Operasaun intensivu UPF ho F-FDTL iha fronteira Munisípiu Covalima. Imajen Tatoli/Eugénio Pereira.

DILI, 11 agostu 2021 (TATOLI)-Deputadu husi Partidu Libertasaun Populárhusu ba Instituisaun FALINTIL-Forsa Defeza Timor-Leste (F-FDTL) atu aumenta membru sira bá iha fronteira hodi reforsa servisu PNTL atu asegura no kontrola sidadaun sira labele ultrapasa liña fronteira ho dalan ilegál ba prevene transmisaun Covid-19 ho variante foun Delta.

Vise-Xefe Bankada Partidu Libertasaun Populár (PLP), Deputadu Francisco Vasconcelos, hateten kuaze tinan rua ona, Governu Konstituisaun daualu mantein pozisaun, estratejia no programa ida maka halo prevensaun ba problema mundiál Covid-19.

Solusaun úniku atu prevene no kombate moras coronavirus iha rai-laran,  Deputadu PLP  ne’e suzere atu asegura área fronteira no enkoraja sidadaun hotu-hotu tenki simu vasina.

Tuir nia problema seriu ida ne’ebé maka akontese  daudaun ne’e, Timoroan barak  sei kontinua hakat ba Indonézia ho ilegalmente tanba ne’e sei kontribui ba aumenta númeru transmisaun Covid-19 iha rai-laran.

“Bankada PLP husu Governu mantein kontrolu ida ho rigorozu iha liña fronteira, ita só uza dalan ida-ne’e de’it. Sé ita hatene katak variante foun ne’ebé ke fó risku tebes, nia da’et ne’e ho lalais, entaun ita tenke haree mak ba fronteira ne’e de’it. Sé bele dada F-FDTL reforsa PNTL iha fronteira hodi bele salva ita-nia sidadaun sira hosi variante foun ne’e,”Vise-Xefe Bankada PLP ko’alia iha uma fukun, kuarta ne’e.

Bazeia ba ninia observasaun nota Polisia iha fronteira uza ona  ekipamentu drone hodi deteta no kontrola movimentu ilegál sira maibé la efetivu.

“Ita-nia xave mak kontrola fronteira tanba númeru variante Delta iha Indonézia mós sa’e maka’as. Indonézia agora preokupa maka’as, entaun ita mós tenke preokupa tanba ita viziñu ho sira,” nia fó hanoin.

Entretantu, Vise-Xefe Bankada Kmanek Haburas Unidade Nacional Timor Oan (KHUNTO), Deputadu António Verdiál de Sousa, sekunda katak iha nesesidade duni atu aumenta destakamentu númeru FALINTIL-FDTL iha fronteira tanba kontinua akontese sidadaun ultrapasa fronteira ho dalan ilegál aumenta maka’as loron ba loron.

“Tanba agora ne’e mosu variante Delta ne’e perigozu tebes, maibé ministériu kompetente tenke selu ona remunerasaun ba liña frente sira, liuliu iha área fronteira nune’e bele hala’o kotrolu ida di’akliu iha fronteira,” Vise-Xefe Bankada KHUNTO hateten.

Jornalista: Evaristo Soares Martins

Editór :Agapito dos Santos

HAKEREK NO HATÁN

Please enter your comment!
Please enter your name here