Pesoál saúde-sira hala’o teste swab ba komunidade iha SIJK, kuarta, (25/08/21). Imajen Tatoli/António Gonçalves.

DILI, 26 agostu 2021 (TATOLI)—Sala Situasaun, Sentru Integradu Jestaun Krize (SIJK), rejista kazu óbitu haat, pozitivu 307, rekoperadu 152 no kazu ativu 4.203.

Totál óbitu ne’ebé relata ohin, iha na’in-haat  mak hanesan primeiru feto ida idade 65, Timoroan, hela iha Dili, seidauk vasina, no iha 24  agostu 2021 diagnóstikada Sindroma Insufisiénsia Respiratória Aguda (SIRA), tanba COVID-19, no hahú halo tratamentu iha Vera Cruz, iha loron ne’e kedan.

Notisia relevante:COVID-19: óbitu ida, pozitivu 361 no ativu 4.052

Matebian iha mós istória sofre moras tuberkuloze, hipertensaun no diabetes. Ohin dader 03:30 matebian i’is-kotu.

Família koordena hela ho ekipa saúde-sira atu hala’o funerál tuir protokolu ne’ebé adopta iha TimorLeste.

Segundu, mane ida ho idade 69, timoroan, hela iha Dili, simu ona vasina doze kompletu, iha 23 agostu 2021 diagnóstikadu Sindroma Insufisiénsia Respiratória Aguda (SIRA) tanba COVID-19, no hahú halo tratamentu iha Lahane, iha loron ne’e kedan.

Matebian iha mós istória stroke hemorájiku. Ohin dader 04:30 matebian i’is-kotu. Familia koordena hela ho ekipa saúde-sira atu hala’o funerál tuir protokolu ne’ebé adopta iha Timor-Leste.

Terseiru mós mane ida ho idade 69, timoroan, hela iha Dili, seiduak simu vasina, no iha 26  agostu 2021 diagnóstikadu Sindroma Insufisiénsia Respiratória Aguda (SIRA), tanba COVID-19, no hahú hala’o tratamentu iha HNGV, iha loron ne’e kedan.

“Ohin dader 02:00 matebian iis-kotu. Familia koordena hela ho ekipa saúde-sira atu hala’o funerál tuir protokolu ne’ebé adopta iha Timor-Leste,” Koordenadór Forsa-Tarefa ba Prevensaun no Mitigasaun, Rui Maria de Araújo, hateten liuhosi komunikadu, kinta ne’e.

Kintu, mane ida ho idade 23, timoroan, hela iha Viqueque, seidauk simu vasina, no iha 25 agostu 2021 diagnóstikadu Sindroma Insufisiénsia Respiratória Aguda (SIRA), tanba Covid-19.

Ohin dader atu transfere mai Vera Cruz liuhosi ambulánsia aérea, maibé metebian iis-kotu tuku 10:45 dader, ida dalan ba aeroportu Viqueque.

Matebian iha mós istória sofre moras tuberkuloze. Familia koordena hela ho ekipa saúde-sira atu hala’o funerál tuir protokolu ne’ebé adopta iha Timor-Leste.

Kazu foun ohin 307, mai hosi Dili 243, Baucau 30 no munisípiu seluk hamutuk 34 ne’ebé kompostu hosi mane 154  no feto 153.

Hosi totál kazu detetadu foun ohin, ho idade 20-41 (18%), ho idade entre tinan 12-59 na’in 253 (82,4%), idade 60 mai karaik  na’in 13. Hosi kazu detetadu foun ohin 107 kazu  ka 34,8% sintomátiku (hatudu sintomas).

Kumulativu kazu konfirmadu sura hosi 21 marsu 2020 to’o 26 agostu 2021 hamutuk 15.603. Hosi horisehik mai ohin, teste ne’ebé Laboratóriu Nasionál Saúde halo hamutuk 814 PCR, ho detallu hanesan tuir-mai, Vijilánsia sentinela na’in 34, rastreiu ba kontaktu ka Contact tracing 279, Rastreiu Aleatóriu ka Random Screening nain 171, viájen sai-hosi serka sanitária hosi Dili 263, Viájen internasionál 64, Follow up iha kuarentena na’in tolu.

Totál testes PCR ne’ebé halo horisehik 25 agostu iha munisípiu-sira seluk, RAEOA no HNGV hamutuk 420, ho detalla hanesan tuir-mai, Maubisse 20, Maliana 47, Viqueque ualu, Suai 75, Baucau 107,  Ermera 10, RAEOA 48, HNGV 92 no Lospalos 13.

