Membru FALINTIL sira halo konsentrasaun iha Uaimori iha 1999. Imajen/Espesiál.

DILI, 30 agostu 2021 (TATOLI)—Komandu da Luta lideradu Komandante Em Xefe Kay Rala Xanana Gusmão no Sub Xefe Estadu Maiór atuál Primeiru-Ministru Taur Matan Ruak, fó orientasaun ba membru Forsa Armada Libertasaun Nasionál Timor-Leste (FALINTIL) labele vota direta iha sentru votasaun sira iha 30 agostu 1999.

Notísia Relevante: Tinan 1999, Xanana Gusmão orienta FALINTIL hakmatek

Komandante Unidade Polisia Militár, Majór Abel da Costa Xavier “NIKI”. Imajen/Eugénio Pereira.

“Iha tempu ne’ebá (30 agostu 1999), FALINTIL sira latún mai vota. Sira-ne’ebé envolve iha fiskál ninian serbisu hamutuk ho ita-nia lideransa iha vila ne’e nomeasaun mak tún. Ami FALINTIL ne’e hatama lista de’it depois lista ne’e lori ba sidade mak foin halo ninia kontajen atubele aumenta ita-nia votu. FALINTIL la tún ba ezerse iha sentru votasaun sira. Latún tanba orientasaun hosi Komandadu da Luta nian. Ne’ebé, tanba saida mak latún ne’e, ida-ne’e ha’u mós la hatene maibé orientasaun dehan fó lista de’it,” Eis membru FALINTIL no atuál Komandante Unidade Polisia Militár, Majór Abel da Costa Xavier “NIKI”, informa ba Agência TATOLI, liuhosi telefónika, segunda ne’e.

Eis FALINTIL ne’e haktuir, iha momentu ne’ebá Sub Xefe estadu Maiór Taur Matan Ruak mak fó lista membru FALINTIL nian nune’e bele sura hamutuk iha kontajen.

“Iha momentu ne’e, ha’u nu’udar soldadu ida, ha’u la hatene, maibé jeralmente lista ne’e fó duni ba vila atuaumenta ba ita-nia kontajen, nune’e ita bele manán,” nia dehan.

Membru FALINTIL sira halo konsentrasaun iha Uaimori iha 1999. Imajen/Espesiál.

Bainhira Sekretáriu Jerál Nasaun Unida, Kofi Annan, anunsia rezultadu votasaun ba konsulta popular iha loron 04 fulan-setembruu tinan-1999, nu’udar juventude nia sente haksolok tanba Timor-Leste maske rai kiik maibé hetan ona ninia independénsia.

“Kuandu fó-sai rezultadu iha 4 setembru katak ita manán, nu’udar juventude ida sente kontente no triste tanba katak ita nasaun kiik orgullu bele manán Indonézia, maibé sente triste tanba ita-nia maluk barak mate ba rai ida-ne’e,” nia haktuir.

Eis FALINTIL ne’e sente kontente tanba iha momentu ne’ebá komandante sira hela 100-resin de’it maibé hamutuk ho povu nia vontade konsege manán Indonézia liuhosi konsulta populár ne’e.

Juventude rezisténsia no membru FALINTIL, Majór Abel da Costa Xavier ‘Niki’ ne’ebé sai hosi vila laran ba hela kleur iha Suku Uailili, Baucau, hodi moris hamutuk ho membru FALINTIL sira fó kontribuisaun ba prosesu luta ba libertasaun nasionál.

Durante tinan barak iha Suku Uailili, Majór Niki ho  Komandante Domingos da Câmara “Amico” ne’ebé akompaña Sub Xefe Estadu Maiór atuál Taur Matan Ruak, sai hosi Ualili ba Ostico ba Uamori hodi prepara-aan dada Bandeira iha 20 agostu.

Eis membru FALINTIL atuál Majór Abel da Costa Xavier ‘Niki’, ne’ebé iha 30 agostu 1999 ne’e iha hela Uaimori, nune’e la partisipa direta iha sentru votasaun sira iha loron refere tanba konsentrasaun iha Uaimori.

Majór Niki la partisipa direta iha sentru votasaun iha 30 agostu 1999 tanba konsentra iha Uaimori hodi selebra aniversáriu loron FALINTIL 20 agostu.

FALINTIL hapara operasaun iha territóriu nasionál

Majór Niki fó-sai katak bainhira Organizasaun Nasaun Unida (ONU) fó opsaun rua ba povu Timor-Leste katak rejiaun I, II, III no IV tenke tuur hamutuk hodi enkoraja povu tomak vota ba indepedénsia.

Taur Matan Ruak no Lú Olo iha Uaimori. Imajen/Espesiál.

