Prezidente RAEOA, Arsénio Paixão Bano, lansa vasina Sinovac doze dahuluk iha Pante Makasar. Imajen Tatoli/Abilio Elo Nini.

OÉ-CUSSE, 31 agostu 2021 (TATOLI)—Sentru Informasaun COVID-19, Rejiaun Administrativa Espesiál Oé-Cusse Ambeno (RAEOA), rejista pesoál saúde na’in-12 pozitivu COVID-19 deteta liuhosi triajén iha Hospitál, ativu 73 no rekoperadu 130.

Notísia Relevante: COVID-19 iha RAEOA: Pozitivu 19, ativu 133 no rekoperadu 36

“Ita-nia pesoál saúde iha RAEOA hamutuk na’in-12 pozitivu COVID-19 iha RAEOA, na’in-rua (2) deteta iha sentru saúde Baqui, na’in 11 deteta iha Hospitál Referénsia Oé-Cusse no daudaun ne’e sira kumpre hela loron 14 no na’in-ida (1) rekopera ona entaun hela na’in-12 iha sala izolamentu Portu Kitahara Mahata ne’ebé deteta iha triajén Hospitál,” Sekretáriu Rejionál Asuntu Saúde, Manuel da Costa, informa ba Ajênsia Tatoli iha Sikluli, Oé-Cusse, tersa ne’e.

Dirijente Saúde ne’e fundamenta, totál kazu pozitivu COVID-19 too tersa (31 agostu) ne’e, baixa hela iha sala izolamentu hamutuk 73, rekoperadu 130 no kazu komulativu konfirmadu hamutuk 203, hein hela rezulatdu teste-swab 64, no daudaun ne’e kumpre hela kuarentena obrigatóriu iha Oé-Cusse hamutuk 114.

Antes ne’e, Prezidente Autoridade RAEOA hasai regulamentu foun iha pontu hitu (7) atu alerta ba povu Oé-Cusse kumpre iha períodu estadu emeerjénsia no serka sanitária, nune’e Oé-Cusse tenke livre hosi COVID-19 mak hanesan;

1.) Husu ba populasaun Oé-Cusse mantein distánsia, uza máskara taka inus no ibun bainhira sai ba fatin públiku ka privadu ne’ebé ema barak uza, fase liman bainhira atu tama ba estabelesimentu komersiál, industriál ka prestasaun serbisu nian ka iha edifísiu sira, iha ne’ebé serbisu administrasaun públika funsiona.

2.) Ema hotu-hotu ne’ebé hakarak tama ka sai hosi territóriu nasionál iha obrigasaun atu kumpre kontrolu sanitáriu, bazea ba regulamentu sanitáriu internasionál.

3.) Bandu hakat liu rai ketan atu halo atividade tradisionál ka kostumeira sira no atu asesu ba merkadu sira-ne’ebé mak regula tiha ona.

4.) Ema sira-ne’ebé tama iha territóriu nasionál maibé la respeita regra sira-ne’ebé hatuur ona iha númeru (2) no (3), sei hetan koima ho valór hosi $30 to’o $250, no sei selu rasik ninia despeza sira ba Izolamentu profilátiku ne’e no aplikasaun no kobransa hosi koima ne’ebé mak prevee iha númeru anteriór, kumpre regra sira-ne’ebé hatuur ona iha artigu 149-154, hosi Lei 11/2017, loron 24 fulan-maiu.

5.) Ema sira-ne’ebé hatudu sintomatolojía ba moras COVID-19 ka hetan infesaun hosi SARS-CoV-2 labele tama iha autokaru ka embarka ka sa’e ba Ró ka Aviaun sira no temperatura isin-lolon nian ka isin manas ho grau 37.5.C ka aas liu 37.5.C (grau sentígradu tolu nulu-resin-hitu ho balun) me’ar; kakorok moras, inus-metin no fani; dada iis susar ka sente iis atu kotu.

6.) Pesoál misaun diplomátika nian hirak ne’ebé hetan ona akreditasaun iha Dili bele kumpre períodu izolamentu profilátiku iha fatin ne’ebé Ministériu Saúde (MS) indika ona ka iha sira-nia hela fatin rasik.

7.) Despeza sira kona-ba izolamentu profilátiku sei selu hosi ema ida-idak bainhira izolamentu ne’e kumpre iha estabelesimentu saúde privadu ka iha sentru izolamentu privadu sira.

Jornalista : Abílio Elo Nini

Editór       : Cancio Ximenes

HAKEREK NO HATÁN

Please enter your comment!
Please enter your name here