Logotipu RAEOA. Imajen/Espesiál.

OÉ-CUSSE, 19 agostu 2021 (TATOLI)—Sentru Informasaun no Ekipa Prevensaun no Mitigasaun COVID-19 Rejiaun Administrativa Espesiál Oé-Cusse Ambeno (RAEOA), kinta ne’e rejista kazu pozitivu 19, ativu 133 no rekoperadu 36.

Notísia Relevante: COVID-19 iha RAEOA: Pozitivu 115, rekoperadu 35

“Ohin, servisu saúde RAEOA rejista-tán pasiente pozitivu COVID-19 hamutuk na’in-19, ne’ebé totál kazu ativu baixa hela iha izolamentu hamutuk 133, rekoperadu 36 no hein hela rezultadu teste swab 34,” Prezidente Autoridade RAEOA, Arsénio Paixão Bano, informa ba Agência Tatoli, liuhosi telefónika, kinta ne’e.

Daudaun ne’e, pasiente ativu na’in-133 kumpre hela loron 14 iha izolamentu Portu Kitahara Mahata no balun baixa hela iha izolamentu Klínika Coração Oé-Cusse no kumpre hela kuarentena obrigatóriu hamutuk 44.

Hanesan responsabél másimu iha RAEOA, nia husu ba sidadaun hotu iha Oé-Cusse atu kumpre regulamentu no regra prevensaun COVID-19 ne’ebé fó sai hosi Organizasaun Saúde Mundiál (OMS) no Ministériu Saúude tanba kazu pozitivu aumenta ba bebeik.

Tanba ne’e, nia apela ba públiku no Atoni-oan sira atu kumpre pontu hitu (7) iha períodu estadu emerjensia no serka sanitária ne’e mak hanesan;

1.) Husu populasaun Oé-Cusse mantein distánsia, uza máskara hodi taka inus no ibun bainhira sai ba fatin públiku ka privadu ne’ebé ema barak uza, fase liman bainhira atu tama ba estabelesimentu komersiál, industriál ka prestasaun serbisu nian ka iha edifísiu sira, iha ne’ebé serbisu administrasaun públika funsiona.

2.) Ema hotu-hotu ne’ebé hakarak tama ka sai hosi territóriu nasionál iha obrigasaun atu kumpre kontrolu sanitáriu, bazea ba regulamentu sanitáriu internasionál.

3.) Bandu hakat liu rai-ketan atu halo atividade tradisionál ka kostumeira sira, no atu asesu ba merkadu sira-ne’ebé mak regula tiha ona.

4.) Ema sira-ne’ebé tama iha territóriu nasionál maibé la respeita regra sira-ne’ebé hatuur ona iha númeru rua (2) no tolu (3), sei hetan koima ho valór hosi $30 to’o $250, no sei selu rasik ninia despeza sira ba Izolamentu profilátiku ne’e, no aplikasaun no kobransa hosi koima ne’ebé mak prevee iha númeru anteriór, kumpre regra sira-ne’ebé hatuur ona iha artigu 149-154, hosi Lei 11/2017, loron 24 fulan-maiu.

5.) Ema sira-ne’ebé hatudu sintomatolojía ba moras COVID-19 ka hetan infesaun hosi SARS-CoV-2 labele tama iha autokaru ka embarka ka sa’e ba Ró ka Aviaun sira no temperatura isin-lolon nian ka isin manas ho grau 37.5.C ka a’as liu 37.5.C (grau sentígradu tolu nulu-resin-hitu ho balun) mear; kakorok moras, inus-metin no fani; dada iis susar ka sente iis atu kotu.

6.) Pesoál misaun diplomátika nian hirak ne’ebé hetan ona akreditasaun iha Díli bele kumpre períodu izolamentu profilátiku iha fatin ne’ebé Ministériu Saúde indika ona ka iha sira-nia hela fatin rasik.

7.) Despeza sira kona-ba izolamentu profilátiku sei selu hosi ema ida-idak bainhira izolamentu ne’e kumpre iha estabelesimentu saúde privadu ka iha Sentru izolamentu privadu sira.

Jornalista : Abílio Elo Nini

Editór      : Cancio Ximenes

HAKEREK NO HATÁN

Please enter your comment!
Please enter your name here