Xefe Bankada CNRT, Duarte Nunes. Imajen Tatoli/Egas Cristóvão

DILI, 25 agostu 2021 (TATOLI)—Reprezentante Povu iha uma fukun Parlamentu Nasionál husu Governu aumenta fasilidade ba sala izolamentu sira iha territóriu nasionál.

Notísia Relevante: COVID-19: óbitu rua, pozitivu 532 no ativu 3.816

“Governu tenke aumenta fasilidade ho susfisiente ba fatin izolamentu sira tanba ikus-ikus ne’e kazu pozitivu COVID-19 sa’e maka’as. Maibé, parte ida ita haree Governu nia jestaun ba COVID-19 ne’e defisiénsia (cacat) liu. Buat sira-ne’e la la’o. Osan mak laiha ka oinsá. Afinál osan aprova ona,” Xefe Bankada Congresso Nacional de Timorense, Deputadu Duarte Nunes, informa ba jornalista sira, iha uma fukun, kuarta ne’e.

Ho variante Delta COVID-19 ne’ebé deteta iha Ermera halo Xefe Bankada CNRT preokupa tanba mosu ho derrepente de’it.

“Governu deklara katak variante Delta COVID-19 tama tiha ona mai Timor-Leste, mezmu Governu rasik la hatene variante ne’e tama hosi ne’ebé. Tanba, teki-teki de’it variante Delta ba mosu tiha ona iha munisípiu Ermera no ikus tama mai iha Dili. Aat liután, informasaun ne’ebé Bankada CNRT hetan katak ekipa hosi Ministériu Saúde ne’ebé ba halo vizita iha munisípiu Ermera mak lori variante Delta ne’e tama mai Dili. Maibé hotu-hotu nonook de’it. Laiha ema ida mak hakarak foti responsabilidade,” nia preokupa.

Nune’e mós, Xefe Bankada Frente-Mudança (FM), Deputada Isabel Freitas Ximenes, fó hanoin ba Governu atu aumenta fasilidade ba sala izolamentu sira.

“Rekomenda ba Governu atubele ho lalais buka aumenta fasilidade ba Sala Izolamentu, halo ho urjénsia prosesu aprovizionamentu ba ekipamentu. Apoiu Sala Izolamentu hanesan ventiladór no mós oksijéniu, nune’e Governu halo preparasaun ba funu boot ne’ebé mak iha ona iha ita-nia oin ne’e” nia dehan.

Nia husu Governu tenke aproveita tempu ho didi’ak enkuantu Timor-Leste seidauk tama ba senário piór (mais piora) ba kazu infetadu.

“Ita-nia rai doben Timor-Leste só bele salva, se ita agora prepara an. Husu mós apoiu ba nasaun viziñu hodi bele mai fó apoiu ba ita-nia médiku no profisonál saúde sira, ne’ebé mak oras ne’e infetadu hela situasaun ne’ebé mak preokupante tebes,” Xefe Bankada FM ne’e fó hanoin.

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here