Totál doze vasina ne’ebé fó ona ba populasaun elijível tinan 18 ba leten, to’o ohin dader 10:00, loron 25 agostu tuir sistema informasaun Saúde iha Ministériu Saúde  ho totál  kumulativu 1ª doze iha Dili (73,4%) no totál  kumulativu 2ª doze  iha Dili (55,9%).

Ema ne’ebé simu ona vasina doze dahuluk iha Timor-Leste  (50,4%) no simu ona doze daruak  (24,9%).

Atu bele hatene surtu ida ninia evolusaun nomós surtu ne’e aumenta ka diminui, indikadór seluk ne’ebé matenek-na’in epidemiolojia-nian uza, maka insidénsia.

Konvensionalmente, insidénsia sukat totál kazu foun kada loron pur mil abitante, no hatudu risku ne’ebé populasaun iha atu hetan da’et moras ida.

Hosi insidénsia COVID-19 iha Timor-Leste, durante loron hitu ikus maka 23,5/100 mil abitante, enkuantu ba deit munisípiu Dili,58,1/100 mil abitante.

Ohin, insidénsia Covalima ho insidénsia 29,7/100 mil abitante, tuir kedan ho munisípiu Baucau ho insidénsia 23,2/100 mil abitante, munisípiu Manufahi 15,3/100 mil abitante, munisípiu Ainaro ho insidénsia 11,8/100 mil abitante, munisípiu Manatuto ho insidénsia 9,5/100 mil abitante, hafoin munisípiu Viqueque ho insidénsia 6,7/100 mil abitante.

Dadus iha leten hatudu katak, insidénsia munisípiu Dili, munisípiu Covalima no Baucau tutuir malu a’as-liu iha Timor-Leste laran tomak, munisípiu haat seluk – Manufahi, Ainaro Manatuto, Viqueque – mós hatudu risku a’as-liu, atu populasaun hetan da’et, no hada’et tutan virus SARS-CoV-2, iha komunidade nia le’et.

Iha 26 agostu 2021, izolamentu Vera Cruz halo tratamentu ba kazu detetadu na’in 66. Iha área obstetrisia na’in-neen no iha medisina interna na’in 49  iha sirurjia na’in-neen, perinatolojia na’in-lima.

Iha obstetrisia  na’in-neen kategoria kaman hotu. Iha área medisina interna na’in 49. Na’in 24 kategoria grave (lima uza ventiladór). Na’in-rua  ho CPAP-Continuous Positive Airway Pressure, 15 ho oksijéniu). Na’in 15 kategoria  moderadu, 10  kategoria kaman. Sira na’in-neen iha sirurjia kategoria kaman hotu, no na’in-lima iha perinatolojia kategoria kaman.

Númeru kazu moderadu no grave ne’ebé baixa iha Vera Cruz, hatudu katak, bainhira ema barak liu detetadu pozitivu, barak-liu tan maka sei baixa ho kategoria moderadu no grave.

Informa mós ba públiku katak, iha semana kotuk (16-22 agostu), ema ne’ebé baixa iha Vera Cruz no Lahane tanba COVID-19, hamutuk hotu 41/54 (76%) mak seidauk simu vasina, kompara ho ema na’in 11/54 (20,3%) ne’ebé mak simu ona vasina kompletu.

Ema ne’ebé seidauk simu vasina iha probabilidade bo’ot liu dala-rua, atu baixa iha ospitál, kompara ho ema ne’ebé mak simu ona vasina.

Informa mós katak, ema adultu na’in 14 ne’ebé mate iha semana kotuk (16-22 agostu), la simu vasina kompletu (iha ema ida de’it maka simu doze vasina ida).

Ida ne’e hatudu katak, iha Timor-Leste ema ne’ebé mak simu ona vasina kompletu, seidauk iha ida mak mate ho ka tanba COVID-19.

Apela ba populasaun iha Timor-Leste laran tomak, maski simu ona vasina, favór respeita nafatin regra prevensaun no ijiéne individual, ne’ebé Governu hatu’ur ona, atu prevene moras COVID-19 da’et ba mai.

Regra sira-ne’e, mak hanesan uza máscara, fase liman beibeik ho sabaun ka dezinfetante ruma, evita kose liman ba matan, inus ho ibun bainhira kumprimenta malu, la presiza ka’er liman, bensa-liman, rei-malu ka haku’ak malu, evita halibur malu barak hamri’ik ka tur do’ok husi ema seluk, mínimu metru ida ho balun.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here