Reuniaun Konsellu Ministru, iha Palásiu Governu, kuarta (25/08). Imajen TATOLI/Egas Cristóvão

DILI, 25 agostu 2021 (TATOLI)–Governu liuhosi reuniaun Konsellu Ministru (KM) kuarta ne’e, aprova Projetu Rezolusaun Governu ne’ebé aprezenta hosi Ministru Finansa, Rui Augusto Gomes, kona-ba definisaun kompozisaun Komité Revizaun Orsamentu Polítika (KROP) ba Orsamentu Jerál Estadu (OJE) 2022. 

“Kabe ba Komité Revizaun Polítiku atu verifika alokasaun estratéjiku rekursu sira hosi submisaun orsamentál, atubele atinje kompromisu no objetivu sira ne’ebé hateten ona iha dokumentu estratéjiku no hodi análiza kapasidade atu ezekuta planu sira ba tinan finanseiru 2022,” Ministru Prezidénsia Konsellu Ministru, Fidelis Manuel Leite Magalhães, hateten, hafoin reuniaun ezekutivu, iha Palásiu Governu.

Notísia relevante: MF distribui pakote fiskál OJE 2022 no husu jestór kumpre kalendáriu

KROP ne’e sei prezide husi Primeiru-Ministru no kompostu mós hosi Vise Primeiru-Ministru, Ministru Prezidénsia Konsellu Ministru, Ministru Koordenadór Asuntu Ekonómiku, Ministru Finansa, Ministru Edukasaun, Juventude no Desportu, Ministru Transporte no Komunikasaun no Ministru Administrasaun Estatál.

Sorumutuk KROP sei partisipa hosi sekretária Estadu Igualdade no Inkluzaun, Sekretáriu estadu Juventude no Desportu no Komisária Direitu Labarik nian, ne’ebé hanesan observadór iha komisaun.

Tuir kalendáriu preparasaun proposta OJE 2022, KROP sei realiza iha loron 10 setembru no loron 17 setembru KM aprova Proposta Lei  OJE 2022.

Nune’e, loron 01 outubru, Proposta Lei  OJE 2022 entrega ba Parlamentu Nasionál no loron 30 novembru realiza audiénsia sira entre Governu no Parlamentu Nasionál.

Nune’e, iha fulan-dezembru realiza debate iha Parlamentu Nasionál kona-ba Proposta Lei  OJE 2022 no promulgasaun iha fulan hanesan.

Governu prevee proposta OJE 2022 ho biliaun $1,5, ho programa prioridade neen hanesan dezenvolvimentu kapitál umanu (edukasaun, formasaun profisionál no saúde), abitasaun no inkluzaun sosiál, setór produtivu sira hanesan agrikultura, turizmu, ambiente no konetividade, dezenvolvimentu setór privadu no kooperativa, dezenvolvimentu no governasaun

Jornalista : Antónia Gusmão

Editora     : Julia Chatarina

HAKEREK NO HATÁN

Please enter your comment!
Please enter your name here