Abitante ne’ebé kumpri ona loron 14 iha kuarentena, Tasi-tolu fila hikas ba hamutuk ho família, (30/04/20). Imajen/TATOLI.

DILI, 31 agostu 2021 (TATOLI)—Ministériu Saúde (MS), sei kontrata tán otél balun iha Dili, hodi sai fatin izolamentu, bainhira númeru kazu pozitivu COVID-19 aumenta.

“Tanba ne’e mak ami tenke diskute folin. Ita enfrenta hela situasaun pandemia  ida-ne’e nune’e husu ba kompañia -sira atu bele oforese folin ne’ebé razaável,” Ministra Saúde, Odete Maria Freitas Belo, hateten iha salaun Palásiu das Sinzas, Caicoli, tersa ne’e.

Notísia relevante:Governu tenke aumenta fasilidade ba Sala Izolamentu

MS mós hatene  katak, kompañia-sira presiza osan atu halo manutensaun ba fatin ne’ebé mak  iha, maibé Ministra ne’e fó-hanoin  atu labele hanoin hodi hetan lukru ne’ebé mak boot.

Iha fatin hanesan, Diretór Jerál Serbisu Kooperativu Ministériu Saúde, Marcelo Amaral, hateten númeru kazu COVID-19 daudaun ne’e sa’e maka’as, tanba ne’e Governu esplora hela fatin sira iha Dili no munisípiu hodi prepara fatin izolamentu ba kazu moderadu no grave.

“Ita iha probelma fatin ladún barak, no ita aproxima hela ho fatin privadu balun ne’ebé kompañia sira konstrui, maibé  tanba folin boot entaun ami negosia fila-fali ho folin razoável,” Marcelo Amaral, hateten.

Oras ne’e daudaun iha izolamentu Tasi-tolu, Lahane no Vera Cruz  ba kazu moderadu no grave, no zsolamentu ba kazu lizeiru mak hanesan fatin Estadu Tibar, otél Fortuna, otél Novo Horizonte, otél Leokase,   Apartament eternity, otél Luxury, otél YQ, Mall Golgota,  otél SK, otél Vila-Verde , otél D’City  no Colégio Academia Polísia Comoro.

Jornalista:  Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here