Komunidade kontinua simu vasina iha Sentru Saúde sira, segunda (30/08/21). Imajen Tatoli/António Gonçalves.

DILI, 30 agostu 2021 (TATOLI)— Sala Situasaun, Sentru Integradu Jestaun Krize (SIJK), rejista kazu óbitu rua, pozitivu 113, rekoperadu 91 no kazu ativu 4.574.

Totál óbitu ne’ebé relata ohin, feto ida ho idade 73, timoroan, hela iha Ainaro, seiduak vasina no iha 27  agostu 2021 diagnóstikada iha Ainaro ho Sindroma Insufisiénsia Respiratória Aguda (SIRA), tanba COVID-19.

Notisia relevante:COVID-19, óbitu tolu no pozitivu 166

Iha loron ne’e kedan pasiente ne’e hala’o tratamentu iha izolamentu Lahane tuir protokolu ne’ebé iha, maibé i’is-kotu ohin madrugada 01:44, tanba respiratoric failure ka parajen respiratoria, no família koordena ona ho ekipa saúde atu hala’o funerál tuir protokolu ne’ebé adopta iha Timor-Leste.

Ida seluk, nafatin feto ida ho idade 83, timoroan, hela iha Dili, seidauk  vasina kompletu, iha 22  agostu 2021 diagnóstikada iha HNGV ho Sindroma Insufisiénsia Respiratória Aguda (SIRA) tanba  COVID-19.

Iha loron ne’e kedan matebian hala’o tratamentu iha Vera Cruz tuir protokolu ne’ebé iha. Matebian sofre mós problema fuan.

“Matebian i’is-kotu ohin dader 10:55, tanba respiratoric failure k parajen respiratoria no Familia koordena ona ho ekipa saúde atu hala’o funerál tuir protokolu ne’ebé adopta iha Timor-Leste,”’ Koordenadór Forsa-Tarefa ba Prevensaun no Mitigasaun, Rui Maria de Araújo, hateten liu hosi komunikadu, segunda ne’e.

Kazu foun ohin 133, mai hosi Dili 66,  Baucau 32 no munisipiu seluk hamutuk 15, kompostu hosi mane 58 no feto 55.

Hosi totál kazu detetadu foun ohin, ho idade 20-27 (23,8%) entre tinan 12-59 na’in 82 (72,5%), idade 60 mai karaik  na’in-haat. Hosi kazu detetadu foun ohin 61 ka 54% sintomátiku (hatudu sintomas).

Kumulativu kazu konfirmadu sura hosi 21 marsu 2020 to’o 30 agostu 2021 hamutuk 16.515. Hosi horisehik mai ohin, teste ne’ebé Laboratóriu Nasionál Saúde halo hamutuk 520 PCR, ho detallu hanesan tuir-mai, Vijilánsia sentinela na’in 105, rastreiu ba kontaktu ka Contact tracing 76,  Rastreiu Aleatóriu  ka Random Screening nain 69, viájen sai-hosi serka sanitária hosi Dili 59,  Viájen internasionál 24 , Follow up iha kuarentena na’in 187.

Totál testes PCR ne’ebé halo horisehik 29 agostu iha munisípiu-sira seluk, RAEOA no HNGV hamutuk 125, ho detalla hanesan tuir-mai, Maubisse 15, Maliana 20, Viqueque haat, Suai 14, Baucau 54, Ermera la iha, RAEOA sia, HNGV sia no Lospalos laiha.

Totál doze vasina ne’ebé fó ona ba populasaun elijível tinan 18 ba leten, to’o ohin dader 10:00, loron 30 agostu tuir sistema informasaun Saúde iha Ministériu Saúde ho totál  kumulativu 1ª doze iha Dili (74,0%) no  totál  kumulativu 2ª doze  iha Dili (57,2%).

Ema ne’ebé simu ona vasina doze dahuluk iha Timor-Leste  (51,4%) no simu ona doze daruak  (25,9%).

Atu bele hatene surtu ida ninia evolusaun nomós surtu ne’e aumenta ka diminui, indikadór seluk ne’ebé matenek-na’in epidemiolojia nian uza, maka insidénsia.

Konvensionalmente, insidénsia sukat totál kazu foun kada loron pur mil abitante, no hatudu risku ne’ebé populasaun iha atu hetan da’et moras ida.

Hosi insidénsia COVID-19 iha Timor-Leste, durante loron hitu ikus maka 22,9/100 mil abitante, enkuantu ba deit munisípiu Dili,57,6/100 mil abitante.

Ohin, munisípiu Baucau iha insidénsia 27,2/100 mil abitante, tuir kedan ho munisípiu Covalima ho insidénsia 17,9/100 mil abitante, munisípiu Viqueque 12,5/100 mil abitante, munisípiu Ainaro ho insidénsia 9,8/100 mil abitante, hafoin munisípiu Manufahi ho insidénsia 8,6/100 mil abitante.

Dadus iha leten hatudu katak, insidénsia munisípiu Dili, munisípiu Baucau no Covalima tuir-tuir malu a’as-liu, iha Timor-Leste laran tomak munisípiu tolu seluk – Viqueque, Ainaro Manufahi – mós hatudu risku a’as-liu, atu populasaun hetan da’et, no hada’et tutan virus SARS-CoV-2, iha komunidade nia le’et.

Iha loron 30 agostu 2021, izolamentu Vera Cruz, Lahane, HNGV no fatin seluk iha territóriu laran tomak, halo tratamentu hospitalizadu ba kazu detetadu pozitivu na’in 118, ho detalla hanesan tuir mai, grave hamutuk na’in  27, na’in-rua uza ventiladór, na’in-tolu uza CPAP-Continuous Positive Airway Pressure-, 22 uza oksijéniu. Moderadu hamutuk ema na’in 65. Kaman ema na’in 26.

Husu ba populasaun iha Timor-Leste laran tomak, maski karik simu ona vasina, favór respeita nafatin regra prevensaun no ijiéne individuál, ne’ebé Governu hatu’ur ona, atu prevene moras COVID-19 da’et ba mai.

Regra sira-ne’e mak hanesan uza mascara, fase liman beibeik ho sabaun ka dezinfetante ruma, evita kose liman ba matan, inus ho ibun  bainhira kumprimenta-malu, la presiza ka’er-liman, bensa-liman, rei-malu ka haku’ak-malu, evita halibur-malu barak hamri’ik ka tur do’ok hosi ema seluk, mínimu metru ida ho balun.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here