Vise Prezidente Komisaun Organizadora, komemorasaun loron FALINTIL bad ala 46, Tenente Koronel, Constantinho Moreira, hala’o konferénsia imprensa iha kuartél jenerál F-FDTL, Fatuhada, sesta (13/08/21). Imajen F-FDTL.

DILI, 13 agostu 2021 (TATOLI)—FALINTIL-Forsa Defeza Timor-Leste (F-FDTL), sei realiza tour dalan ba dame, hodi komemora loron FALINTIL ba dala 46, iha 20 agostu.

Tour ne’e ho tema, dalan ba dame ho objetivu atu vizita fatin istóriku-sira kona-bá asaun golpe kontra golpe ka funu sivíl no Fretilin ho Fretilin kontra-malu, ne’ebé akontese iha territóriu.

Notísia relevante:Selebrasaun loron FALINTIL, PR la fó indultu ba prizioneiru

“Loron ne’e importante tanba asuwa’in FALINTIL ho sira-nia aten brani defende soberania to’o Timor-Leste sai nasaun indepedente. Hosi tour ne’e bele identifika no hanoin hikas vítima-sira,” Vise Prezidente Komisaun Organizadora, Tenente Koronel, Constantinho Moreira, hateten liuhosi konferénsia imprensa iha kuartél jenerál F-FDTL, Fatuhada, sesta ne’e.

Ekipa ne’ebé sei akompaña tour ne’e kompostu hosi ofisiais,  jenerál to’o superiór ho ekipa avansadu hosi F-FDTL  no partisipa mós hosi komunidade internasionál, hanesan adidu militár ho korpu diplomátiku.

Tour ne’e sei hahú iha loron 15 agostu ho rute hahú hosi Dili, Manatuto, Baucau, Lautém, Viqueque, Manufahi, nune’e iha 19 agostu sei fila mai Dili, hodi prepara serimónia solene.

Iha 25 agostu sei kontinua  fali-fali tour ba  diresaun Liquiça, Maliana, Covalima, Ainaro, Aileu, sei mai fali Dili termina iha 29 agostu.

Tuir ajenda, atividade seluk maka iha 19 agostu sei realiza misa iha igreja Santo António Motael, hafoin kari ai-funan iha jardin erói Metinaro.

Iha 20 agostu, tuku 8:00 dader sei selebra ho solene, prezide hosi Prezidente Repúblika (PR), Francisco Guterres ‘Lú-Olo’ no partisipa mós órgaun soberania-sira.

Iha serimónia solene ne’e parte Komandu mós sei halo promosaun diviza ba membru F-FDTL.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here