Primeiru-Ministru, Taur Matan Ruak ho membru Governu relevante debate kona-ba pedidu estensaun ba deklarasaun Estadu Emerjénsia hosi Prezidente Repúblika, iha sala plenária Parlamentu Nasionál, tersa (24/08). Imajen TATOLI/Egas Cristóvão

DILI, 24 agostu 2021 (TATOLI)–Primeiru-Ministru (PM) no Ministru Interiór, Taur Matan Ruak, hakarak koloka FALINTIL-Forsa Defeza Timor-Leste (F-FDTL) iha fronteira terrestre hodi tau-matan ba pasajen ilegál.

“Ha’u konkorda Forsa Armada tenke filafali ba fronteira, uluk ha’u kuandu Jenerál, iha tempu Nasaun Unida, sira husu atu Forsa Armada mak bá maibé ha’u hateten katak labele tanba ema sira agora iha Forsa Armada foin funu hotu mak mai, ha’u tauk ba provoka malu iha ne’ebá hodi tiru malu tanba ne’e ha’u husu Nasaun Unida tau Polísia,” PM haktuir iha ámbitu diskusaun renovasaun Estadu Emerjénsia ba dala-XVII iha sala plenária Parlamentu Nasionál, tersa ne’e.

Notísia relevante: Indonézia deporta tan timoroan 164, na’in-tolu iha síntoma COVID-19

Nune’e, momentu ne’ebá PM Taur (ne’ebé hanesan Jenerál) negosia ho komandante Udayana Bali, momentu ne’ebá William da Costa, hodi haree posibilidade atubele dezmilitariza fronteira.

“Maibé Indonézia dehan lae, tanba sé Timór hakarak dezmilitariza bele tanba Indonézia nian própriu Konstituisaun mandata Forsa Armada sira atu halo seguransa, tanba ne’e ami labele entaun ita-nia mantein Polísia,” nia akresenta.

Maski nune’e, Polísia Nasionál Timor-Leste (PNTL) liuhosi Unidade Patrullamentu Fronteira (UPF) halo esforsu boot hodi kontrola fronteira hodi tau-matan ba pasajen ilegál.

“Ita hotu hanoin took, besik tinan 20 ema 300-resin de’it troka malu iha ne’ebá, ita labele ezije liu buat ne’ebé sira labele halo. Ita agradese sira-nia esforsu maibé iha mós elementu balun halo buat ne’e sai negósiu. Ha’u konsulta ho Prezidente Repúblika no fó ona instrusaun ba Vise Ministru Interiór no Ministru Defeza atu halo diskusaun tau Forsa Armada iha fronteira la’ós tinan ida-ne’e, entaun tinan oin, maibé antes ha’u-nia mandatu ha’u hakarak Forsa Armada iha fronteira,” PM subliña.

PM konsidera sidadaun ne’ebé ilegalmente hakat fronteira terrestre nu’udar krime organizadu.  

“Kestaun kontrolu fronteira no pasajen ilegál, ha’u bele hateten katak 98% hanesan krime organizadu. Iha ita-nia elementu hanesan Polísia balun ha’u haruka kaer, veteranu balun ha’u haruka kaer, situasaun ne’e la’ós foin akontese maibé akontese tempu naruk ona no daudaun ne’e ita iha ekipa serbisu ho Indonézia, nune’e bele tama-sai uma kaer ema,” nia informa.

Ba kestaun ne’e, Xefe Governu dehan, Timor-Leste iha kooperasaun di’ak ho Embaixadór Indonézia akreditadu iha Timór no autoridade iha nasaun viziñu hodi deporta timor-oan sira ne’ebé hakat ilegál.

Jornalista : Antónia Gusmão

Editora    : Julia Chatarina

HAKEREK NO HATÁN

Please enter your comment!
Please enter your name here