Administradór Munisípiu Covalima, Francisco de Andrade, fó posse ba Administradór Postu Administrativu Suai Vila, Luzinho do Rego ho Administradór Postu Administrativu Zumalai, Rui dos Santos, sesta ne’e, iha Covalim. Imajen Tatoli/Celestina Teles

COVALIMA, 03 setembru 2021 (TATOLI)-Ministru Administrasaun Estatál (MAE), Miguel de Carvalho delega kompeténsia ba Administradór Munisípiu Covalima, Francisco de Andrade, hodi fó posse ba Administradór Postu Administrativu Suai Vila, Luzinho do Rego ho Administradór Postu Administrativu Zumalai, Rui dos Santos, sesta ne’e, iha Covalima.

“Kargu  ne’ebé ita-boot sira simu la’ós atu sai liurai ba povu,  maibé sai servidór no atan ba povu , la’ós sai oportunidade maibé responsabilidade  hodi serve povu hodi labele haree ba kór no servisu tenke onestu no transparénsia,” Administradór Munisípiu Covalima, Francisco de Andrade hateten iha nia diskursu.

Maske sai nu’udar administradór sei hasoru difikuldade maibé ne’e sei la sai sasukat atu halakon vontade servisu no serve Estadu.

Serimónia toma de posse ba Administradór Suai Vila no Zumalai bazeia ba dekretu lei númeru 3/2016 segunda alterasaun 54/2015 sei simu mandatu durante tinan haat; 2021-2025.

Administradór  Postu Administrativu Suai Vila, Luzinho do Rego, promete sei servisu ho responsabilidade atu serve Estadu no povu.

“Administradór sesante Suai Vila no Zumalai, ami louva no agradese servisu ne’ebé ita boot sira hala’o durante ne’e. Ami sei hala’o di’ak liután tuir ami nia kbi’it,” Luzinho hateten.

Jornalista   : Celestina Teles

Editór         : Francisco Simões

HAKEREK NO HATÁN

Please enter your comment!
Please enter your name here