Pesoál aviasaun iha Aeroportu Internasionál Nicolau Lobato, Comoro tula hela aimoruk vasina AstraZeneca ne’ebé Governu Austrália oferese ho Aviaun Quantas ba karreta cool box, kinta (28/07/21). Imajen Tatoli/António Gonçalves.

DILI, 24 agostu 2021 (TATOLI)—Sala Situasaun, Sentru Integradu Jestaun Krize (SIJK), rejista kazu óbitu rua, pozitivu 532, rekoperadu 97 no kazu ativu 3.816.

Totál óbitu ne’ebé relata ohin, primeiru mai feto, ho idade 35, timoroan, hela iha Dili, seidauk vasina, iha 22 agostu 2021, diagnóstikada Sindroma Insufisiénsia Respiratória Aguda (SIRA) tanba COVID-19 (PCR pozitivu, CT Egene 22), no hahú halo tratamentu iha Lahane, iha loron ne’e kedan.

Notisia relevante:Pesoál saúde HNGV na’in 116 pozitivu COVID-19

Ohin dader matebian i’is-kotu iha tuku 05:10 dader no família koordena hela ho ekipa saúde atu hala’o funerál tuir protokolu ne’ebé adopta iha Timor-Leste.

Segundu mane ho idade 65, hela ida Dili, seidauk vasina, iha 23 agostu  2021, diagnóstikadu Sindroma Insufisiénsia Respiratória Aguda (SIRA) tanba COVID-19 (Rapid Antigen Test Pozitive), no hahú halo tratamentu iha Lahane, iha loron ne’e kedan.

“Ohin loraik matebian iis-kotu iha tuku 15:20 no familia koordena hela ho ekipa saúde sira atu hala’o funerál tuir protokolu ne’ebé adopta iha Timor-Leste,” Koordenadór Forsa-Tarefa ba Prevensaun no Mitigasaun, Rui Maria de Araújo, hateten liuhosi komunikadu, tersa ne’e.

Kazu foun ohin 532 hosi Dili 298, Baucau 90, Covalima 75 no munisípiu seluk  hamutuk 69 ne’ebé kompostu hosi mane 335  no feto 197.

Hosi totál kazu detetadu foun ohin, ho idade 20-122 (23,8) ho idade entre 12-59 na’in 393 (73,68%), idade 60 mai karaik  na’in 17. Hosi kazu detetadu foun ohin 202 kazu  ka 38% sintomatiku (hatudu sintomas).

Kumulativu kazu konfirmadu sura hosi 21 marsu 2020 to’o 24 agostu 2021 hamutuk 14.935. Hosi horisehik mai ohin, teste ne’ebé Laboratóriu Nasionál Saúde halo hamutuk 1.388 PCR, ho detallu hanesan tuir-mai, Vijilánsia sentinela na’in 122, rastreiu ba kontaktu ka Contact tracing 412, Rastreiu Aleatóriu ka Random Screening nain 315, viájen sai-hosi serka sanitária hosi Dili 248, Viájen internasionál 238, Follow up iha kuarentena na’in-lima.

Totál testes PCR ne’ebé halo horisehik 23 agostu iha munisípiu-sira seluk, RAEOA no HNGV hamutuk 506, ho detalla hanesan tuir-mai, Maubisse 36, Maliana 47,  Viqueque 11, Suai 148, Baucau 92, Ermera 15, RAEOA 24, HNGV 117 no Lospalos 16.

Totál doze vasina ne’ebé fó ona ba populasaun elijível tinan 18 ba leten, to’o ohin dader 10:00, loron 24 agostu tuir sistema informasaun Saúde iha Ministériu Saúde ho totál  kumulativu 1ª doze iha Dili (72,8%) no  totál  kumulativu 2ª doze  iha Dili (54,6%).

Ema ne’ebé simu ona vasina doze dahuluk iha Timor-Leste  (49,1%) no simu ona doze daruak  (23,0%).

