ik tebes.

Governu haree katak, depois de enfrenta situasaun COVID-19, joven sira mós barak la lakon serbisu, laiha rendimentu, nune’e ho orsamentu no programa ne’e hein katak, sei bele rekopera ekonomia joven-sira.

Apoiu ne’e, sei bazeia ba joven sira-nia kreatividade ne’ebé iha no sei haree joven-sira nia proposta ne’ebé sira hatuur iha planu ho área tarjetu mak hanesan, agrikultura, haki’ak ikan, hortikultura ne’ebé lori rendimentu.

Tuir tarjetu hosi Sentru Joventude Viqueue katak, sei simu proposta to’o  grupu 55, maibé agora daudaun foin mak simu hosi grupu 40.

Jornalista: Vitorino Lopes da Costa

Editór: Cipriano Colo

HAKEREK NO HATÁN

Please enter your comment!
Please enter your name here