Serimónia lansamentu fatuk dahuluk konstrusaun edifísiu ba kompañia terrestre baze militár FALINTIL Forsa Defeza Timor-Leste (F-FDTL), iha área Damanlara, aldeia Harane, suku Aidaba Leten, postu administrativu Atabae, munisípiu Bobonaro, kinta (26/08/21). Imajen Tatoli/Nelson de Sousa.

BOBONARO, 26 agostu (TATOLI)—Ministériu Defeza (MD), lansa fatuk dahuluk konstrusaun edifísiu ba kompañia terrestre baze militár FALINTIL Forsa Defeza Timor-Leste (F-FDTL), iha área Damanlara, aldeia Harane, suku Aidaba Leten, postu administrativu Atabae, munisípiu Bobonaro.

Lansamentu ne’e hala’o iha ámbitu tour ‘dalan ba dame’ hosi F-FDTL iha komemorasaun loron FALINTIL ba dala 46.

Notísia relevante:PN husu F-FDTL reforsa  servisu PNTL iha fronteira

Diretór Jerál Ministériu Defeza, Nuno Carvalho dos Santos, hateten konstrusaun baze kompañia ne’e hanesan planu estratíjiku militár, hodi kompleta infraestrutura, iha parte norte.

“Agradese ba kolaborasaun hosi entidade hotu-hotu no komunidade iha suku tanba oferese ona fatin  ba konstrusaun,” Diretór Jerál ne’e hateten iha serimónia lansamentu fatuk dahuluk iha Aidabalete, kinta ne’e.

Nuno Carvalho dos Santos husu kompañia atu implementa projetu konstrusaun ho kualidade no garante tuir tempu ne’ebé determinadu.

Xefe Estadu Maiór Jenerál F-FDTL, Tenente Jenerál, Lere  Anan Timur, hateten funsionamentu kompañia baze militár ne’e, iha tempu oin mai bele fó seguransa ba fronteira Terrestre bazeia ba Konstituisaun Repúblika Demokratika Timor-Leste (K-RDTL).

“Agora Governu atu entrega ba F-FDTL hodi fó seguransa iha fronteira, tanba ne’e ita hein deit desizaun no bainhira konstrusaun remata ba fatin baze militár remata, sei koloka membru hodi fó seguransa iha fronteira,” Tenente Jenerál, Lere  Anan Timur, subliña.

Nune’e mós xefe suku, Aidabaleten, Francisco Fontes Leite, orgullu ho konstrusaun ne’e hanesan faze ida ne’ebé hola parte iha dezenvolvimentu, atu asegura nasaun lori autoridade militár besik komunidade.

Rai Estadu ne’ebé utiliza hodi konstrui edifísiu baze militár hamtuk ektare 43 no durante ne’e rai ne’e mamuk maibé komunidade balun mak utiliza hodi halo natar no toos tanba kuda ai-horis, no Governu sei indimiza iha tinan oin.

Iha lansamentu ne’e lian na’in-sira hosi suku Aidabaleten hala’o uluk  serimónia  rituál hanesan oho fahi ida tuir kultura, hodi husu matak malirin.

Konstrusaun ne’e sei kompleta uma medida naruk metru 120 ho luan metru 70, sei konstrui uma haat kompleta ho haris fatin no instalasaun eletrisidade inklui bee moos.

Projeitu ne’e responsabiliza hosi kontrakór kompañia Luminar Unipessoal LDA , ho $882.383,33  ho duransaun tinan rua.

Partisipa iha serimónia lansamentu ne’e, Komandante Jerál PNTL, Komisáriu Faustino da Costa, Vise Xefe Estadu, Brigadeiru, Falur Rate Laek, funsionáriu Ministériu Defeza, menmru  F-FDTL, Prezidente Autoridade munisípiu Bobonaro, autoridade lokál ho komunidade.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here