Médiku-sira prepara hela vasina prevensaun Covid-19, hodi oferese ba komunidade iha Sentru Saúde Formoza, tersa (31/08/21). Iamjen Tatoli/António Gonçalves.

DILI, 31 agostu 2021 (TATOLI)—Sala Situasaun, Sentru Integradu Jestaun Krize (SIJK), rejista kazu óbitu tolu, pozitivu 167, rekoperadu 239 no kazu ativu 4.499.

Totál óbitu ne’ebé relata ohin, primeiru mane ida ho idade 43, timoroan ne’ebé hela iha Dili, seidauk vasina, no iha 31 agostu madrugada, diagnóstikadu iha HNGV ho Sindroma Insufisiénsia Respiratória Aguda (SIRA) tanba COVID-19.

Notisia relevante:COVID-19, óbitu rua no ativu 4.574

Matebian i’is-kotu iha 01:44, tanba respiratoric failure ka parajen respiratória. Familia koordena ona ho ekipa saúde atu hala’o funerál tuir protokolu ne’ebé adopta iha Timor-Leste.

Segundu, Feto ida ho idade 63, timoroan, hela iha Viqueque, seidauk vasina no iha 29  agostu  diagnóstikada iha Viqueque ho Sindroma Insufisiénsia Respiratória Aguda (SIRA), tanba COVID-19.

Matebian iha istória sofre tuberkuloze pulmonar. Matebian i’is-kotu horiseik lorokraik tuku 18:55, iha fatin izolamentu, tanba respiratoric failure ka parajen respiratória. Familia koordena ona ho ekipa saúde atu hala’o funerál tuir protokolu ne’ebé adopta iha Timor-Leste.

Terseiru, mane iha ho idade 55, timoroan, hela iha Ainaro, seidauk vasina, no iha 30  agostu 2021 diagnóstikadu iha Ainaro ho Sindroma Insufisiénsia Respiratória Aguda (SIRA), tanba COVID-19.

“Matebian iha istória sofre mós ipertensaun. Familia matebian rejeita atu evakua pasiente mai Dili. Matebian i’is-kotu iha uma, ohin dader, 05:00. Familia koordena ona ho ekipa saúde atu hala’o funerál tuir protokolu ne’ebé adopta iha Timor-Leste,” Koordenadór Forsa-Tarefa ba Prevensaun no Mitigasaun, Rui Maria de Araújo, hateten liuhosi komunikadu, tersa ne’e.

Kazu foun ohin 167 mai hosi Dili 119, Baucau 20 no munisipiu seluk hamutuk 28 kompostu hosi mane 95 no feto 75.

Hosi totál kazu detetadu foun ohin, ho idade 20-20 (23,8%) entre tinan 12-59 na’in 138 (82,6%), idade 60 mai karaik  na’in-sia. Hosi kazu detetadu foun ohin 60 kazu  ka 40% sintomátiku (hatudu sintomas).

Kumulativu kazu konfirmadu sura hosi 21 marsu 2020 to’o 31 agostu 2021 hamutuk 16.682. Hosi horisehik mai ohin, teste ne’ebé Laboratóriu Nasionál Saúde halo hamutuk 581 PCR, ho detallu hanesan tuir-mai, Vijilánsia sentinela na’in 11, rastreiu ba kontaktu ka Contact tracing 375, Rastreiu Aleatóriu  ka Random Screening nain 47, viájen sai-hosi serka sanitária hosi Dili 128,  Viájen internasionál rua, Follow up iha kuarentena na’in 18.

Totál testes PCR ne’ebé halo horisehik 30 agostu iha munisípiu-sira seluk, RAEOA no HNGV hamutuk 347, ho detalla hanesan tuir-mai, Maubisse 11, Maliana 41, Viqueque 16, Suai 40, Baucau 81, Ermera tolu, RAEOA 52, HNGV 93 no Lospalos 10.

Totál doze vasina ne’ebé fó ona ba populasaun elijível tinan 18 ba leten, to’o ohin dader 10:00, loron 31 agostu tuir sistema informasaun Saúde iha Ministériu Saúde  ho totál  kumulativu 1ª doze iha Dili (74,1%) no  totál  kumulativu 2ª doze  iha Dili (57,4%).

Ema ne’ebé simu ona vasina doze dahuluk iha Timor Leste  (51,6%) no simu ona doze daruak  (26,1%).

Atu bele hatene surtu ida ninia evolusaun nomós surtu ne’e aumenta ka diminui, indikadór seluk ne’ebé matenek-na’in epidemiolojia nian uza, maka insidénsia.

Konvensionalmente, insidénsia sukat totál kazu foun kada loron pur mil abitante, no hatudu risku ne’ebé populasaun iha atu hetan da’et moras ida.

Hosi insidénsia COVID-19 iha Timor-Leste, durante loron hitu ikus maka 18,9/100 mil abitante, enkuantu ba deit munisípiu Dili,50,3/100 mil abitante.

Ohin, munisípiu Baucau iha insidénsia 19,3/100 mil abitante, tuir kedan ho munisípiu Viqueque ho insidénsia 12,3/100 mil abitante, munisípiu Ainaro 8,5/100 mil abitante, hafoin munisípiu Covalima ho insidénsia 7,3/100 mil abitante.

Dadus iha leten hatudu katak, insidénsia munisípiu Dili ho munisípiu Baucau tuir-tuir malu a’as-liu, iha Timor-Leste laran tomak, munisípiu tolu seluk – Viqueque, Ainaro, Covalima – mós hatudu risku a’as-liu, atu populasaun hetan da’et, no hada’et tutan virus SARS-CoV-2, iha komunidade nia le’et.

Iha loron 31 Agostu de 2021, izolamentu Vera Cruz, Lahane, HNGV no fatin seluk iha territóriu laran tomak, halo tratamentu hospitalizadu ba kazu detetadu pozitivu na’in 117, ho detalle hanesan tuir mai grave hamutuk na’in 19, na’in-tolu uza ventiladór, na’in-tolu uza CPAP-Continuous Positive Airway Pressure-,13 uza oksijéniu. Moderadu hamutuk ema na’in 60. Kaman ema na’in 38.

Apela ba populasaun iha Timor-Leste laran tomak, maski simu ona vasina, favór respeita nafatin regra prevensaun no ijiéne individuál, ne’ebé Governu hatu’ur ona, atu prevene moras COVID-19 da’et ba mai.

Regra sira-ne’e, mak hanesan uza mascara, fase liman beibeik ho sabaun ka dezinfetante-ruma, evita kose liman ba matan, inus ho ibun, bainhira kumprimenta-malu la presiza ka’er-liman, bensa-liman, rei-malu ka haku’ak-malu, evita halibur-malu barak  hamri’ik ka tur do’ok hosi ema seluk, mínimu metru ida ho balun.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here