Reuniaun Konsellu Ministru, iha Palásiu Governu, kuarta (25/08). Imajen TATOLI/Egas Cristóvão

DILI, 25 agostu 2021 (TATOLI)–Governu liuhosi reuniuan Konsellu Ministru (KM), kuarta ne’e, aprova Projetu Rezolusaun Governu hodi impoin hikas serka sanitária iha munisípiu Baucau no Covalima hahú tuku 23:59 loron 26 agostu 2021 to’o tuku 23:59 loron 08 setembru 2021.

“Bandu sirkulasaun ema sira entre área no munisípiu sira ne’ebé refere ona no sirkunskrisaun administrativa sira-seluk, exetu iha kazu hirak ne’ebé nia fundamentu forte tanba razaun sira seguransa públika, saúde públika, asisténsia umanitária, manutensaun ba sistema abastesimentu públiku ka razaun seluk ne’ebé presiza atu hala’o ba interese públiku,” Ministru Prezidénsia Konsellu Ministru, Fidelis Manuel Leite Magalhães, hateten, hafoin reuniaun ezekutivu iha Palásiu Governu.

Iha biban hanesan, Governu renova serka sanitária iha munisípiu Dili no Ermera to’o tuku 23:59  loron 13 setembru, enkuantu impozisaun serka sanitária no inklui área sira iha suku Naimeco, iha sub rejiaun Pante Macassar no suku Bobometo, iha sub rejiaun Oesilo, iha Rejiaun Espesiál Oé-cusse Ambeno to’o tuku 23:59 loron 08 setembru.

Maski nune’e, Rezolusaun Governu ne’e la inklui proibisaun sirkulasaun indivíduu sira ne’ebé komprova vasinasaun kompleta ka doze rua kontra COVID-19 no mós ba labarik sira ho idade tinan 6 mai kraik ne’ebé akompaña.

Iha loron 24 agostu ne’e, durante oras 24 nia laran rejista númeru óbitu rua, pozitivu 532, rekuperadu 97 no ativu 3.816, nune’e totál kazu rejistadu hahú marsu 2020 to’o 24 agostu hamutuk 14.935.

Hosi totál kazu 532, kompostu hosi mane 335  no feto 197, Dili hamutuk 298, Baucau 90, Covalima 75 no munisípiu seluk  hamutuk 69.

Ema ho idade 20-122 (23,8%), idade entre 12-59 hamutuk na’in 393 (73,68%), idade 60 ba leten hamutuk na’in-17 no hosi kazu detetadu foun.

Hosi horisehik to’o loron 24 agostu, teste hosi Laboratóriu Nasionál Saúde halo hamutuk 1.388 PCR, kompostu hosi vijilánsia sentinela na’in-122, rastreiu ba kontaktu 412, rastreiu aleatóriu  315, viájen sai hosi serka sanitária hosi Dili 248, viajen internasionál 238, follow up iha kuarentena lima.

Jornalista : Antónia Gusmão

Editora     : Julia Chatarina

HAKEREK NO HATÁN

Please enter your comment!
Please enter your name here