Timoroan deportadu bainhira to’o iha fronteira Batugade sábadu (21/08). Imajen/PNTL.

BOBONARO, 21 agostu 2021 (TATOLI)—Autoridade seguransa hosi Belu Atambua, Indonézia deporta tan timoroan na’in 164 mai imigrasaun Timor-Leste (TL), no na’in tolu iha síntoma COVID-19, bainhira submete ba swab teste, iha sábadu (21/08).

Segundu Adjuntu Operasaun, Xefe Estadu Maior Koordenadór Konjuntu, Sala Situasaun Sentru Integradu Jestaun Krize (SIJK), Superintendente Marcos Sequeira, esplika bazeia ba teste PCR iha sidadaun na’in-tolu mak hatudu síntoma, isin manas no polísia halo kedan tratamentu ketak hosi sidadaun sira seluk hodi evita kontájiu.

Notísia relevante:Ema na’in 21 fa’an kuda ilegál iha fronteira Covalima

“Iha mane na’in-tolu mak hatudu síntoma no agora ita sei prepara transporte ketak ba sira, sei lori ba kuarentena fora hosi Dili,” Superintendente Marcos Sequeira  informa ba jornalista-sira, iha pontu entrada Batugade, sábadu ne’e.

Sidadaun hirak-ne’ebé Autoridade Indonézia deporta, kompostu hosi mane 259 no feto na’in-lima tanba hakat fronteira terestre no Tasi ilegalmente ho objetivu atu ba partisipa serimónia graduasaun arte marsiál iha Atambua, Nusa Tenggara Timur (NTT).

Desizaun Governu Indonézia deporta sidadaun hirak-ne’e bazeia ba konkordánsia no koordenasaun di’ak entre Autoridade Seguransa no Defeza kupang ho Belu hamutuk ho enviadu espsiál Governu Timor-Leste ne’eb’e lidera hosi Longuinhos Monteiro, hamutuk ho kunsuladu  TL iha Kupang no Atambua.

Sidadaun na’in 164 ne’e, entrega-an ba autoridade seguransa Indonézia hafoin kontaktu mai ekipa mediasaun TL nian to’o lori fila mai to’o fronteira.

Sidadaun hirak ne’ebé hakat fronteira terestre liu hosi dalan ilegál ba Atambua, mai hosi munisípiu Bobonaro, Ermera, Baucau no Dili mak númeru boot liu.

Governu TL kontinua tane aas dignidade nu’udár ema, nune’e bele enkoraza sira seluk ne’ebé sei iha Indonézia atu tama tuir odamatan boot parte seguransa prontu asegura hodi oferese ba parte saúde atu halo tratamentu kumpre protokolu COVID-19.

Komandante Unidade Patrullamentu Fronteira (UPF), Superintendente Xefe, Euclides Belo, husu ba timoroan balunne’ebé sei iha Indonézia atu entrega-an ba autoridade seguransa, nune’e bele deporta fila mai TL, tanba autoridade seguransa Indonézia nian fó ona ultimatum to’o de’it semana oin.

Bainhira la entrega-an, maka autoridade Indonézia sei halo operasaun hodi aplika sansaun todan tanba hakat liu fronteira ilegalmente, konsidera halo violasaun todan ba lei hosi nasaun rua nian.

Ekipa SIJK transporta ona sidadaun deportadu hirak-ne’e mai Dili, hodi kumpre kuarentena durante loron 14, no bainhira kompleta ona sei submete ba prosesu invetigasaun tuir lei.

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here