Karreta Hilux ho xapa matríkula 26.517, ne’ebé baku-fila iha suku Nunu Moge, postu administrativu Hatubilico, munisípiu Ainaro, rezulta membru F-FDTL ida mate no na’in lima kanek, tersa (24/08/21). Imajen fecobook.

DILI, 24 agostu 2021 (TATOLI)—Membru FALINTIL Forsa Defeza Timor-Leste (F-FDTL) hosi Komponente Navál, na’in ida mate no na’in-lima kanek, tanba hetan asidente ho karreta Hilux ho xapa matríkula 26.517, iha suku Nunu Moge, postu administrativu Hatubilico, munisípiu Ainaro.

Na’in-ida ne’ebé mate, família lori ona ba nia moris fatin iha postu Adminsitrativu Hatu-Udo munisípiu Ainaro, hodi hala’o serimónia funerál.

Notísia relevante:F-FDTL sei realiza tour dalan ba dame

Alende ne’e, na’in-lima ne’ebé hetan kanek kamán sei kontinua hala’o hela tratamentu intensivu iha sentru saúde internamentu Ainaro-Villa.

“Sira na’in lima di’ak  no sei kontinua  halo observasaun iha internamentu, hodi haree  evolusaun.  Na’in-ida mak mate iha sentru saúde internamentu Ainaro Villa iha tuku 18:08 otl,” Xefe Departamentu Serbisu Emerjénsia Ambulánsia, Munisípiu Ainaro, Ediana  da Conceição Araújo, hateten ba jornalista Agência  Tatoli via telefónika, tersa ne’e.

Na’in ida ne’ebé mate feto ida ho naran Júlia da Conceição (29) tanba kanek grave no mane na’in-lima ne’eb’e hetan kanek kamán, ida naran Rudi G da Silva (27) kanek iha parte liman sanak nian, Orlando Amaral (31) kanek iha parte ulun suku pontu tolu, Aleixo Verdial  (38) kanek iha parte ain karuk, José Magalhães (33) kanek iha ain,  no Mário Araújo (37) la kanek maibé trauma de’it.

Alende ne’e, Komandante Polísia Nasionál Timor Leste (PNTL), munisípiu Ainaro, Superindente, Justino Menezes, esplika asidente ne’e akontese iha tuku 16:00 otl, bainhira ekipa avansadu ne’e hala’o viájen hosi Dili atu ba Suai hodi hala’o servisu relasiona ho preparasaun tour FALINTIL.

Bainhira to’o área Nunu Moge  mak hetan asidente, ida-idak monu mesak tanba karreta baku-fila iha rai lolon naruk kuaze metru 65.

“Membru ida mate ne’e, deskonfia bainhira monu iha buat ruma mak hanehan iha parte hirus-matan halo dada-iis la di’ak,” Justino Menezes, hateten liu hosi telefónika.

Kona-bá motivu loloos hodi hamosu asidente ne’e sei iha prosesu investigasaun, tanba kondutór ne’ebé lori karreta ho kondisaun kanek no trauma hela.

Jornalista: Felicidade Ximenes/Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here