Dadus evolusaun surtu COVID-19 iha Timor-Leste hahú loron 21 marsu 2020 to’o 28 agostu 2021. Imajen/CIGC

DILI28 agostu 2021 (TATOLI)–Sala Situasaun, Sentru Integradu Jestaun Krize (CIGC, sigla portugés) relata evolusaun COVID-19 iha sábadu ne’e, ne’ebé rejista kazu óbitu ida, pozitivu 276, rekuperadu 125 no kazu ativu 4.523.

“Kazu foun ohin 276, kompostu hosi mane 146 no feto 130, ne’ebé maioria mai hosi Dili hamutuk 197, Baucau 30, Covalima 10, no munisípiu seluk hamutuk 39,” Koordenadór Forsa-Tarefa ba Prevensaun no Mitigasaun Surtu COVID-19 iha Timor-Leste, Rui Maria de Araújo, informa, liuhosi nota ne’ebé Agência TATOLI asesu.

Hosi totál kazu detetadu foun ohin, ema ho idade 20-50 (18%), entre tinan 12-59 na’in217 (78,6%), ho idade 60 ba leten na’in-sia (9), ne’ebé hosi totál kazu konfirmadu ohin, 123 ka 44,5% hanesan sintimátiku (hatudu sintoma).

Enkuantu, óbitu ne’ebé relata ohin, feto ida ho idade tinan 76, timor-oan no hela iha Dili, ho kondisaun seidauk vasina, ne’ebé iha loron 28 agostu 2021 diagnóstikadu iha Emerjénsia Hospital Nacional Guido Valadares (HNGV) ho sindroma insufisiénsia respiratória aguda (SIRA).

Hafoin pasiente ne’e hakotu iis iha madrugada tuku 03:03 tanba parajen respiratória, maibé familia rejeita atu halo funerál tuir protokolu saúde.

Nune’e, ho totál kumulativu kazu konfirmadu sura hosi 21 marsu 2020 to’o 28 agostu 2021 hamutuk 16.236.

Hosi horiseik mai ohin, teste ne’ebé Laboratóriu Nasionál Saúde halo hamutuk 655, kompostu hosi teste PCR iha Dili hanesan, vijilánsia sentinela 82, rastreiu ba kontaktu na’in308, rastreiu aleatóriu 145, viajen sai hosi serka sanitária Dili na’in-94, viajen internasionál na’in-ida no follow-up iha kuarentena hamutuk na’in25.

Totál teste PCR ne’ebé halo iha loron 27 agostu iha munisípiu seluk, Rejiaun Administrativa Espesiál Oé-cusse Ambeno (RAEOA) no HNGV hamutuk 367, kompostu hosi Baucau 151, Ermera neen, Maliana 51, Maubisse 26, RAEOA 15, Suai 38, Viqueque ualu, Lospalos haat , no HNGV 68.

Iha loron 28 agostu 2021, izolamentu Vera Cruz halo tratamentu ba kazu detetadu na’in-118, kompostu hosi grave na’in-23 ne’ebé na’in tolu uza ventiladór, na’in tolu uza Countinous Positive Airway Pressure (CPAP), na’in17 uza oksigéniu, na’in-60 ho kategoria moderadu, no na’in-35 kategoria leve.

Aleinde ne’e, númeru kazu moderadu no grave ne’ebé baixa iha Vera Crúz hatudu katak bainhira ema barak liu detetadu pozitivu, maka barak liután maka sei baixa ho kategoria moderadu no grave.

Governu impoin medida saúde públika hanaran ‘konfinamentu domisiliar obrigatóriu’, atu obrigatóriamente ema presiza hela iha uma atu nune’e bele prevene vírus SARS-CoV-2 inklui variante Delta, ne’ebé hada’et barak liután iha komunidade nia le’et.

Nune’e mós, Governu impoin medida saúde públika hanesan serka sanitária, katak ema labele sirkula livremente, sai ka tama husi área serka hodi bele prevene vírus labele hada’et-tutan maka’as liután ba rejiaun seluk.

Jornalista : Nelia Fernandes

Editora     : Julia Chatarina

HAKEREK NO HATÁN

Please enter your comment!
Please enter your name here