Polísia Nasionál Timor-Leste (PNTL), munisípiu Bobonaro, liuhosi seksaun Tránzitu halo apreensaun ba motorizada ne'ebé kontra regra. Imagen Tatoli/Sérgio da Cruz.

BOBONARO, 31 agostu 2021 (TATOLI)—Durante fulan jullu-agostu, Polísia Nasionál Timor-Leste (PNTL), munisípiu Bobonaro, liuhosi seksaun Tránzitu rekolla reseita $2.017 ba kofre Estadu.

Reseita ne’e kontribui hosi infratór-sira ne’ebé kontra regra ka kódigu estrada ho totál na’in 91, ho koima fulan jullu $1.311 no agostu $706.

Notísia relevante:PNTL Bobonaro re-instala CCTV ualu iha Maliana

“Koima ne’e ita halibur barak liu hosi kontra órden 39, la uza kapasete 43 no balun laiha asesoris,” Komandante Tránzitu munisípiu Bobonaro, Sarjentu Xefe, José Bere Soares,  informa ba jornalista-sira, iha kna’ar fatin Komandu munisipiu Bobonaro, tersa ne’e.

Motorizada hirak-ne’e hetan apreensaun liu hosi atividade kontrollu ba movimentu lor-loron iha kapitál munisípiu Bobonaro.

“Iha situasaun Estadu emerjénsia ita la halo pasa reveista, maibé ita halo de’it kontrollu ba movimentu iha luron ninin, bainhira hetan sira komete infrasaun, ita halo kedan apreensaun no fo multa,” nia esplika.

Durante fulan rua ne’e mós Tránzitu munisípiu Bobonaro rejista asidente tráfiku hamutuk lima, ne’ebé iha fulan jullu dezastre ho kondisaun estragu todan iha rua, estragu kamán iha tolu no ema kanek kamán ualu, grave ida no la rejista óbitu.

Polisia mós bandu labarik minoridade kondús motór, bainhira detekta sei halo kedan apreensaun hodi fo xamada ba inan-aman atu mai presta deklarasaun iha Komandu munisipiu Bobonaro, foin aplika artigu 207 kódigu penál.

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here