Padre Martinho G. da Silva Gusmão.

BAUCAU, 31 agostu 2021 (TATOLI)—Bispu Dioseze Baucau, Don Basílio do Nascimento, liuhosi karta suspensaun Ministériu Saserdotal, suspende Padre Martinho Germano da Silva Gusmão hosi knaar Saserdósiu.

“Hatán ba Padre Martinho Germano da Silva Gusmão nia vontade no desizaun, bainhira prosesu kanóniku sei la’o hela, ha’u nu’udar Bispu Dioseze Baucau, dekreta suspensaun Ministériu Saserdotál, katak hahú loron 20 agostu 2021 ba oin, hapara Padre ne’e nia atividade sira hotu ne’ebé sakramentu orden haraik ba nia atu hala’o iha Uma-kreda,” refere nota hosi Dioseze Baucau, Kámara Ekleziástika, ne’ebé Agéncia TATOLI asesu, tersa ne’e.

Karta ne’e bazeia ba karta ne’ebé Padre Martinho Gusmão haruka ba Bispu Diosezanu iha loron 25 janeiru 2021, hodi husu renunsia ba Ministériu Saserdotál katak hapara nia knaar nu’udar Nai-lulik.

“Bispu Dioseze Baucau informa ba membru hotu, kreda katólika iha Timor-Leste katak durante tempu naruk ne’ebé Padre Martinho Gusmão kestiona, refleta, rona, reza no deside kona-ba nia vida no nia Knaar nu’udar Nai-lulik kreda latólika, ho konxiénsia limpa no serena,” subliña.

Nune’e mós, iha Loron 04 fevereiru 2021, Padre Martinho Gusmão haruka karta ba Santu Padre hodi husu demisaun Estadu Kredikál, atu la moris ona tuir estatutu Nai-lulik.

“Kona-ba demisaun Estadu Kredikál, katak Padre Martinho Gusmão la moris ona nu’udar Nai-lulik ne’ebé simu sakramentu orden, Sé Apostólika, Amu Papa de’it mak sei demite Padre Martinho Gusmão hosi nia Estadu Kredikál,” nota ne’e esplika.

Jornalista : Natalino Belo

Editora      : Julia Chatarina

HAKEREK NO HATÁN

Please enter your comment!
Please enter your name here