Kapasita ba feto pontesiál no feto hosi partidu polítiku-sira iha munisípiu Viqueque, tersa (24/08/21). Imajen Tatoli/Vitorino Lopes da Costa.

VIQUEQUE, 24 agostu 2021 (TATOLI)—Sekretária Estadu Igualdade no Inkluzaun (SEII), kapasita feto pontesiál no feto hosi partidu polítiku-sira iha munisípiu Viqueque, atu bele partisipa iha eleisaun jerál ne’ebé besik ona.

Kapasitisaun ne’e ho nia objetivu atu hakbi’it partisipasaun feto potensiál iha munisípiu, hodi prepara ba eleisaun.

Notísia relevante:Alola-MHVF fó formasaun kona-bá prevene violénsia kontra feto iha Viqueque

“Ita bele hakbi’it partisipasaun feto iha nível  munisípiu liuliu ba nível foti desizaun nian, tanba ita hatene katak, iha tinan ida-ne’e preparasaun ba eleisaun.  Tanba-ne’e, SEII sempre tau prioridade ba integradu sira atu feto bele partisipa másimu iha eleisaun,” José de Carvalho hateten ba jornalista Agência Tatoli, iha postu adiministrativu Viqueque, tersa ne’e.

Liga ho persentajen feto nian, partisipasaun iha munisípiu no nasionál menus, maski feto iha Paralmentu Nasionál (PN) 38%, maibé kompara feto iha nível munisípiu-sira iha suku 452, partisipasaun feto asume kargu hanesan xefe suku iha na’in 21, pursentu 25% no feto sai xefe aldeia iha 4%.

Iha fatin hanesan, Vise Prezidente Asosiasaun Feto Potensiál Postu Administrativu Viqueque Villa, Cándida Gusmão, konsidera kapasitasaun ne’e importante ba feto maluk sira-de’it hodi hakbi’it koñesimentu no mentalidade, hodi  prepara-an ba eleisaun-sira.

Formasaun durante loron ida, partisipa hosi feto potensiál munisípiu Viqueque no feto hosi partidu polítiku sira na’in 30-resin.

Jornalista: Vitorino Lopes da Costa

Editór: Cipriano Colo

HAKEREK NO HATÁN

Please enter your comment!
Please enter your name here