Atuál Komandante Polísia Militár, Majór Abel da Costa Xavier “NIKI” (liman kuana), kesi hela bandeira FALINTIL nia talin atu dada sa’e iha Uamori 1999, bainhira sei foinsa’e involve aan iha luta ba libertasaun nasionál. Imajen/Espesiál.

DILI, 30 agostu 2021 (TATOLI)—Juventude Rezisténsia, eis membru FALINTIL no atuál Komandante Unidade Polísia Militár, Majór Abel da Costa Xavier “NIKI”, sente onradu tanba bele dada-sa’e bandeira Forsa Armada Libertasaun Nasionál Timor-Leste (FALINTIL) iha Uaimori iha 20 agostu 1999. 

Eis membru FALINTIL, Majór Abel da Costa Xavier ‘Niki’ ne’ebé sai hosi vila laran ba hela kleur iha Suku Uailili, Baucau hodi hodi hamutuk ho membru FALINTIL sira, no hamutuk ho Komandante Domingos da Câmara “Amico” ne’ebé akompaña Sub Xefe Estadu Maiór atuál Taur Matan Ruak, sai hosi Ualili ba Ostico ba Uaimori hodi prepara-aan dada Bandeira iha 20 agostu.

Notísia Relevante: Xanana-Taur orienta FALINTIL labele vota direta iha 30 agostu 1999

Majór Abel da Costa Xavier ‘Niki’ dada Bandeira FALINTIL iha Uaimori tanba hetan orientasaun hosi Komandu da Luta, tanba momentu ne’e FALINTIL sira deside juventude sira hosi vila laran ba ai-laran ne’e mak iha esperiénsia dada-sa’e bandeira, nune’e konvida Majór “Niki”, “Adérito Domin” no “Besok” hodi hasa’e bandeira FALINTIL be lulik ne’e.

Komandante Unidade Polisia Militár, Majór Abel da Costa Xavier “NIKI”. Imajen/Eugénio Pereira.

“Ha’u mós sente katak nu’udar estudante ida-ne’ebé mai hosi vila sente onradu bele dada Bandeira FALINTIL, ne’e mak indika ha’u-nia aan ho kamarada Adérito Domin (agora daudaun iha Baucau), veteranu ida naran ‘Besok’ mate tiha ona. Ida-ne’e mak ha’u deside ha’u-nia aan dada Bandeira iha Uaimori,” Komandante Unidade Polísia Militár, Majór Abel da Costa Xavier “NIKI”, informa ba Agência TATOLI, liuhosi telefónika, segunda ne’e.

Hafoin dada Bandeira iha Uaimori, Majór Niki ho membr FALINTIL sira kontinua enkoraja povu atu prepara-aan ezerse sira-nia direitu votu iha Konsulta Populár (Referendu) loron 30 agostu 1999 hodi hili no determina Timor-Leste nia destinu.

Orientasaun ne’ebé Juventude Rezisténsia ne’e simu hosi Sub Xefe Estadu Maiór no atuál Primeiru-Ministru, Taur Matan Ruak, katak Komandante Em Xefe Kay Rala Xanana Gusmão, fó orientasaun atu membru FALINTIL tomak hakmatek, labele halo funu hasoru forsa Indonézia nian maibé konsentra de’it ba loron konsulta populár.

“Nu’udar juventude ne’ebé envolve iha akampamentu Uaimori iha 1998 to’o 1999, ida-ne’e prosesu konsentrasaun Komandu FALINTIL tomak nian, katak hapara operasaun iha territóriu tomak. Hahú hosi rejiaun I to’o rejiaun IV labele halo operasaun, nune’e labele ba hasoru funu maluk (Indonézia) atubele ita hakmatek,” nia haktuir.

Atuál Komandante Polísia Militár, Majór Abel da Costa Xavier “NIKI” (liman kuana), dada-sa’e bandeira FALINTIL iha Uaimori 1999. Imajen/Espesiál.

Nia hateten, orientasaun hirak-ne’e mai hosi Komandante Em Xefe Kay Rala Xanana Gusmão bainhira sei kastigu hela iha Prizaun Cipinang, Jakarta, Indonézia katak timor-oan hotu hakmatek ba opsaun rua ne’ebé fó ba povu Timór.

“Entaun iha momentu ne’ebá, FALINTIL la halo operasaun maibé halo akampamentu iha fatin-fatin, katak rejiaun I iha Atelari, rejiaun II no III hamutuk iha Uaimori, rejiaun IV iha Ermera, ne’ebé idak-idak ba konsentra iha idak-dak nia fatin, depois mak mai hamutuk iha Remexio,” nia katak.

Nune’e Majór Niki ho membru FALINTIL sira seluk sai hosi Hosi Uaimori bazea orden transferénsia kontinuasaun ba Remexio, lakleur muda ba Aileu to’o FALINTIL transforma ba ALINTIL-Forsa Defeza Timor-Leste (F-FDTL) to’o ohin loron. 

Biografia badak

Eis membru FALINTIL no atuál Komandante Unidade Polísia Militár, Majór Abel da Costa Xavier “NIKI”, Majór Abel da Costa Xavier ‘Niki’, moris iha loron 12 maiu 1972 iha Postu Administrativu Laga, Munisípiu Baucau.

Atuál Komandante Polísia Militár, Majór Abel da Costa Xavier “NIKI” (liman kuana), dada-sa’e bandeira FALINTIL iha Uaimori 1999. Imajen/Espesiál.

Iha momentu FALINTIL (Forsa Armada Libertasaun Nasionál Timor-Leste) transforma ba F-FDTL (FALINTIL-Forsa Defeza Timor-Leste), Majór Niki mós partisipa prosesu rekrutamentu ne’ebé lidera hosi ema (militár) portugés sira iha Aileu.

Bainhira FALINTIL tansforma ona ba F-FDTL, komandu de’it mak forma FALINTIL atu ba forsa ida-ne’ebé mak moderna ka forsa regulár.

Iha rekrutamentu dahuluk ne’ebé hala’o iha Aileu iha 2000, Abel da Costa Xavier ‘Niki’ sai nu’udar Primeiru Sarjentu no depois muda fali ba Metinaro iha 2001-2002 nu’udar Segundu Komandante Pelotaun hanesan instrutór.

Nune’e, iha 2003, Abel da Costa Xavier ‘Niki’ ba tuir formasaun kona-ba Leadership nian iha Austrália, depois fila-fali mai hetan promosaun ba Alferes.

Bainhira forma Unidade Polísia Militár (PM) iha 2005, 2006, 2007, Abel da Costa Xavier ‘Niki’ hetan promosaun ba Tenente no 2010 hetan postu Kapitaun, nune’e 2013 hetan promosaun ba Majór infantária/UPM no to’o ohin loron.

Jornalista : Evaristo Soares Martins

Editór      : Cancio Ximenes

HAKEREK NO HATÁN

Please enter your comment!
Please enter your name here