Pesoál saúde-sira hala’o teste swab ba komunidade iha SIJK, kuarta, (25/08/21). Imajen Tatoli/António Gonçalves.

DILI, 26 agostu 2021 (TATOLI)—Dadus hosi Komisaun Interminsiteriál ba Implementasaun vasina kontra COVID-19, iha Timor-Leste (TL), hatudu katak, to’o ohin sidadaun ne’ebé simu ona vasina doze dahuluk hamutuk 380.300 no doze daruak hamutuk 187.600.

Reprezentante Komisaun Interminsiteriál, Maria Santina de Jesus Gomes, fó-sai dadus ne’e liuhosi konferénsia imprensa iha salaun MSSI, Caicoli, kinta ne’e.

Notísia relevante:COVID-19: óbitu haat, pozitivu 307 no ativu 4.203

Oras-ne’e daudaun, Governu kontinua fornese vasina COVID-19 iha sentru saúde-sira no mós postu imunizasaun-sira ne’ebé defini ona iha territóriu tomak, ho kampaña ne’ebé agora daudaun la’o hela iha munisípiu sira, inklui Baucau no Ermera.

Governu apela ba populasaun elijível atu simu vasina COVID-19 ho lalais, tanba númeru infetadu ne’ebé kontinua aas iha Timor-Leste.

Estatístika atuál hatudu katak, númeru ba sira ne’ebé mak la simu vasinasaun no hetan moras COVID-19 iha semana liu bá, liu dobru sira ne’ebé simu ona vasina.

To’o agora Timor-Leste simu ona vasina hamutuk doze millaun ida hosi nasaun doadór-sira no to’o ohin loron mós, TL rejista kazu COVID-19 hamutuk 15.296, entre númeru ne’e iha na’in 52 mak mate ho COVID-19.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here