Prezidente ANPM, Florentino Mateus Soares Ferreira. Imajen TATOLI/Francisco Sony

DILI, 06 jullu 2021 (TATOLI)–Prezidente Autoridade Nasionál Petróleu no Minerál (ANPM), Florentino Mateus Soares Ferreira, informa, empreza Santos halo ona perfurasaun iha posu dahuluk mina-matan iha kampu Bayu-undan.

“Ita akompaña besik ho rigorozu tebes, perfurasaun empreza Santos iha posu dahuluk no ita husu kada loron empreza hato’o relatóriu no planu semanál maibé seidauk. Laiha difikuldade no obstákulu iha prosesu perfurasaun,” Prezidente ANPM informa ba Agência TATOLI, iha Suai Room, Timor-Plaza, Dili, tersa ne’e.

Notísia relevante: Governu espera produsaun Santos iha Bayu-undan bele hanaruk vida útil

Tuir relatóriu, kada loron empreza australianu ne’e halo perfurasaun ho aparelu, liuliu plataforma Jck-up Tom Prosser no sondajen/rig, maibé seidauk atinje alvu.

Tuir dirijente ne’e, kuandu to’o ona alvu maka bele hatene kuantidade mina tanba previzaun  hatudu bele hetan millaun $20 barríl resin, ne’ebé hanesan rezerva bruto óleu no produsaun kustu fornesimentu kiik, nune’e bele extende durasaun útil Bayu-undan.

“Kada loron tenke atinje profundidade ka fura metru balun, dalaruma iha dezafiu balun tenke hasai aparellu, hafoin kontinua fura tanba prosesu perfurasaun iha inserteza barak iha terrenu,” nia akresenta.

Prezidente ANPM dehan, relasiona ho profundidade, nia parte seidauk iha informasaun tanba seidauk simu relatóriu semanál maibé kada loron hosi Santos, maibé empreza sempre relata ba tékniku sira.

“Ha’u labele fó sai profundidade metru hira, maibé ein prinsípiu ita seidauk to’o alvu,” nia akresenta.

Empreza Santos mobiliza materiál pergurasaun Noble Tom posser no sondagem/rig, iha loron kinta (25/05) hodi halo perfurasaun iha área kontratu.

Empreza Australianu ne’e hanesan operadór iha kampu Bayu-undan ne’ebé iha janeiru tinan ne’e anunsia ona desizaun halo investimentu ho montante millaun $235 ba projetu perfurasaun mina-matan tolu iha kampu petrolíferu ne’e.

Empreza petrolífera halo perfurasaun ba dahuluk, bainhira kampu ne’e hanesan ona parte esklusiva ida iha jurizdisaun Timor-Leste, hafoin ratifikasaun Tratadu Fronteira Marítima entre Timor-Leste no Austrália.

Durante ne’e, projetu Bayu-undan kontribui ona reseita ba Estadu Timor-Leste, ba fundu mina-rai hamutuk biliaun $20 resin.

Jornalista : Florêncio Miranda Ximenes

Editora      : Julia Chatarina

HAKEREK NO HATÁN

Please enter your comment!
Please enter your name here