Atu bele hatene surtu ida ninia evolusaun nomós surtu ne’e aumenta ka diminui, indikadór seluk ne’ebé matenek-na’in epidemiolojia nian uza, maka insidénsia.

Konvensionalmente, insidénsia sukat totál kazu foun kada loron pur mil abitante, no hatudu risku ne’ebé populasaun iha atu hetan da’et moras ida.

Hosi insidénsia COVID-19 iha Timor-Leste, durante loron hitu ikus maka 21,7/100 mil abitante, enkuantu ba deit munisípiu Dili,51,6/100 mil abitante.

Ohin, insidénsia Covalima ho insidénsia 31,3/100 mil abitantes, tuir kedan ho munisípiu Manufahi 26,2/100 mil abitante, munisípiu Baucau ho insidénsia 17,6/100 mil abitante, munisípiu Ainaro ho insidénsai 10,2/100 mil abitante, munisípiu Manatuto ho insidénsia 8,8/100 mil abitante, hafoin RAEOA ho insidénsia 8,1/100 mil abitante.

Dadus iha leten hatudu katak, insidénsia munisípiu Dili, munisípiu Covalima no Manufahi tu-tuir malu a’as-liu iha Timor-Leste laran tomak, munisípiu tolu seluk – Baucau, Ainaro Manatuto – ho RAEOA mós hatudu risku a’as-liu, atu populasaun hetan da’et, no hada’et tutan virus SARS-CoV-2, iha komunidade nia le’et.

Iha 24 agostu 2021, izolamentu Vera Cruz halo tratamentu ba kazu detetadu na’in 69. Iha área obstetrisia na’in 10 no iha medisina interna na’in 47, iha sirurjia na’in-lima,  pediatria na’in-lima, perinatolojia na’in-rua. Iha obstetrisia na’in 10 kategoria kaman hotu. Iha área medisina interna na’in 47. Na’in 20 kategoria grave (haat uza ventiladór). Na’in-ida  ho CPAP-Continuous Positive Airway Pressure, 14 ho oksijéniu). Na’in 14 kategoria moderadu, 13 kategoria kaman. Sira na’in-lima iha sirurjia kategoria kaman hotu, na’in-lima pediatria kategoria kaman, no na’in-rua iha perinatolojia kategoria kaman.

Númeru kazu moderadu no grave ne’ebé baixa iha Vera Cruz, hatudu katak, bainhira ema barak liu detetadu pozitivu, barak-liu tan maka sei baixa ho kategoria moderadu no grave.

Informa mós ba públiku katak Iha semana kotuk (16-22 agostu), ema ne’ebé baixa iha Vera Cruz no Lahane tanba COVID-19, hamutuk hotu 41/54 (76%) mak seidauk simu vasina, kompara ho ema na’in 11/54 (20,3%) ne’ebé mak simu ona vasina kompletu.

Ema ne’ebé seidauk simu vasina iha probabilidade bo’ot liu dala-rua, atu baixa iha ospitál, kompara ho ema ne’ebé mak simu ona vasina.

Informa mós katak, ema adultu na’in 14 ne’ebé mate iha semana kotuk (16-22 agostu), la simu vasina kompletu (iha ema ida de’it maka simu doze vasina ida).

Ida-ne’e hatudu katak, iha Timor-Leste ema ne’ebé mak simu ona vasina kompletu, seidauk iha ida mak mate ho/tan bá COVID-19.

Apela ba populasaun iha Timor-Leste laran tomak, maski karik simu ona vasina, favór respeita nafatin regra prevensaun no ijiéne individual, ne’ebé Governu hatu’ur ona, atu prevene moras COVID-19 da’et ba mai.

Regra sira-ne’e, mak hanesan uza máscara, fase liman beibeik ho sabaun ka dezinfetante ruma, evita kose liman ba matan, inus ho ibun bainhira kumprimenta malu, la presiza ka’er liman, bensa-liman, rei-malu ka haku’ak malu, evita halibur malu barak hamri’ik ka tur do’ok husi ema seluk, mínimu metru ida ho balun.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here