Ministru Administrasaun Estatál, akompaña hosi Prezidente Autoridade RAEOA, ohin, ofisialmente lansa primeiru pedra 'Uma Kbiit Laek' iha RAEOA. Imajen TATOLI/Abilio Elo

OÉ-CUSSE, 05 agostu 2021 (TATOLI)-Governu Konstitusionál liuhosi Ministériu Administrasaun Estatál (MAE), kinta ne’e, ofisiálmente lansa primeira pedra ba projetu ‘Uma Kbiit Laek’ iha Rejiaun Administrativa Espesiál Oé-Cusse Ambenu (RAEOA) ba benefisiáriu 36

“VIII governu konstitusionál hakarak hadi’a povu nia moris liuhosi halo uma ba povu kbiit laek sira, tanba governu sentrál hanoin katak importante teb-tebes atu povu moris ho dignu iha nasaun Timor-Leste”, Ministru Administrasaun Estatal, Miguel Pereira de Carvalho, hateten iha seremonia lansa primeira pedra iha aldeia Noe-Ninen, suku Cunha, sub-rejiaun Pante Makasar.

Governante ne’e fundamenta, governu halo de’it uma ba povu kbiit laek hamutuk 1.254 iha 2021 no iha RAEOA liuhosi Programa Nasionál Dezenvolvimentu Suku maka sei halo de’it uma ba benefisiáriu hamutuk 36 ba suku 18. Maibé ida ne’e hanesan inisiu tinan ne’e, bainhira programa ne’e fó benefisiu direta ba povu, sempre iha nia kontinuidade ba tempu tuir mai.

Ministru agradese ba ekipa avaliasaun sira hosi lider lokál, juventude ho parserio sira, tanba konsege identifika ona kbiit laek iha suku no aldeia sira ne’ebé merese atu hetan apoia ne’e.

“Ha’u kontente teb-tebes lori governu sentrál nia naran agradese, tanba haree katak ita boot sira prioritiza duni ba ema sira ne’ebé merese duni atu hetan uma sira ne’e”, nia akresenta.

Prezidente Autoridade RAEOA, Arsenio Paixão Bano, enkoraza ekipa téknika hosi PNDS, lider lokál kontinua halo sepervizaun, nune’e garante kualidade obra.

“Ha’u haree ona Uma Kbiit Laek iha munisipiu seluk, projetu ne’e di’ak tebes ho kualidade, ne’ebé ha’u husu tékniku sira iha PNDS ho suku sira haree projetu ne’e harii ho kualidade, xefe suku sira tenki halo fiskalizasaun supervizaun, tanba ne’e ha’u sei iha ne’e kada semana, tanba ne’e ha’u nia servisu”, nia fó hanoin.

Notísia relevante: Governu hahú ona konstrui “Uma Kbiit Laek” 1.254 iha territóriu nasionál

Jornalista       : Abilio Elo Nini

Editór             : Cancio Ximenes

HAKEREK NO HATÁN

Please enter your comment!
Please enter your name here