Ekipa liña frente haloot mate-isin ne’ebé hakotu-iis iha domingu (22/08/21) ho COVID-19, iha semitériu Bairru Horta, suku Costa sub-rejiahn Pante Makasar. Imajen Tatoli/Abílio Elo Nini.

DILI, 29 agostu 2021 (TATOLI)-Sala Situasaun Sentru Integradu Jestaun Krize (CIGC-sigla portugés), iha domingu ne’e, rejistu kazu óbitu (ema mate ho COVID-19) na’in-tolu, pozitivu 166, rekuperadu 132, no ativu 4.554.

Notísia Relevante : COVID-19: óbitu ida no pozitivu 276 maioria iha Dili

“Kazu foun ohin 166 kompostu hosi mane 91 feto 75 ne’ebé maioria mai hosi Dili hamutuk 119, Aileu 13 no munisípiu sira seluk 34,” Koordenadór Forsa-Tarefa ba Prevensaun no Mitigasaun COVID-19 iha Timor-Leste, Rui Maria de Araújo, informa liuhosi komunikadu imprensa ne’ebé Agência Tatoli asesu, domingu ne’e.

Hosi kazu detetadu foun ohin ne’e, ema ho idade 20-31 (18,6%), ho idade entre 12-59 hamutuk na’in-127 (76,5%), ho idade 60 ba leten na’in-ualu, ne’ebé hosi totál kazu konfirmadu ohin, 65 kazu ka (39,1%) sintomátiku (hatudu sintoma).

Enkuantu óbitu ne’ebé relata ohin, mane ida idade tinan 70, timor-oan hela iha Dili, vasina seidauk kompletu ne’ebé iha loron 20 agostu 2021 diagnóstikadu iha Emerjénsia Ospitál Nasionál Guido Valadares (HNGV) ho sidroma insufisiénsia respiratóriu aguda (SIRA) tanba COVID-19.

Hafoin pasiente ne’e hakotu-iis horikalan tuku 20:20 tanba parajen respiratória, nune’e família koordena ona ho ekipa saúde atu halo funeral tuir protokolu saúde.

Óbitu daruak, mane ho idade tinan 89 timor-oan hela iha Dili, seidauk vasina, iha loron 22 agostu 2021, diagnóstikadu iha HNGV ho sidroma insufisiénsia respiratória aguda (SIRA), tanba COVID-19, iha loron ne’e kedas matebian halo tratamentu Vera Cruz tuir protokolu iha ne’ebá.

Matebian hakotu-iis horikalan oras tuku 20:30 tanba parajen respiratória, nune’e família koordena ona ho ekipa saúde atu halo funeral tuir protokolu ne’ebé adapta iha Timor-Leste.

Óbitu da-toluk mós mane ida ho idade 72, timor-oan hela iha Maliana seidauk simu vasina, iha loron 27 agostu 2021, diagnóstikadu iha Maliana ho sidroma insufisiénsia respiratória aguda (SIRA), tanba COVID-19, nune’e matebian mós sofre moras kankru prostata ho metastaze ba órgaun seluk iha isin, iha loron ne’e kedas matebian halo izolamentu iha Maliana.

Matebian hakotu-iis horikalan oras tuku 19:00 tanba faiure/falénsia órgaun barak, nune’e família koordena ona ho ekipa saúde atu halo funeral tuir protokolu ne’ebé adapta iha Timor-Leste.

Nune’e ho totál kumulativu kazu konfirmadu sura hosi loron 21 marsu 2020 to’o loron 29 agostu 2021 hamutuk 16.402.

Horiseik mai ohin teste ne’ebé Laboratóriu Nasionál halo hamutuk 335, kompostu hosi teste PCR iha Dili hanesan vijilánsia sentinela na’in-sia, rastreiu ba kontaktu na’in-179, rastreiu aleotóriu na’in-30, viajen sai hosi serka sanitária Dili, hamutuk na’in-94, viajen internasionál mamuk (0), Follow-up iha kuarentena hamutuk 23.

Totál PCR ne’ebé halo iha loron 28 agostu 2021, iha Munisípiu sira seluk inklui Rejiaun Administrativa Espesiál Oé-Cusse Ambeno (RAEOA), no HNGV hamutuk 235, kompostu hosi Baucau 71, Ermera sia, Maliana 16, Maubisse 26, RAEOA 13, Suai Sanulu, Viqueque 33, Lospalos (0) no HNGV 58.

Iha loron 29 agostu 2021, Izolamentu Vera Cruz, Lahane HNGV no fatin sira seluk iha territóriu laran tomak halo tratamentu ba kazu detetadu hamutuk 121, kompostu hosi grave 24 na’in rua uza ventiladór, na’in tolu uza dor, nain tolu uza Continuous Positive Airway Pressure (CPAP), na’in-19 uza oksijéniu, na’in-66 ho kategoria moderadu no na’in-31 kategoria Leve.

Governu impoin medida saúde públika hanaran ‘konfinamentu domisiliáriu obrigatóriu’, atu obrigatóriamente ema presiza hela iha uma atu nune’e bele prevene virus SARS-CoV-2 inklui
variante Delta, ne’ebé hada’et barak liután iha komunidade nia leet.

Nune’e mós, Governu impoin medida saúde publika hanesan serka sanitária, katak ema labele sirkula livremente, sai ka tama hosi área serka hodi bele prevene virus labele hada’et- tutan maka’as liután ba rejiaun seluk.

Jornalista   : Arminda Fonseca

Editór        : Francisco Simões

HAKEREK NO HATÁN

Please enter your comment!
Please enter your name here