“Ne’e orgullu boot ba ita, tantu juventude ne’ebé mantein iha vila nomós ami ne’ebé halai ba ai-laran. Nu’udar joventude ne’ebé envolve iha akampamentu Uaimori iha 1998 to’o 1999, ida-ne’e prosesu konsentrasaun Komandu FALINTIL tomak nian, katak hapara operasaun iha territóriu tomak. Hahú hosi rejiaun I to’o rejiaun IV labele halo operasaun, nune’e labele ba hasoru funu maluk (Indonézia) atubele ita hakmatek,” nia dehan.

Orientasaun ne’e mai hosi Komandante Em Xefe Kay Rala Xanana Gusmão bainhira sei kastigu hela iha prizaun Cipinang-Jakarta-Indonézia ne’ebá, nune’e FALINTIL la halo operasaun maibé halo akampamentu iha fatin-fatin katak rejiaun I iha Atelari, rejiaun II no III hamutuk iha Uaimori, rejiaun IV iha Ermera, ne’ebé idak-idak ba konsentra iha idak-dak nia fatin, hafoin mak mai hamutuk iha Remexio.

Nia haktuir, iha momentu ne’ebá, Komandante Em Xefe Kay Rala Xanana Gusmão informa ba Sub Xefe Estadu Maiór no agora atuál Primeiru-Ministru, Taur Matan Ruak, atu konsentra ba konsulta populár.

“Iha momentu ne’ebá komandu ne’e úniku la’ós komandu rua ka tolu,” nia haktuir.

Sentru Votasaun ba Konsulta Populár ne’ebé UNAMET estabelese iha Timor-Timur hamutuk 200 ho totál populasaun ne’ebé rejistu atu tuir votasaun hamutuk 451,792. Hosi totál ne’e, votante 98.5% mak ba vota ho rezultadu votu 94.388 hili autonomia no votu 344.580 mak hili CNRT (Concelho Nacional Resistencia Timorense) hodi determia Timor-Leste nia destinu no haketak an hosi Nasaun Repúblika Indonézia ka hosi NKRI (Negara Kesatuan Republik Indonesia).

Implementasaun Konsulta Populár

Tuir Akordu 5 Maiu 1999, iha loron 11 juñu 1999, Konsellu Seguransa Organizasaun Nasaun Unida (ONU) forma Unated Nation Mission East Timor (UNAMET) atu hala’o Konsulta Populár ne’ebé atu desidi karik Timor-Timur aseita (simu) ka rejeita (la simu) opsaun konstitusionál Autonomia Espesiál ba Timor-Timur iha konseitu NKRI (Negara Kesatuan Republik Indonesia).

Membru FALINTIL sira halo konsentrasaun iha Uaimori iha 1999. Imajen/Espesiál.

Implementasaun misaun UNAMET tuir etapa operasionál determinasaun Konsulta Populár hanesan hakerek ona Akordu 5 Maiu númeru primeiru kona-ba; “Sekretáriu Jerál ONU atu tau proposta espesiál autonomia ba Timor-Timur (atuál Timor-Leste) iha Repúblika Indonézia, ba timoroan hotu, atu konsidera no aseita ka rejeita liuhusi Konsulta Populár ida ne’ebé direta, segredu no bulletin universál”.

Etapa Habelar Informasaun

  • Organizasaun Nasaun Unida (ONU) sei prepara dokumentu kona-ba Akordu Báziku no dokumentu autonomia.
  • Organizasaun Nasaun Unida (ONU) sei habelar ka haklaken no esplika kontiúdu Akordu Báziku no dokumentu autonomia hodi la haliis no faktuál iha rai laran no iha rai Timor-Timur nia li’ur (estranjeiru).
  • Organizasaun Nasaun Unida (ONU) sei esplika ba votante sira prosesu eleisaun no prosedura sira no mós implikasaun hosi “aseita” ka “rejeita” hosi opsaun ne’ebé [Governu Indonézia] oferese.

Rejistrasaun

  • Organizasaun Nasaun Unida (ONU) sei hala’o rejistrasaun iha rai laran no iha estranjeiru nafatin ba nafatin durante durasaun tempu loron 20 nia laran.
  • Organizasaun Nasaun Unida (ONU) mós hala’o atividade habelar informasaun kona-ba atividade inskrisaun.

Kampaña

  • Organizasaun Nasaun Unida (ONU) sei fó sujestaun ba regra ka nórma ne’ebé sei diskute ho apoaiante sira hosi grupu ne’ebé apoiu no rejeita proposta autonomia.
  • Organizasaun Nasaun Unida (ONU) sei oferese fasilidade sira atu fó aportunidade ne’ebé hanesan ba grupu hosi parte rua [pro-independénsia no pro-integrasaun] atu habelar sira-nia pontu devista ka hanoin ba publiku.

Votasaun iha Timor-Timur no Estranjeiru

  • Organizasaun Nasaun Unida (ONU) sei halo votasaun iha fatin votasaun hamutuk 200 (ne’ebé hanesan sentru rejistrasaun) iha Timor-Timur no fatin votasaun iha estranjeiru.

