Kontrusaun Uma Kbiit Laek iha aldeia Noe-Ninen, suku Cunha, sub-rejiaun Pante Pante Makasar. Imajen Tatoli/Abílio Elo Nini.

OÉ-CUSSE, 02 setembru 2021 (TATOLI)—Diretór Programa Nasionál Dezenvolvimentu Suku (PNDS) Rejiaun Administrativa Espesiál Oé-Cusse Ambeno (RAEOA), Sebastião Tanesi, informa ekipa PNDS foin konstrui dahuluk “Uma Kbiit Laek” unidade rua iha aldeia Noe-Ninen, Suku Cunha, sub-rejiaun Pante Makasar ne’e, atinje ona 22,52%

Notísia Relevante: Governu lansa primeira pedra Uma Kbiit Laek iha RAEOA

“Uma Kbiit Laek iha Oé-Cusse hamutuk unidade 36 maibé daudaun ne’e ami konstrui ona unidade-rua iha suku Cunha ho nia progresu fiziku atinje ona 22,52%. Ida-ne’e, la involve uma 34 ne’ebé kobre ba suku 17, tanba ami foin implementa no konstrui dahuluk iha aldeia Noe-Ninen. Tuir planu sei finaliza iha novembru tinan ne’e, tanba durasaun fulan tolu de’it,” Sebastião Tanesi ba Ajênsia Tatoli iha Palaban, Oé-Cusse, kinta ne’e

Uma 34 ne’ebé kobre iha suku 17 ne’e seidauk realiza tanba sei iha faze preparasan no iha tempu badak sei implementa iha suku sira seluk, nune’e programa Uma Kbiit Laek bele finliza iha tinan ne’e tuir VIII Governu konstitusionál nia kompromisu.

Tuir nia, orsamentu ba Uma Kbiit Laek unidade 36 ne’e lahanesan tanba balun ho kustu rihun $17 no balu rihun $14 tuir medida uma nian.

Kontrusaun Uma Kbiit Laek iha aldeia Noe-Ninen, suku Cunha, sub-rejiaun Pante Pante Makasar. Imajen Tatoli/Abílio Elo Nini.

Nu’udár responsavél másimu ba programa Uma Kbiit Laek iha RAEOA, nia apela ba lider komunitáriu sira iha suku no no aldeia atu bele enkoraja benefisiáriu sira ho pasiensia hodi hein, tanba ekipa PNDS hala’o programa UKL ne’e tuir matadalan programa PNDS nian hodi realiza fazeadamente, nune’e labele akontese fallansu iha implementasaun obra sira.

“Governu estabelese UKL iha tinan ida-ne’e, ne’ebé ita hein prosesu etapa por etapa tuir matadalan PNDS nian maka ita sei la’o tuir. Realizasaun obra hirak ne’e kontribui mós hosi Ekipa Jestaun Suku (EJS). Ita espera bele realiza iha tempu badak, tanba daudaun ne’e mós iha sub-rejiaun balun aplika hela serka sanitaria,” nia dehan.

Benefisiáriu programa Uma Kbiit Laek hosi aldeia Noe-Ninen, Suku Cunha, Berta Quefi, hato’o agradesimentu ba VIII Governu Konstitusionál tanba bele ajuda sira hodi konstrui uma luxu ba familia ne’ebé moris ho situasaun ki’ak.

“Ha’u hetan apoiu, Governu agora halo ona ha’u-nia uma. Ha’u sente kontente tanba Governu ida-ne’e hanoin ami povu kbiit laek tanba ami nia kondisaun moris mak hanesan ne’e de’it, maibé Governu halo programa di’ak ajuda ami liuhosi halo uma di’ak sira-ne’e,” nia dehan.

Maske programa Uma Kbiit Laek seidauk realiza iha sub-rejiaun Oésilo, Pasabe no Nitibe, maibé jestór sub-rejiaun Nitibe Manuel Tolan realiza ona enkontru preparasaun ho benefisiáriu sira molok konstrui Uma Kbiit Laek ba ema kbiit laek sira iha Nitibe.

“Suku lima iha sub-rejiaun Nitibe hetan uma 10, entaun ami hala’o ona enkontru ho benefisiáriu sira iha fulan agostu. Ami hein de’it bainhira mak PNDS sira mai konstrui Uma Kbiit Laek ne’e, ami hamutuk ho Ekipa Jestaun Suku no Joventude suku sira preparadu ona,” nia dehan.

Jornalista : Abílio Elo Nini

Editór       : Cancio Ximenes

HAKEREK NO HATÁN

Please enter your comment!
Please enter your name here