Prezidente Board AHDRO, Gaspar Afonso. Imajen Tatoli/Sérgio da Cruz.

BOBONARO, 10 agostu 2021 (TATOLI)—Prezidente Board, Asosiasaun Halibur Defisiénsia Rejiaun Oeste (AHDRO), Gaspar Afonso, observa katak, konstrusaun edifísiu públiku iha munisípiu Bobonaro, seidauk iha espasu no kondisaun asesiblidade ba ema ho defisiénsia.

Gaspar Afonso hato’o asuntu ne’e iha ámbitu komemorasaun ezisténsia AHDRO ba dala VI, ne’ebé realiza iha sede suku Lahomea, tersa ne’e.

Notísia relevante:Espíritu voluntarizmu mak xave ba susesu

“Kuandu ha’u mai iha Bobonaro, edifísiu administrasaun munisipiu Bobonaro de’it mós eskada mesak naruk de’it, sa tán edifísiu seluk ne’e dalaruma kadeira roda labele la’o karik. Bainhira ita kontinua hanesan ne’e, ami konsidera na’in-ulun sira halo diskriminasaun ba ema ho defisiénsia,” nia hateten.

Tanba ne’e, Gaspar Afonso husu autoridade munisipál Bobonaro, bainhira atu halo konstrusaun foun ruma, tenke tau importánsia aseseiblidade ba ema ho defisiénsia, tanba ema ho defisiénsia mós iha direitu asesu edukasaun, saúde iha fasilidade-sira ne’ebé Governu prepara.

Husu mós ba autoridade munisipál bainhira iha implementasaun programa ruma  presiza inbolve mós ema ho defisiénsia, nune’e bele promove, proteje no valoriza ema ho defisiénsia iha prosesu dezenbolvimentu nasionál.

“Ami-nia direitu ne’e konsagra iha Konstituisaun RDTL artigu 21, iha alinea primeiru hateten katak, sidadaun ne’ebé ho kondisaun defisiénsia iha obrigasaun hanesan ho sidadaun sira seluk. Iha alinea segundu mós ko’alia klaru, tanba ne’e na’i-ulun sira favór trata ami hanesan ho ema seluk,” nia husu.

Tui nia haree katak, ema ho defisiénsia ne’ebé hamahan-an iha AHDRO Bobonaro, seidauk asesu ba edukasaun inkluziva.

Diretór ezekutivu AHDRO, Sebastião de Fátima, hateten ezisténsia AHDRO atu fó advokasia ba ema ho defisiénsia liu-liu ba sira ne’ebé hela iha área remota ne’ebé susar atu asesu informasaun, edukasaun saúde no seluk tan.

Maski AHDRO eziste ona desde 10 agostu 2015, ho ninia sentru tolu iha Bobonaro, Covalima no Liquiça, maibé to’o oras ne’e seidauk hetan apoiu ruma hosi instituisaun ruma.

Nune’e diretór ne’e husu ba Governu liu-liu Ministériu Solidariedade Sosiál no Inkluzasaun no ministériu sira seluk, atu fó apoiu ruma, tanba ema ho defisiénsia barak mak iha talentu ba múzika no arte, maibé laiha fasilidade.

Kona-bá preokupasaun hirak-ne’e, Sekretáriu Autoridade munisipál Bobonaro, Júlio Caero, rekoñse konstrusaun edifísiu públiku barak iha munisípiu ne’e laiha duni asesibilidade ba ema ho defisiénsia, tanba ne’e  sei esforsu  tau asuntu defisiénsia iha prioridade programa komún.

Selebrasaun AHDRO ba dala VI ne’e, iha mós aprezentasaun no diskusaun tópiku tolu mak hanesan, asuntu ema ho defisiénsia, komitmentu ba asuntu edukasaun inkluziva no Espíritu voluntarizmu joven uluk no agora.

Tuir dadus hosi Serbisu Ministériu Solidariedade Sosiál no Inkluzaun munisípiu Bobonaro rejista ema ho defisiénsia matan, fíziku no mentál iha Bobonaro hamutuk 366 no seidauk kobre área remota.

Tuir dadus sensu uma ka’in 2015 ema ho defisiénsia iha Timor-Leste hamutuk 38.118.

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here