Prezidente Institutu Nasionál Seguransa Sosiál (INSS), Longuinhos Armando Leite. Imajen Tatoli/Francisco Sony

DILI, 02 agostu 2021 (TATOLI)—Prezidente Institutu Nasionál Seguransa (INSS), Longuinhos Armando Leite informa hosi loron 07 jullu to’o 02 agostu, INSS liuhosi programa ‘Apoiu Ba Empregu” halo ona pagamentu ba entidade empregadór no fakultativu sira hamutuk 7.302.

Hosi totál 7.302, kompostu fakultativu iha 1.364, traballadór iha empreza sira hamutuk 4.139, ba entiadade empregadór 266 no despensa kontribuitivu ba benefisiáriu ka entidade empregadór iha 1.533.

“Totál pagamentu ne’ebé mak ita realiza ona ho osan hamutuk $3.183,291.01. Ita-nia saldo ne’ebé sei iha mak $42.116.000.” Longuinhos Armando Leite hateten ba Agência TATOLI, iha nia knaar fatin, Caicoli, Dili, segunda ne’e.

Prezidente INSS hateten, ekipa INSS kontinua halo verifikasaun ba apoiu empregu sira kuaze 4.000, nune’e seidauk bele dehan bainhira mak halo pagamentu hotu.

Nia husu ba benefisiáriu sira atu pasiénsia hein tanba loron ruma pagamentu sei to’o iha benefisiáriu sira-nia konta rasik.

“Ami ne’ebé sevisu iha INSS ne’e servisu barak, tanba ne’e pagamentu ne’e labele hotu lalais iha tempu badak. Aleinde ne’e ita mós halo pagamentu ba ita-nia idozu no invalidéz sira iha territóriu nasionál, tanba ne’e ita presiza tempu mak fahe hodi halo pagamentu ne’e. To’o agora, INSS seidauk simu reklamasaun hosi benefisiáriu sira,” nia dehan.

Notísia Relevante: 01 jullu: INSS sei halo pagamentu ba empregadór 9.000-resin

Jornalista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here