Reuniaun KROP ba loron daruak, iha salaun Ministériu Finansa, Aitarak-laran, sesta (03/09). Imajen TATOLI/Egas Cristóvão

DILI, 03 agostu 2021 (TATOLI)--Governu liuhosi Komité Revizaun Orsamentu Polítika (KROP) hahú analiza programa no proposta orsamentál hosi ministériu no ajénsia outonómu sira hodi elabora projetu finál proposta lei Orsamentu Jerál Orsamentu (OJE) 2022. 

“KROP atu halo verfikasaun ba  alokasaun estratéjia rekursu ba submisaun orsamentál, ho forma atu atinje kompromisu no objetivu  ne’ebé iha dokumentu estratéjiku sira inklui analiza kapasidade ezekusaun planu ba tinan finseiru 2022,” refere nota ne’ebé Agência TATOLI, asesu, sesta ne’e.

Iha loron dahuluk, sesaun ne’ebé prezide hosi Vise Primeiru-Ministru, José Maria dos Reis, partisipa hosi Ministru Presidénsia Konsellu Ministru, Ministru Koordenadór Asuntu Ekonómiku, Ministru Finansa, Ministru Administrasaun Estatál, Ministru Edukasaun, Juventude no  Desportu, Ministru Transporte no Komunikasaun no Vice-Ministra Finansa.

Iha sesaun dahuluk ne’e, KROP analiza ona programa no  proposta orsamentál hosi Presidénsia Konsellu Ministru, Imprensa Nasionál Timor-Leste, Sekrataria Estadu Ambiente, Sekrétaria Estadu Kooperativa, Sekretaria Estadu Formasaun Profissionál no Empregu no  Ministériu Asuntu Kombatente Libertasaun Nasionál.

Reuniaun KROP ho ministériu no ajénsia autonómu hahu iha loron kinta (02/09) no ramata  iha loron 13 setembru.

Nune’e, iha loron 14 setembru komesa halo ajustamentu akordu ho desizaun KROP no rezultadu finál ne’ebé aprezenta iha loron 16 setembru.

Iha testu agregadu  valór OJE 2022 hamutuk biliaun $1.571,6,  ne’ebé aprova iha Konsellu Ministru iha loron jullu 2021, tuir análiza ne’ebé realiza hosi KROP no sei bele hetan sofre ajustamentu ho forma ne’ebé akumula hotu nesedidade hosi programa no atividade relevante hosi  ministériu  no institusaun Estadu ba tinan fiskál 2022.

Notísia relevante: Governu define kompozisaun KROP OJE 2022

Versaun finál projetu proposta lei OJE 2022 sei sujeita ba aprovasaun Konsellu Ministru no ikus mai submete ba Parlamentu Nasionál iha loron 1 outubru.

VIII Governu Konstitusionál define prioridade neen iha OJE 2022, hanesan dezenvolvimentu Kapitál umanu (edukasaun, formasaun profisionál no saúde), abitasaun no inklusaun  sosiál, setór produtivu (agrikultura no turizmu), ambiente no konetividade, dezenvovlimentu setór privadu,  dezenvolvimentu rurál no boa governasaun.

Jornalista : Florêncio Miranda Ximenes

Editora     : Julia Chatarina

HAKEREK NO HATÁN

Please enter your comment!
Please enter your name here