Administradór postu administrativu na'in-ha'at ne’ebé halo hela juramentu, iha serimónia pose ne’ebé hala’o iha Eis Kodim, Maliana, sesta (03/09/21). Imagen Tatoli/Sérgio da Cruz.

BOBONARO, 03 setembru 2021(TATOLI)—Ministru Administrasaun Estatal (MAE), Miguel Perreira, delega Prezidente Autoridade munisipál Bobonaro, Ernesto de Oliveira Barreto, hodi fó pose ba Administradór Postu Administrativu, Atabae, Bobonaro, Cailaco no Maliana, ba mandatu tinan haat.

Administradór emposadu na’ain-haat ne’e mak hanesan, Lino Tavares ho númeru referénsia PPC/19/2021 nu’udár administradór postu administrativu Atabae, Juvinal Leto Mau dos Santos ho númeru referénsia PPC/20/2021 nu’udár administradór postu Bobonaro, Alfredo Meta Dau ho númeru referénsia PPC/21/2021 nu’udár administradór postu administrativu Cailaco, no Tomas Laca-Loe ho númeru referénsia PPC/22/2021 nu’udár administradór postu administrativu Maliana Vila.

Notísia relevante:Aban, administradór na’in-24 sei simu pose

Prezidente Autoridade Munispál Bobonaro, Ernesto de Oliveira Barreto, husu ba administradór foun na’in-ha’at, atu presta serbisu ho responsablidade no promete sei akompaña másimu, sira nia dezempeñamentu durante mandatu tinan ha’at.

“Ha’u fiar katak, imi sei konkretiza planu hirak ne’ebé prepara ona hodi serbí interese públiku,” Ernesto Bareto hato’o iha diskursu serimónia pose ne’ebá hala’o iha salaun eis Kodim, sesta ne’e.

Administradór emposadu Atabae, Lino Tavares substitui Pedro Laca Buti, administradór Bobonaro, Juvinal Leto Mau dos Santos substitui, Rui Bere Barros, administradór Cailaco Alfredo Meta Dao, substitui Alfredo Moniz, no administradór Maliana Tomas Laca Loe, substitui Anibal Ferreira.

Iha fatin hanesan administradór foun, postu administrarativu Caliaco, Alfredo Meta Dao, kompromete sei konsolida komunidade, autoridade lokál, veteranu, intelektuál, tanba liuhosi dalan ida-ne’e mak bele kria pas no establidade iha komunidade nia leet.

Administradór Cailaco sesante, Alfredo Moniz, hateten maski durante mandatu la halo buat barak, maibé ba oin sei kontinua koopera ho administradór foun no husu atu ukun ho sentidu Estadu, nune’e bele hadi’a povu nia moris.

Prosesu selesaun pur méritu tuir artigu 19 lei númeru 7/2019 kriasaun CFP artigu 63 númeru 2 no dekretu lei 54/2020 loron 28 outubru, alterasaun daruak dekretu lei númeru 3/2016 loron 16 marsu, ne’ebe aprova estatutu administrasaun munisipais, autotidade munisipál no grupu tékniku interministeriál atu desentraliza munisipál ne’ebé previstu katak, administradór postu nomeadu hosi CFP, hodi dezempeña funsaun sira iha komisaun serbisu ho durasaun tinan-ha’at, iha sekuénsia liuhosi prosedimentu previstu selesaun pur méritu mediante proposta ne’ebé aprezenta hosi membru Governu ne’ebé responsável administrasaun estatál.

Liu hosi ida ne’e maka, iha tinan ne’e halo selesaun pur méritu ba kargu administradór postu administrativu ba faze primeiru, rezultadu mak ohin halo aktu solene tomada de pose no sei kontinua loke vaga 31 iha tinan ida-ne’e.

CFP mós fó-sai karta, 4367/2021/ CFP konsidera nota númeru 71/DNFPTMFT loron 16 agostu kona-bá rezultadu prosesu selesaun kabe ba kompetensia CFP.

Tuir artigu 38 dekretu lei 22/2019 loron 8 juñu primeira alterasaun kona-ba rejime konkursu, rekrutamentu selesaun no promosaun ba pesoál administrasaun públika tuir rejimentu interna ne’ebé depega prezidente ou subtitutu legál podér ba CFP atu promulga rezultadu konkursu públiku interna.

Nune’e, prezidente CFP uza nia kompeténsia ne’ebé previstu iha lei númeru 7/2019 loron 15 jullu konjuga ba desizaun anteriór, sita no deside rezultadu selesaun pur méritu no nomeia administradór foun.

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here