Jestór Sala Leitura Xanana Gusmão (SLXG), Gaspar Quintino Freitas. Imajen Tatoli/Nelia Fernandes.

DILI25 juñu 2021 (TATOLI)—Jestór Sala Leitura Xanana Gusmão (SLXG), Gaspar Quintino Freitas, hateten United Nations Educational, Scientific, and Cultural Organization ka Organizasaun Nasaun Unida ba Siénsia no Kultura (UNESCO) fó apoiu rihun $20 ba SLXG  atu instala katálogu dijitál no jestaun biblioteka.

“Iha tinan 2021, UNESCO oferese fundu rihun $20 ba ami atu instala katálogu dijitál no atu fó mós formasaun ba ema sira-ne’ebé servisu iha munisípiu kona-ba jestaun biblioteka,” Gaspar Quintino Freitas hateten ba Agência Tatoli, iha nia servisu fatin, Lecidere, Díli, sesta ne’e.

SLXG uza software KOHA hanesan sistema Katálogu Dijitál ba kolesaun biblioteka ho plataforma website. Simplesmente ida-ne’e sistema rejistu livru sira iha biblioteka laran.

Tanba uza plataforma website, ema hotu iha mundu tomak bele haree dadus katálogu hosi SLXG nia kolesaun sira no parseiru biblioteka sira hotu via Online Public Access Catalogue (OPAC) ho link URL ida ne’e http://xgrrlibrary.org uza lian Tetun, Portugués no Inglés

Aleinde ne’e, UNESCO mós fó apoiu ekipamentu biblioteka nian ne’ebé atu funsiona ba sistema dijitál hanesan scanner, barcodes no kartaun membru ne’ebé atu oferese ba biblioteka sira iha munisípiu Baucau, Manatuto, Covalima, Maliana no Dili.

Jestór ne’e informa, iha tinan 2016 to’o 2017, Sala Leitura Xanana Gusmão mós hetan apoiu hosi UNESCO hamutuk $19,600. Hosi fundu ne’e instala sistema dijitál KOHA, hafoin iha tinan tuir mai halo fali espansaun ba biblioteka iha munisípiu Baucau, Aileu, Ermera, Lospalos no Díli.

Iha tinan 2016 to’o 2017, SLXG hetan fundu rihun $30 hosi Gabinete Apoiu Sosiedade Sivíl (GASC, sigla portugés) atu halo projetu kompetisaun literatura no halo peskiza iha biblioteka, ne’ebé nia utilizasaun liuhosi online ba eskola sira iha munisípiu Díli.

“Eskola ne’ebé ami kobre hanesan Ensinu Sekundária 4 de Setembru (UNAMET) no Ensinu Sekundária 30 de Agostu,” nia dehan.

Iha tinan 2018 to’o 2019, nia dehan, UNESCO oferese tan fundu $18,000 atu halo espansaun ba Biblioteka iha munisípiu Aileu, Ermera, Baucau, Lospalos no Díli.

Enkuantu, iha tinan 2017, Governu Nova Zelándia mós fó apoiu fundu $2,200 ba Sala Leitura Xanana Gusmão, hodi hodi organiza eventu semana ida kona-ba komemorasaun loron referendu 30 agostu iha Sala Leitura Xanana Gusmão.

“Orsamentu ne’e, ami uza hodi halo espozisaun istória “Memoria 1999”, realiza semináriu, no prodús livru ho títlu “Memória 1999” ho konteudu istória pesoál sira kona-ba esperiénsia iha tinan 1999,” nia dehan.

Prodús livru lenda

Entretantu Jestór Sala Leitura Xanana Gusmão ne’e informa, iha tinan 2021 ne’e SLXG hetan apoiu hosi Governu Victoria, Austália ho totál $24,051.60, no iha iha tinan 2019 to’o 2020 hetan fundu $12,807,88 ba projetu lian lokál hanesan lian Mambae hodi prodús livru formatu eskrita no aúdiu ho titulu “Konta Istória iha Lian Mambae” ne’ebé lansa ona iha 21 maiu 2021.

Hosi apoiu ne’e, SLXG prodú ona livru no audiu hamutuk 200 iha lian Mambae-Tetun, ne’ebé sei distribui ba biblioteka parseiru sira hanesan iha munisípiu Ermera no Aileu, inklui eskola sira seluk.

SLXG sei uza istória sira-ne’e, atu toka iha radiu komunidade sira ne’ebé halo ona kooperasaun hanesan iha rádiu Komunidade Comoro, Aileu, Café Ermera, Metro Díli FM, sei fó oráriu iha tempu besik atu toka istória sira-ne’e ba komunidade liuhosi laloran anin.

Tuir planu, Sala Leitura Xanana Gusmão (SLXG) sei prodús tán livru istória lenda no fiksaun ba labarik sira. Projetu foun ba istória lenda no fiksaun iha lian Makasae no Baiqueno ba labarik sira, sei implementa hahú hosi fulan-jullu 2021 to’o dezembru 2022.

“Ne’e sei prodús mós formatu livru no audiu hamutuk 200. Ho formatu hirak ne’e hotu sit rad’us ba Tetun,” Gaspar Quintino Freitas hateten.

Nia dehan, istória ne’ebé atu kolekta hanesan istória lenda no istória fiksaun (imajinativu) hosi lian Makasae no Baiqueno. Iha lian Makasae sei ba kolekta iha munisípiu Baucau, Viqueque, Lospalos no Baiqueno sei ba kolekta iha Oé-Cusse (RAEOA).

Livru hirak ne’e, sei distribui ba biblioteka no eskola sira hanesan iha munisípiu Baucau, Viqueque, Lospalos, Oé-Cusse inklui Díli.

Notísia Relevante: Livru “Konta Istória iha Lian Mambae” prezerva lian-inan sai identidade orijen

Jornalista : Nelia Fernandes  

Editór       : Cancio Ximenes

HAKEREK NO HATÁN

Please enter your comment!
Please enter your name here