Imajen/Espesiál.

DILI25 agostu 2021 (TATOLI)-Ekipa Sala Leitura Xanana Gusmão (SLXG), dadaun ne’e, fó formasaun konabá sistema dijitál “KOHA” ba ekipa jestaun sentru biblioteka iha munisípiu Covalima.

Notísia Relevante: UNESCO apoia rihun $20 ba Sala Leitura Xanana Gusmão instala katálogu dijitál

Jestór Sala Leitura Xanana Gusmão (SLXG), Gaspar Quintino Freitas, hateten projetu ida-ne’e kontinuasaun hosi projetu iha tinan 2016 desde SLXG halo bainhira instala tiha sistema biblioteka  dijitál KOHA iha sala leitura, hafoin SLXG kontinua halo espansaun ba biblioteka sira seluk.

Iha tinan 2020, Sala Leitura Xanana Gusmão (SLXG) kobre no fo formasaun sistema dijitál “KOHA” ba ekipa jestaun biblioteka iha iha Ermera, Aileu no Baucau.

“Tinan ne’e, ami ba Maliana iha biblioteka Balibo Five nian ho sentru komunidade Maliana no mós ba sentru komunidade iha Suai, ne’ebé agora daudaun sira hala’o hela treinamentu. Ida-ne’e planu ba projetu tinan ida-ne’e nian, ne’ebé apoiu fundu hosi UNESCO no agora implementa daudaun ona,” Gaspar Quintino Freitas hateten ba Agência Tatoli, iha nia knaar-fatin, Lecidere, Dili, kuarta ne’e.

Formasaun ne’e kona-bá jestaun báziku biblioteka no utilizasaun sistema dijitál online, ne’ebé SLXG uza sistema KOHA hodi instala Sistema ne’e iha sira-nia fatin no oferese mós ekipamentu hanesan scanner, barkot, no kartaun biblioteka ne’ebé sei utiliza iha biblioteka sira-ne’e.

“Hosi formasaun ne’e atu kria katalogasaun dijitál online, atu públiku sira iha kualker fatin hanesan iha rai-laran no iha rai-li’ur bele asesu mai iha ita-nia kursu biblioteka hanesan livru sira ne’ebé disponivél iha kada biblioteka antes sira mai vizita biblioteka ida-ne’e, hodi sira hetan livru sira-ne’e,” nia dehan.

Formadora hosi Sala Leitura Xanana Gusmão (SLXG), Maria Amaral Guterres informa, daudaun ne’e nia parte fó hela formasaun ba staff sira hosi biblioteka Centro Comunidade Covalima (CCC) no Biblioteka Eskola Sekundária Gerál Públiku (ESGP) Covalima kona-bá sistema manajemantu biblioteka online uza sistema “KOHA” no sistema e-DDC.

“Matéria ne’ebé ami fó iha ne’e kona-bá matéria biblioteka nian, hanesan sistema KOHA no e-DDC,” nia esplika.

Sistema “KOHA” hanesan baze de dadus ida hodi halo katalogasaun, sirkulasaun matéria biblioteka, rejistu membru no utiliza hodi kria materiál biblioteka nian no e-DDC hanesan sistema ida-ne’ebé utiliza hodi halo klasifikasaun ba livru sira, bazea ba livru nia asuntu antes halo katalogasaun ba sistema “KOHA”.

Entretantu durasaun ba formasaun ne’e ba loron lima ne’ebé hahú iha loron segunda no sei remata iha loron sexta-feira semana ne’e.

Totál partisipante ba formasaun ne’e hamutuk ema na’in-neen kompostu hosi na’in-lima (5) mai hosi Centro Comunidade Covalima (CCC) no na’in-ida (1), mai hosi Eskola Sekundária Gerál Públiku (ESGP) Covalima.

Jornalista : Nelia Fernandes

Editór       : Cancio Ximenes

HAKEREK NO HATÁN

Please enter your comment!
Please enter your name here