Observadór

  • Indonézia no Portugál iha direitu haruka sira-nia reprezentante ho totál ne’ebé hanesan atu observa atividade prosesu Konsulta Populár iha rai laran ka iha rai li’ur (Timor-Timur nia li’ur).
  • Observadór Internasionál sei bele observa prosesu Konsulta Populár bazeia ba regra sira ne’ebé sei hakerek hosi Organizasaun Nasaun Unida (ONU) atu regula sira-nia prezensa.

Fundu

  • Sekretáriu Jerál Nasaun Unida (ONU) sei husu konkordánsia hosi Konsellu Seguransa ba implementasaun operasaun refere atu garante fundu [orsamentu] ne’ebé presiza. Kontribuisaun voluntáriu sei distribui liuhusi Fundu Rohan Laek ne’ebé desidi ba asuntu ida ne’e. Jerálmente, planeamentu, preparasaun no implementasaun Konsulta Populár sei hala’o iha loron hamutuk 117 hahú hosi Akordu 5 Maiu to’o iha implementasaun ka halo Konsulta Populár ne’ebé hala’o iha loron 30 agustu 1999.

Hori hahú kedas, kontroversaun kona-bá UNAMET haliis ba parte ida [hosi parte pro-independénsia no pro-integrasaun] mosu beibeik ona. Iha prosesu preparasaun no implementasaun Konsulta Populár hosi UNAMET, akontese akontesimentu lubuk ida ne’ebé apoiante pro-integrasaun sente iha indikasaun UNAMET haliis ba grupu pro-independénsia. Persepsaun kona-ba ONU haliis ba parte ida ne’e, hamosu impaktu ne’ebé aumenta esklasaun tensaun entre parte pro-autonomia no pro-idependénsia.

Implikasaun Seguransa

Akordu 5 Maiu 1999 deside katak seguransa ba Konsulta Populár sai responsabilidade ba Indonézia. Akordu refere ezije atu iha neutralidade totál Tentara Nasional Indonesia (TNI) no Polisi Republik Indonesia (POLRI) hanesan kritéria prinsipál iha ezerse sira-nia responsabilidade ne’ebé garante situasaun seguru, livre hosi violénsia no presaun seluk, no mós atu garante lei no seguransa en-jerál. Aleinde ida ne’e, autoridade polísia sei sai hanesan instituisaun ida ne’ebé iha resposabilidade ba seguransa.

Akordu kona-ba Modalidade Determinasaun Povu Timor-Timur Nia Hanoin liuhosi Votasaun Direta no mós hateten katak Komisi Perdamaian dan Stabilitas (KPS)—Komisaun Dame no Estabilidade, ne’ebé harii iha 21 abríl 1999, sei sai hanesan parte ida-ne’ebé serbisu hamutuk ho Organizasaun Nasaun Unida (ONU).

Komisi Perdamaian dan Stabilitas (KPS) nia serbisu (1) atu determina regra durante periudu antes no hafoin Konsulta Populár atu parte hotu-hotu bele halo tuir; no (2) atu foti deklarasaun ne’ebé presiza atu dezarma kilat sira hosi parte hotu-hotu. Komisi Perdamaian dan Stabilitas (KPS) mak komisaun ida ne’ebé sai fórum ba líder polítika Timor-Timur, autoridade estadu no reprezentante igreja atu hala’o papél importante iha prosesu dame antes ba Konsulta Populár.

Ekipa avaliasaun ONU nian ne’ebé hala’o knaar hodi vizita Timor-Timur atu prepara misaun UNAMET nian fó atensaun ba dúvida sira hosi kapasidade POLRI sira kuidadu seguransa antes Konsulta Populár tanba faktu hatudu katak, antes ne’e TNI mak hala’o nia papél seguransa ne’ebé dominante.

Ekipa avaliasaun hato’o reportájen katak maski POLRI fó ona garantia pozitivu kona-ba seguransa iha Timor-Timur, nafatin iha impresaun katak POLRI sei iha kondisaun konfuzaun nia laran kona-ba grupu sira ne’ebé kaer kilat iha Timor-Timur.

Atu prevene situasaun ne’ebé hetok manas, Prezidente B.J. Habibie hasai Desizaun Nú. 107.1999 kona-ba Keadaan Darurat Militer (situasaun militár emerjénsia) iha provínsia Timor-Timur iha loron 6 setembru 1999. Governu Indonézia mós konkorda atu konvida ONU mai Timor-Timur no hatada ho entrega responsabilidade seguransa iha Timor-Timur hosi Majór Jenerál Kiki Syahnakri ba Majór Jenerál Peter Cosgrove nu’udar Komandante Tropa INTERFET ONU iha loron 27 setembru 1999.

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here