Unidade Polísia Marítima (UPM), detein sidadaun na’in-lima hala’o transaksaun ilegál sigaru joker, iha área Cristo Rei, Dili, tersa (31/08). Imajen Tatoli/Francisco Sony.

DILI, 31 agostu 2021 (TATOLI)—Polísia Nasionál Timor-Leste (PNTL), liuhosi Unidade Polísia Marítima (UPM), detein ema na’in-lima tanba hala’o transaksaun sigarru ilegál, iha área tasi-ibun Dolok-oan Cristo Rei, Dili.

Ema na’in-lima ne’e kompostu hosi sidadaun Indonézia na’in-ida no na’in-haat seluk Timoroan, iha tuku 02:49 madrugada, bainhira hala’o patrullamentu no iha prosesu ne’e envolve ema na’in-hitu, maibé na’in-rua halai lakon.

Notísia relevante:PNTL detein tan membru GAM na’in-24 hakat ilegál fronteira

Iha identifikasaun hetan katak, sidadaun Indonézia ne’e transporta sigarru mai hosi área Atapupo, la liu hosi autoridade kompetente hodi selu taxa ba Estadu Timor-Leste.

Polísia mós halo apreensaun ba objetu hanesan ró ki’ik ida, sigarru joker kaixa 40, karreta Carry ida no motorizada ida.

Portavóz, Komandu Jerál PNTL, Superintendente Xefe, Arnaldo Araújo, hateten daudaun-ne’e suspeitu sira iha hela UPM, hodi hein prosesu investigasaun tuir-mai atu bele aprezenta ba Ministériu Públiku (MP), nune’e loke prosesu legál.

“Ema sira-ne’e hala’o transaksaun sasán ilegál saihosi Apatupo-Indonézia iha tuku 18:00 lorokraik, tama iha Dolok-oan, Cristo Rei mak ita detein,” Arnaldo Araújo, hateten ba jornalista-sira liuhosi konferénsia imprensa iha Komandu Jerál PNTL, Caicoli, tersa ne’e.

Polísia sei koordena ho parte saúde, atu bele halo identifikasaun no sei submete ba kuarentena no sei kontinua buka-tuir suspeitu na’in-rua seluk, ne’ebé dezvia hosi autoridade seguransa.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here