Padre Martinho Germando da Silva Gusmão. Imajen Tatoli/Evaristo Soares Martins.

DILI, 01 setembru 2021 (TATOLI)—Hafoin Bispu Dioseze Baucau, Dom Basílio do Nascimento suspende Padre Martinho Gusmão hosi knaar saserdósiu maibé ho suspensaun ne’e bele fó biban ba nia prepara-aan atu kandidata-aan ba Prezidente Repúblika períodu 2022-2027 hodi kompete iha eleisaun prezidensiál.

Notísia Relevante: Don Basílio suspende Padre Martinho Gusmão hosi knaar Saserdósiu

Padre Martinho Gusmão haktuir, suspensaun ne’e la’ós mosu derrepente de’it maibé dezde fulan-janeiru 2020 liubá, nia hato’o ona karta ba Santo Padre atu konsidera tanba prosesu tomak la’o dezde 2016.

Tanba Padre Martinho Gusmão mak husu uluk ba Bispu no ba Santo Padre atu suspente nia hosi atividade Uma-kreda nian tanba durante ne’e nia ho Bispu Dioseze Baucau hala’o diálogu ne’ebé kleur tebes, nune’e iha fulan-fevereiru liubá prepara-aan, no to’o ikus mai 20 agostu 2021 liubá Bispu ‘aseita’ renunsia voluntária ne’e.

Padre Martinho Germando da Silva Gusmão. Imajen Tatoli/Evaristo Soares Martins.

“Tuir Igereja Katólika bainhira Amu Lulik ida husu renunsia voluntária entaun Santo Padre ho Bispu akompaña atu prodús desizaun ida di’akliu. Tanba desizaun ne’e la’ós haketak malu maibé fó dalan atu moris ho dalan seluk. Desizaun ne’e sai lalais tanba iha mídia no partidu balun ko’alia ona ba Bispu katak ha’u sai kandidatu ba Prezidente Repúblika, entaun Bispu iha obrigasaun halo diálogu ho ha’u no bispu aseita. Konsekuénsia ne’e fásil tanba suspensaun ne’e fó ba ha’u atu bele kandidata aan ba Prezidente Repúblika,” Padre Martinho Gusmão, informa ba jornalista sira, iha Metiaut, Dili, kuarta ne’e.

Maske bispu aseita renunsia voluntária ne’e no suspende Padre Martinho Gusmão hosi knaar saserdósiu nian maibé nia sai padre ba nafatin.  

“Ha’u amu lulik) nafatin. Ezemplu, Taur Matan Ruak Jenerál nafatin maibé laiha kuartél, ha’u mós Amu Lulik nafatin maibé la halo atividade iha Igreja. Agora suspensaun ne’e hatudu katak Bispu husik ha’u atu labele halo ona kna’ar iha Igreja (labele halo misa no labele fó konfesa ba sarani sira) maibé fora hosi ne’e ha’u bele halo, a não ser demisaun,” nia dehan.

Demisaun ne’e Santo Padre hatán, nia hateten, se nia eleitu sai Prezidente Repúblika, nia bele buka Primeira Dama no se demisaun ne’e Amu Papa sei dada naruk entaun durante tempu ne’e laiha ida mak dehan Primeira Dama.

Padre Martinho Gusmão funfamenta, Bispu nia desizaun suspensaun ne’e signifika la halo ona ministériu saserdotál entaun iha Direitu Kanóniku ne’e dehan ministériu sivíl no ninia ministériu saserdotál ne’e suspende ona signifika ninia ministériu sivíl ne’e livre ona.

“Bainhira iha desizaun demisaun hosi Estadu Klerikál, signifika se ha’u hakarak duni atu iha Primeira Dama bazea Amu Papa nia karta. Ida de’it mak ha’u labele kontra atu simu sakramentu kaben tanba ha’u jura ba Maromak atu labele hola feto. Ne’eduni, ha’u labele jura tán ba Maromak atu hola feto,” nia dehan.

“Atu konkorda ha’u ba Prezidente Repúblika ka lae ne’e Bispu no Amu Papa lian ida de’it ona, Igreja fó nia ema ka sakrifíka nia ema serbí nasaun, povu no sarani sira hotu,” nia subliña.

Preparasaun ba eleisaun prezidensiál ne’e, Padre Martinho Gusmão hetan apoia forsa polítika hosi militante Partidu Demokrátiku balun, PUDD maioria no partidu politiku sira seluk.

“Agora, CNRT nia apoia ba ha’u ne’e, sira dehan sei hein kongresu mak deside. Ha’’u deside avansa ho kandidadtu independente,” nia dehan.

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here