Administradór Munisípiu Manufahi Arantes Isaac Sarmento fó pose ba Adminitradór foun Postu Administrativu Same, Adelino da Costa de Araújo Imajen/Espesiál

DILI, 03 setembru 2021 (TATOLI)-Ministru Administrasaun Estatál (MAE), Miguel Pereira de Carvalho, delega Administradór Munisípiu Manufahi, Arantes Isaac Sarmento, sesta ne’e, fó pose ba Adelino da Costa de Araújo nu’udar administradór foun ba postu Same ho mandatu tinan-haat (2021-2025).

Notísia Relevante : Administradór Suai Vila ho Zumalai simu pose

Arantes Isaac Sarmento informa ba Agência Tatoli liuhosi telefónika hateten, katak iha toma pose refere liuhosi karta MAE, ne’ebé nia parte lee sai katak Ministru husu Administradór Same durante nia mandatu tenke servisu ho responsabilidade tanba MAE iha konviksaun katak Administradór foun bele hala’o servisu di’ak tanba liuhosi selesaun méritu kompete ho kandidatu sira seluk, rezultadu finál Adelino da Costa de Araújo mak hetan klasifikadu dahuluk iha vaga refere.

Tanba ko’alia kona-ba selesaun pur-méritu ba kargu administradór postu administrativu sira foin dahuluk halo ba administradór sira tuir sistema dijitalizasaun ka komputadór baze teks ne’ebé aplika iha administrasaun públika iha Timor-Leste.

Durante prosesu selesaun lidera hosi Vise-Ministru Administrasaun Estatál, Lino de Jesus Torrezão, hanesan prezide juri hodi apoiu Komisaun Funsaun Públika (CFP-sigla portugés) apoiu tomak hahú hosi prosesu selesaun pur méritu hosi fevereiru to’o meadu agostu 2021.

Bazeia ba dekretu lei númeru 54/2020 alterasaun daruak númeru 3/2016, ne’ebé aprova estatutu Administrasaun Munisipál iha artigu 7 katak administradór postu hanesan titulár kargu xefia administradór ba prezidente munisipál ka sub delegadu hosi sekretáriu munisipál ka diretór servisu munisipál sira hodi jere servisu lokál iha jestaun Administrasaun finansa, planeamentu no dezenvolvimentu lokál komunitária ne’ebé previstu iha diploma ministerial númeru 49/2016.

Administradór Adelino da Costa de Araújo, hanesan administradór foun ba Postu Administrativu Same prontu asegura planu polítika Governu nian liuhosi administrasaun munisípiu. Aleinde ida ne’e kontinua nafatin implementa no monitoriza di’ak liután programa Mõa de Obra, no halo koordenasaun servisu ho entidade sira iha postu administrative Same hodi haree povu nia moris.

Jornalista   : Arminda Fonseca

Editór         : Francisco Simões

HAKEREK NO HATÁN

Please enter your comment!
Please enter your name here